Alla Tassew Jeżisti

Il-kunċett ta’ Alla dejjem kien suġġett importanti, u nsibu li nies ta’ kull età, imma b’mod partikolari t-tfal, kienu u għadhom ħerqana biex ikunu jafu jekk verament hemmx Alla.

Bħala Musulmana, nemmen li l-preżenza ta’ Alla fil-ħajja tagħna hija l-essenza tat-twemmin tagħna. L-għan primarju ta’ kull reliġjon huwa li tiggwida lill-umanità lejn Alla u li taqdi l-ħolqien Tiegħu.

Imma kif nistgħu nifhmu u nesperjenzaw l-eżistenza ta’ Alla? Dan ifakkarni storja qasira ħafna, iżda profonda u għaqlija ta’ bedwin Għarbi.

Darba, filosfu ltaqa’ ma’ Bedwin Għarbi. Il-filosfu staqsieh: Inti temmen f’Alla? Il-Bedwin wieġbu: Iva jiena nemmen f’Alla. Il-filosfu staqsieh: Xi prova għandek tal-eżistenza ta’ Alla? It-tweġiba tal-Bedwin kienet sempliċi ħafna iżda mimlija bl-għerf. Ir-risposta tiegħu tant kienet importanti li titfa’ dawl biżżejjed b’mod komprensiv fuq is-suġġett tal-eżistenza ta’ Alla. Il-Bedwin wieġeb:

Meta xi ħadd li jkun għaddej mill-ġungla jilmaħ il-ħmieġ tal-ġemel, huwa jikkonkludi li ġemel ikun għadda minn hemm; jekk jara l-marka ta’ sieq ta’ raġel fir-ramel tad-deżert, huwa jiddeduċi li xi vjaġġatur ikun għadda minn din it-triq. Issa, meta nħarsu lejn din id-dinja, bil-marki wiesgħa kollha tagħha, u din is-sema, bix-xemx tagħha, u l-qamar u l-kwiekeb, ma jġagħluniex naħsbu li bilfors kellhom bżonn Ħallieq?

Kemm huwa kliem profond, razzjonali u għaqli dak ta’ Bedwin Għarbi illitterat. Bla dubju ta’ xejn, kollox f’din id-dinja huwa prova definita tal-eżistenza ta’ xi Ħallieq – Alla tagħna – li ħalaqha.

Sempliċi pinna jew karta ma jistgħux jeżistu mingħajr disinjatur jew kreatur. Mela, kif inhu possibbli li l-univers sħiħ li huwa tant organizzat, u li huwa kapulavur ta’ perfezzjoni u glorja, beda jeżisti mingħajr disinjatur jew kreatur?

Imam Laiq Ahmed Atif | Il-Leħen 25.06.2023 | amjmalta@gmail.com