The Current Economic Situation and the Virtue of Simplicity

Posted on November 8, 2026 by Laiq Ahmed Atif

Image: Zurijeta/Shutterstock.com

Is-Sitwazzjoni Ekonomika tal-Lum u l-Virtù tas-Sempliċità

It-Torċa, 08.11.2026 | Imam Laiq Ahmed Atif — amjmalta@gmail.com

Is-sitwazzjoni politika, ekonomika u soċjali li hawn bħalissa madwar id-dinja qed toħloq theddida kbira għall-paċi, l-armonija, it-tolleranza u l-għajxien flimkien fis-soċjetà. Hemm diversi raġunijiet għal din is-sitwazzjoni li dejjem qed tikber, kif ukoll għall-protesti li qed jiżdiedu madwar id-dinja u barra minn xtutna.

Jista’ jkun hemm ħafna soluzzjonijiet għal dawn il-problemi. Xi soluzzjonijiet jistgħu jirrikjedu miljuni ta’ ewro, filwaqt li oħrajn jistgħu jkunu skemi, inizjattivi, policies u benefiċċji li jgħinu biex is-sitwazzjoni tikkalma.

It-teżor li jista’ jgħinna nindirizzaw il-problemi tal-lum

Madankollu, l-Iżlam joffri soluzzjoni sabiħa li ma teħtieġx ġid materjali jew benefiċċji ekonomiċi. Hija soluzzjoni sempliċi ħafna, iżda għandha tifsira profonda u tista’ tkun tassew effettiva. Ma teħtieġx flus, iżda biss impenn mill-mexxejja u minn kull individwu, dedikazzjoni, konvinzjoni u rieda qawwija. Din it-teżor li jista’ jgħinna nindirizzaw il-problemi tad-dinja tal-lum hija: il-virtù tas-sempliċità.

Naturalment, m’hemm xejn ħażin li ngawdu mill-ġid u l-barkiet li għandna. Madankollu, huwa ħażin li nsiru tant dipendenti fuq l-affarijiet materjali li meta ma nkunux nistgħu niksbu dak li nixtiequ, naqtgħu qalbna jew nidħlu f’depressjoni. Dan iwassal biex is-sitwazzjoni tmur għall-agħar u toħroġ minn taħt kontroll.

Is-sempliċità fl-ikel u fl-ilbies

Is-sempliċità f’kull aspett tal-ħajja hija ta’ benefiċċju kbir. Madankollu, f’dan l-artiklu nixtieq niffoka biss fuq is-sempliċità li nistgħu napplikaw u fl-ilbies u fl-ikel u fid-drawwiet marbuta magħhom.

Illum, ħafna nies qed jiffaċċjaw diffikultajiet finanzjarji. Parti minn din il-problema hija marbuta max-xewqat dejjem jiżdiedu tagħna fejn jidħol l-ikel, kif ukoll ix-xewqa għal ħwejjeġ ta’ ditti magħrufa, fost affarijiet oħra.

Ħafna jixtiequ jilbsu libsa għalja u jieklu l-aktar ikel għali u ta’ kwalità għolja u jżuru l-aqwa lukandi u ristoranti biex igawdu ikliet lussużi. Meta nistgħu niksbu l-istess riżultat billi nieklu l-ikel sempliċi iżda tajjeb għas-saħħa, u nagħżlu ħwejjeġ sempliċi u eleganti bi prezzijiet raġonevoli. B’hekk, inkunu nistgħu nilbsu tajjeb mingħajr ma ngħabbew lilna nfusna b’piżijiet finanzjarji jew pressjoni żejda.

Riċentement, il-Kap Dinji tal-Komunità Ahmadiyya Musulmana ġibed l-attenzjoni tagħna lejn dan is-suġġett importanti. Huwa spjega li llum, ħafna nies jitħassbu meta ma jkunux jistgħu jixtru jew isibu l-istess ikel li huma mdorrijin jieklu minħabba s-sitwazzjoni attwali fid-dinja. Huwa wissa li s-sitwazzjoni tista’ tmur għall-agħar jekk tinqala’ gwerra dinjija. Għalhekk, jeħtieġ li nadottaw stil ta’ ħajja sempliċi u nitgħallmu nkunu kuntenti b’dak li għandna. M’għandniex insiru dipendenti għal kollox fuq dawn l-affarijiet tad-dinja.

Nadottaw is-sempliċità fid-drawwiet tagħna

Dan ukoll jikkontribwixxi għall-problemi u t-tensjonijiet fis-soċjetà. Is-sempliċità ma tfissirx li nieklu ikel ħażin u mhux tajjeb għas-saħħa, iżda pjuttost tfisser li nadottaw is-sempliċità fid-drawwiet tagħna. L-ikel sempliċi huwa aħjar għas-saħħa, għax huwa ħieles minn ħafna togħmiet u ħwawar mhux naturali.

Il-Qaddis Profeta Muħammad, is-sliem għalih, qal li l-istonku huwa bħal bastiment jew kontenitur li jista’ jagħmel ħsara lil ġisimna jekk nimlewh kompletament. Għalhekk, għandna nieklu biss dak li hu meħtieġ. Jekk ikollna biżżejjed ikel, għandna nieklu biss sakemm nimlew terz tal-istonku. Terz ieħor inħalluh għall-ilma u l-aħħar terz għall-arja. Fi kliem ieħor, dejjem għandna nħallu ftit spazju fl-istonku minflok nimlewh kollu.

Dan huwa wkoll wieħed mill-aqwa pariri għal saħħitna. Insibu li n-nutrizzjonisti u l-esperti mediċi jagħtu pariri simili. Li nħallu ftit spazju fl-istonku jgħin fid-diġestjoni, iżommna b’saħħitna u attivi, u jevita li nżidu fil-piż bla bżonn.

Fl-istess ħin, il-Qaddis Profeta Muħammad dejjem żamm bilanċ. Huwa ma kienx favur li persuna ċċaħħad lilha nnifisha minn kollox. Għall-kuntrarju, kien jiekol l-aħjar ikel li kien ikollu disponibbli, iżda dejjem bil-moderazzjoni. Għalhekk, l-għan tiegħu ma kienx li dejjem ifittex l-aqwa ikel, iżda li jiekol l-aħjar minn dak li kien ikollu.

Is-sempliċità twassal għall-empatija u l-qalb tajba

Li ngħixu ħajja sempliċi twassal ukoll għal ħafna virtujiet oħra, bħall-empatija u l-qalb tajba lejn dawk li huma l-aktar dgħajfa fis-soċjetà. Dan jgħallimna li dejjem għandna niftakru f’dawk li m’għandhomx ħafna u f’dawk li għandhom bżonn l-għajnuna tagħna.

Darba waħda, mara li kellha żewġt ibniet żgħar marret għand il-mara tal-Profeta Muħammad biex titlob l-għajnuna, għax ma kellhom xejn x’jieklu. Dak iż-żmien, f’darha kien hemm biss tamra waħda, u din tatha lill-mara. Il-mara qasmet it-tamra f’żewġ biċċiet u tat biċċa lil kull waħda minn uliedha, mingħajr ma kielet xejn hi stess.

Tassew, is-sempliċità tagħmel ħajjitna aktar faċli u kuntenta, mingħajr pressjoni jew piżijiet żejda, u twassalna għal ħafna virtujiet u barkiet. Għalhekk, ejjew napplikaw dan il-valur sabiħ fil-ħajja tagħna ta’ kuljum, sabiex nevitaw piżijiet u pressjonijiet bla bżonn u ngħixu ħajja sana, fil-paċi u kuntenti b’dak li għandna. Jalla Alla ibierek lilna lkoll u jgħinna ngħixu b’dan il-mod. Ammen.

Posted in Ahmadiyya, Ahmadiyya Malta, Article | Tagged , , , , , , , | Leave a comment

The Sustainable Development Goals and Social Challenges

Posted on November 7, 2026 by Laiq Ahmed Atif
Posted in Ahmadiyya, Ahmadiyya Malta, TV interviews | Tagged , , , , , , , , , , , , , | Leave a comment

Bullying and the Importance of Parental Behaviour

Posted on November 1, 2026 by Laiq Ahmed Atif

iStock.com/SeventyFour

IL-BULLYING U L-IMPORTANZA TAL-IMĠIBA TAL-ĠENITURI

It-Torċa, 01.11.2026 | Imam Laiq Ahmed Atif — amjmalta@gmail.com

“Kull tifel u tifla jitwieldu bin-natura tagħhom safja. Huma l-ġenituri li jagħmluhom atei, jew Lhud jew Insara jew Musulmani, skont it-tagħlim, it-trobbija u t-taħriġ speċifiċi li jgħaddulhom, u billi jipprovdu mudell partikolari bis-saħħa tal-imġiba tagħhom stess.”

Dan huwa l-kliem tal-Qaddis Profeta Muhammad, is-sliem għalih, li jitfa’ dawl biżżejjed u jagħti tifsira sħiħa meta nitkellmu dwar l-imġiba tat-tfal fis-soċjetà u partikolarment fl-iskejjel tagħhom. Bla dubju ta’ xejn iż-żerriegħa li niżirgħu f’uliedna meta huma għadhom t’età żgħira, issir pjanta jew siġra matul iż-żmien u jagħtu l-frott skont iż-żerriegħa.

Minn arbuxelli ma joħroġx frawli

Għalhekk, jekk niżirgħu ż-żerriegħa ta’ tolleranza, ħbiberija u rispett, din żgur tagħti frott bnin, iżda, sfortunatament, jekk niżirgħu arbuxelli tax-xewk, mela m’għandniex nistennew il-frawli ħelu.

Tabilħaqq, il-ġenituri huma l-ewwel għalliema u d-dar hija l-ewwel skola tat-tfal, u t-tfal jitgħallmu ħafna mill-ġenituri tagħhom. Huma jikkupjaw ħafna mill-ġenituri tagħhom, għax, it-tfal jarawhom bħala l-mudelli tagħhom. Kulma jagħmlu l-ġenituri jaffettwa lit-tfal, dak li jieklu, dak li jilbsu, kif jittrattaw lil xulxin, kif jindirizzaw lil xulxin, kif jitkellmu mal-ġenituri tagħhom, kif jitkellmu maż-żgħar, mal-fqir, mad-dgħajjef, kif isuqu, kif jimxu fit-triq, jekk ipejpu, jekk jużaw lingwaġġ ħażin, eċċ.

Għaliex ktibt dwar l-importanza tal-imġiba tajba tal-ġenituri? Għax din għandha rwol importanti ħafna fit-tiswir tal-karattru tat-tfal, tal-attitudni tagħhom u tal-mod kif iġibu ruħhom ma’ ħaddieħor. Il-ġenituri huma l-ewwel għalliema ta’ wliedhom u l-ewwel mudelli li t-tfal iħarsu lejhom. Il-valuri li l-ġenituri jgħixu u jipprattikaw fid-dar spiss isiru l-prinċipji li wliedhom iġorru magħhom meta joħorġu fid-dinja ta’ barra.

Il-bullying fl-iskejjel

Dan l-aħħar, fil-Parlament Malti ġie ppreżentat rapport dwar il-bullying fl-iskejjel, li wera żieda fil-każijiet ta’ bullying li ġew irrappurtati matul is-snin ta’ qabel. Jista’ jkun hemm diversi raġunijiet għal din is-sitwazzjoni inkwetanti.

Fost dawn insibu l-pressjoni minn sħabhom (peer pressure), ix-xewqa li jkunu popolari jew li juru li huma aqwa minn ħaddieħor, in-nuqqas ta’ empatija u ta’ għarfien dwar is-sentimenti tal-oħrajn, l-espożizzjoni għal imġiba aggressiva u l-influwenza tal-midja soċjali, fejn jista’ jsir ukoll bullying fuq l-internet.

F’xi każijiet, it-tfal jistgħu jimitaw l-imġiba li jaraw fid-dar jew fl-ambjent ta’ madwarhom. Meta ma jittiħdux passi xierqa biex jitwaqqaf il-bullying, jew meta t-tfal jibżgħu jitkellmu, din il-problema tista’ tkompli għaddejja mingħajr ma tingħata l-attenzjoni meħtieġa.

Madankollu, nemmen li l-każijiet irrappurtati jistgħu jkunu biss parti żgħira mill-problema vera. Il-bullying spiss ikun problema ħafna aktar profonda. Jista’ jibda bil-mod il-mod, jibqa’ moħbi għal snin sħaħ u, f’ħafna każijiet, iħalli feriti emozzjonali li jdumu għal ħajjithom kollha.

Xi studenti ma jirrappurtawx dak li jkun qed jiġrilhom għax jibżgħu li min qed jibbuljahom jagħmlilhom aktar ħsara, jistħu, jibżgħu li ħadd ma jemminhom jew sempliċement ma jafux għand min għandhom imorru. Oħrajn jippruvaw isolvu din il-problema waħedhom, u xi kultant jirreaġixxu b’mod li jaggravaw is-sitwazzjoni.

Dak li huwa tassew ċert huwa li, wara dawn in-numri u l-istatistiċi hemm tfal veri, sentimenti veri u tbatija vera li qatt m’għandna ninjoraw.

Xi jwassal għall-bullying?

Imma xi jwassal lil xi ħadd biex jibbulja lil persuna oħra? Għaliex xi nies jużaw il-bullying lejn dawk li jqisuhom aktar dgħajfa jew differenti minnhom? Jagħmlu dan biex juru li għandhom is-saħħa, biex jidhru aqwa mill-oħrajn, biex ikunu popolari, biex jimpressjonaw lil sħabhom, jew jidhru cool, jew sempliċement biex jieħdu gost mid-deni ta’ ħaddieħor?

Naħseb li, il-bullying jista’ jieħu ħafna forom. Jista’ jkun hemm diskriminazzjoni minħabba l-kulur tal-ġilda, jew minħabba d-differenza tal-prattiki reliġjużi, id-dehra ta’ persuna, l-għażla tal-ħwejjeġ li tilbes bħall-ħiġab li jilbsu tfajliet Musulmani, jew ċajt u insulti dwar il-faqar u s-sitwazzjoni finanzjarja ta’ xi ħadd. Xi tfal jiġu mmirati wkoll għax ma jċedux għall-pressjoni ta’ sħabhom. Xi kultant, tifel jew tifla jiġu bbuljati sempliċement għax huma differenti, għax jesprimu l-opinjoni tagħhom jew għax ma jimxux mal-folla.

Il-konsegwenzi kiefra tal-bullying

Ikunu xi jkunu r-raġunijiet jew il-motivi wara l-bullying, ħaġa waħda hija ċerta: il-konsegwenzi tiegħu jistgħu jkunu kiefra għall-persuna li tkun qed tbati minnu. Min ibbulja lil ħaddieħor jaf ma jifhimx kemm kliemu jew għemilu jista’ jweġġa’, iżda l-persuna li tkun qed tiġi mmirata tista’ tibqa’ tiftakar dawk l-esperjenzi koroh għal ħafna snin. Ċajta li għal persuna tidher bla ħsara tista’ ġġiegħel lil persuna oħra tħossha umiljata, anzjuża, waħedha u bla fiduċja fiha nnifisha.

F’każijiet serji, il-bullying jista’ jkisser l-istima li persuna għandha tagħha nnifisha, jagħmel ħsara lis-saħħa mentali tagħha, jaffettwa r-riżultati tagħha fl-iskola u jibdel sew il-mod kif tara lilha nnifisha u lid-dinja ta’ madwarha.

Għaldaqstant, il-ġenituri għandhom responsabbiltà kbira li jagħtu eżempju tajjeb bl-imġiba tagħhom u jgħallmu lil uliedhom l-aqwa virtujiet u valuri umani, bħall-empatija, ir-rispett, it-tolleranza u l-ħniena lejn l-oħrajn, sabiex jgħinu fil-qerda tal-bullying fl-iskejjel u, tabilħaqq, fis-soċjetà kollha kemm hi.

Posted in Ahmadiyya, Ahmadiyya Malta, Article | Tagged , , , , , , , , , , , , , , | Leave a comment

What should we really be waiting in the queue for?

Posted on October 28, 2026 by Laiq Ahmed Atif

istock.com/hxdbzxy

Għal xiex għandna verament nistennew fil-kju?

In-Nazzjon, 28.10.2026 | Imam Laiq Ahmed Atif — amjmalta@gmail.com

Reċentement żagħżugħ deher fl-aħbarijiet wara li qatta’ ħdax-il siegħa matul il-lejl jistenna barra minn ħanut sabiex ikun l-ewwel persuna f’Malta li jixtri l-iPhone 18 il-ġdid.

M’hemm xejn naturalment ħażin li tixtri telefon ġdid. L-ebda reliġjon, inkluż l-Iżlam, ma jipprojbixxi lill-bniedem milli jgawdi l-barkiet ta’ din id-dinja. It-teknoloġija tista’ tkun utli, u m’hemm xejn ħażin li wieħed japprezza l-kwalità jew jixtri xi mudell ġdid tat-telefonija.

Iżda din l-istorja tqajjem mistoqsija aktar importanti li, għal xiex, li huwa ferm aħjar minn iPhone, għandna nistennew fil-kju? X’qed jistenna minna Sidna li nkunu minn ta’ quddiem u l-ewwel fil-kju?

It-tellieqa spiritwali

Alla li Jista’ Kollox ipprovdilna gwida f’kull aspett tal-ħajja, u s-suġġett imsemmi hawn fuq mhuwiex eskluż. “Kulħadd għandu għan li jiddominah. Aħna nistabbilixxu dan l-għan għalikom, mela, ikkompetu ma’ xulxin fit-tjieba u f’għemejjel tajba.” (2:149)

It-tellieqa li tissemma f’dan il-vers hija t-tellieqa spiritwali li għaliha l-fidil veru huwa msejjaħ mill-Mulej tiegħu. Il-kelma Għarbija użata fil-vers hija ‘Khair’, li tfisser għemejjel tajba li jmorru lil hinn mill-interess personali u jkunu marbuta mal-għan divin.

Barra minn hekk, dan il-vers ifisser li dawk li jemmnu għandhom jippruvaw jgħinu lil dawk li huma dgħajfa u jassistuhom biex jiksbu l-virtù. Huma m’għandhomx biss jistinkaw huma stess wara l-virtù, iżda għandhom ukoll jistiednu lil oħrajn biex jilħqu l-istess livell ta’ virtù li huma stess ikunu laħqu.

B’hekk, din it-tellieqa spiritwali ssir tellieqa tassew partikolari, fejn il-kompetituri mhux biss jikkompetu bejniethom, iżda wkoll iħarsu lejn sħabhom u jgħinu lil dawk li jistgħu jitfixklu fit-triq tagħhom jew ikunu mitlufa f’aspetti oħra.

Din it-tellieqa spiritwali tat-tjubija hija ferm aħjar minn kwalunkwe tellieqa tad-dinja, għaliex f’din it-tellieqa l-fidil jistinka b’tali mod li jħeġġeġ ukoll lil ħutu biex jikkompetu, u b’hekk jgħinu lil xulxin f’dan il-vjaġġ spiritwali ta’ ġustizzja, pjetà u tjieba.

Min-naħa l-oħra, fit-tellieqa materjalistika n-nies jippruvaw iwaqqgħu lil oħrajn, u jintużaw tant tattiċi li l-kompetituri tagħhom mhux biss jitilfu, iżda lanqas qatt ma jaslu f’pożizzjoni li jisfidawhom.

Xi jfisser verament li tkun għani?

Din it-tfittxija spiritwali tikxef karatteristika oħra tal-fidil veru, u dik hija “l-għana tal-qalb”. Aħna ngħixu f’soċjetà fejn il-ġid spiss jitkejjel minn perspettiva ta’ kemm xi ħadd jippossjedi affarijiet. Dar akbar, karozza aħjar, ħwejjeġ tad-ditta, vaganzi għaljin u l-aħħar Smartphone jistgħu kollha jsiru simboli ta’ suċċess u għana.

L-Iżlam joffrilna mod differenti kif inħarsu lejn il-ġid. Il-Profeta Muħammad, is-sliem għalih, għallem li, “Il-ġid ma jinsabx fl-abbundanza tal-ġid tad-dinja, iżda l-ġid veru jinsab fil-għana tar-ruħ u tal-qalb.”

Diskors wieħed jesprimi dan b’mod sabiħ: “L-għana jinsab fil-qalb u l-faqar jinsab fil-qalb. Kull min hu għani f’qalbu ma jiġrilux ħsara, jiġri x’jiġri fid-dinja. Kull min hu fqir f’qalbu qatt ma jkun sodisfatt, ikollu kemm ikollu.”

Din hija definizzjoni profonda tal-ġid u l-għana. Persuna jista’ jkollha ftit li xejn materjalment u madankollu jkollha qalb tad-deheb mimlija gratitudni, sagrifiċċju, ġenerożità lejn dawk fil-bżonn, kuntentizza u fidi. Persuna oħra jista’ jkollha ġid materjali enormi filwaqt li kontinwament tħoss li għandha bżonn aktar, u tkun nieqsa minn dispożizzjoni ta’ karità.

Il-problema mhux iPhone, imma l-post li jokkupa f’qalbna

Il-problema, għalhekk, mhijiex it-telefon. Il-mistoqsija hija x’post jokkupa t-telefon, jew kwalunkwe ġid materjali, f’qalbna. Il-kultura moderna tal-konsum kontinwament tgħidilna li l-hena tinsab biss xirja waħda ’l bogħod.

Iżda, il-Koran ifakkarna: “Kunu afu li l-ħajja f’din id-dinja ma hijiex għajr logħob, mogħdija ta’ żmien, tiżjin, ftaħir bejnietkom u tkattir tal-ġid u tal-ulied… Il-ħajja ta’ din id-dinja ma hijiex għajr tgawdija qarrieqa.” (57:21)

Dan il-vers ma jgħidx li s-sbuħija jew il-kumditajiet ta’ din id-dinja huma pprojbiti. Pjuttost, ifakkarna fin-natura temporanja tagħhom. “Dak kollu li jinsab fuq l-art għandu jgħaddi.”

  • It-telefon il-ġdid eventwalment isir telefon antik.
  • Il-karozza l-ġdida eventwalment issir karozza antika.
  • Il-ħwejjeġ tal-moda eventwalment jgħaddu mill-moda.
  • Dak kollu li għandna eventwalment inħalluh warajna.

Iż-Żewġ Ġonna

Iżda dawk li verament jemmnu f’Alla u jistinkaw għat-tjubija se jgħożżu l-barkiet eterni mingħand Sidhom kemm f’din id-dinja kif ukoll fil-ħajja ta’ wara, u se jkollhom “żewġ Ġonna”.

Dawk li jagħtu prijorità lit-tellieqa spiritwali, minflok lit-tellieqa materjalistika, se jiġu ppremjati bil-kbir. U x’premju jista’ jkun aħjar milli li wieħed jiġi ppremjat mis-Sid tiegħu kemm f’din il-ħajja kif ukoll fil-ħajja ta’ wara? Dan huwa verament li għalih għandna verament nistennew fil-kju.

Posted in Ahmadiyya, Ahmadiyya Malta, Article | Tagged , , , , , , , , , , , , , , | Leave a comment

Jalsa Salana Malta 2026

Posted on October 27, 2026 by Laiq Ahmed Atif

Ahmadiyya Muslim Jamaat Malta Successfully Holds its 8th Jalsa Salana

By the grace and blessings of Allah the Almighty, the Ahmadiyya Muslim Jamaat Malta successfully held its 8th Jalsa Salana (Annual Convention) on Sunday, 25 October 2025. The theme of this year’s Jalsa was: “اِنَّ الصَّلٰوۃَ تَنۡہٰی عَنِ الۡفَحۡشَآءِ وَالۡمُنۡکَرِ” —Verily, Prayer restrains one from indecency and manifest evil.

The Jalsa commenced with the recitation of the Holy Quran, followed by an Urdu poem. Thereafter, the special message of His Holiness, Hazrat Mirza Masroor Ahmad, Khalifatul Masih V (may Allah be his Helper), was read out. In his message, Huzoor-e-Anwar (may Allah be his Helper) reminded attendees of the purpose of Jalsa Salana, stating:

“We convene the Jalsa so that the fear of Allah may be instilled within us and so that we may become models for one another in Taqwa—righteousness—and so that we can advance in piety, tenderness of heart, mutual love and brotherhood.”

His Holiness further emphasised the importance of strengthening one’s relationship with Allah the Almighty through regular worship and spiritual discipline. He advised:

“You must be regular in offering our five daily prayers and strive to perform Tahajjud. You should continually invoke blessings upon the Holy Prophet Muhammad صلى الله عليه وسلم, seek forgiveness for your sins and frequently recite Istighfar. You must recall the favours of Allah the Almighty, express gratitude for them and praise Him. You should reflect on your love for the Holy Quran, recite it daily and also study its translation and commentary.”

Concluding his message, His Holiness prayed: “I pray may Allah bless your Jalsa Salana with great success and enable you to strengthen and reinforce your faith. May Allah bring about a genuine transformation in your lives towards more piety, virtuous behaviour and the service of Islam Ahmadiyyat and humanity. May Allah bless you all.”

The Jalsa programme featured seven speeches delivered in English and Urdu, three documentaries, a Question and Answer Session, and the presentation of Malta Jamaat’s annual activity report. The obligatory prayers were also offered during the programme.

The speeches covered a range of spiritual, moral, and religious subjects, including: Consider Service to the Faith a Grace from God; The Best Bargain: Sacrificing Wealth to Gain Paradise; The Holy Prophet’s (peace be on him) Zeal for Preaching; Ahmadiyyat’s Spiritual Revolution and Our Responsibilities; Islamic Teachings on Avoiding Suspicion, Curiosity, Gossip, and Backbiting; Scientific Proofs of the Existence of God; and Salat: A Spiritual Remedy against Indecency and Evil.

The Jalsa concluded with a silent prayer, followed by poems presented by children and a traditional lunch, providing an opportunity for members to strengthen their bonds of brotherhood and fellowship. May Allah the Almighty enable us to become true Ahmadi Muslims in letter and spirit, remain punctual in offering our daily prayers, become recipients of His forgiveness, mercy, grace, and blessings, and remain wholly faithful and obedient to our Lord. Ameen.

Posted in Ahmadiyya, Ahmadiyya Malta, Jalsa Salana, Jalsa Salana Malta | Tagged , , , , , , , , , , , , , , , , | Leave a comment

How Patience and Gratitude Can Change Our Lives

Posted on October 25, 2026 by Laiq Ahmed Atif

Image: Andrei Askirka/Shutterstock.com

Kif il-Paċenzja u l-Gratitudni jistgħu jbiddlulna Ħajjitna

It-Torċa, 25.10.2026 | Imam Laiq Ahmed Atif — amjmalta@gmail.com

Ir-reliġjon hija mezz ta’ bidla u titjib kemm għall-individwi kif ukoll għas-soċjetajiet. Ir-reliġjon tgħallem lill-bniedem kif jibni rabta qawwija mal-Ħallieq u mal-ħolqien Tiegħu, u kif inaddaf lilu nnifsu minn kull ħażen u vizzju.

Ir-reliġjon tippreżenta regoli, prinċipji, virtujiet, valuri u gwida li jgħinu biex jinħolqu individwi u soċjetajiet ta’ valur, rispett u qalb tajba lejn xulxin. Ir-reliġjon tiftaħ it-triq għal bidla speċjali fil-bniedem, tant li jista’ jikseb il-Ġenna sa minn din il-ħajja stess.

Kull tagħlim tar-reliġjon huwa lezzjoni ta’ valur li fiha għerf u raġuni kbira, u għalhekk qatt m’għandna ninjorawh. Fost dawn il-virtujiet prezzjużi hemm il-paċenzja u l-gratitudni. Il-Qaddis Profeta Muħammad, is-sliem għalih, qal li l-fidi tinqasam f’żewġ partijiet importanti: il-paċenzja u l-gratitudni. Fil-fatt, il-paċenzja twassal għall-gratitudni. Għalhekk, essenzjalment, il-fidi kollha hija marbuta mal-gratitudni. Imma tqum il-mistoqsija: kif nistgħu niżviluppaw il-gratitudni f’ħajjitna?

Kif niżviluppaw il-gratitudni fil-ħajja?

Il-Qaddis Profeta Muħammad, is-sliem għalih, ta tweġiba sabiħa, sempliċi iżda profonda għal din il-mistoqsija. Huwa qal li jekk persuna jkollha dawn iż-żewġ kwalitajiet, Alla jqisha bħala persuna paċenzjuża u grata.

L-ewwel kwalità hija li, f’dak li għandu x’jaqsam mal-fidi, wieħed iħares lejn dawk li huma aħjar minnu fil-fidi. It-tieni kwalità hija li, f’dak li għandu x’jaqsam mal-affarijiet tad-dinja, wieħed iħares lejn dawk li għandhom inqas minnu u li jinsabu f’kundizzjoni aktar diffiċli. B’hekk wieħed jirringrazzja u jfaħħar lil Alla għal dak kollu li tah.

Kemm hu sabiħ kif il-Profeta Muħammad spjega din ir-realtà! Dan il-prinċipju japplika f’kull żmien, iżda huwa partikolarment importanti fiż-żmien li ngħixu fih.

Illum, il-materjaliżmu, il-kilba għall-flus, ir-regħba, ix-xewqat eċċessivi, l-għira, ix-xewqa li nuru lill-oħrajn dak li għandna, ix-xewqa għall-validazzjoni, u t-tellieqa biex dejjem ikollna aktar saru komuni ħafna.

Għalhekk, dan il-prinċipju huwa ta’ valur kbir. Fil-fatt, huwa rimedju għall-għatx li qatt ma jintemm għall-ġid u l-flus, għall-attitudni ta’ nuqqas ta’ gratitudni, il-kilba għall-flus, u għat-tellieqa bla tmiem biex nakkwistaw aktar u aktar affarijiet materjali.

Storja li tqanqal il-qalb

Dan ifakkarni fi storja dwar persuna li ma kellhiex żraben x’tilbes. Din il-persuna kienet tibqa’ tilmenta ma’ Alla għax ma kellhiex par żraben.

Darba, kellha toħroġ għal xi ħaġa u marret ħafja, jiġifieri mingħajr żraben. Hija baqgħet tilmenta u tgerger, u qalet lil Alla li ma kienx taha l-barkiet u l-favuri Tiegħu.

Waqt li kienet miexja, f’daqqa waħda rat raġel li kellu ż-żewġ saqajn maqtugħin u li lanqas biss seta’ jimxi. Dan ir-raġel kien qed jitkaxkar mal-art.

Meta l-persuna rat dan, qalet: “Jien m’għandix żraben, imma għandi saqajn li bihom nista’ nimxi. Jien qiegħda f’kundizzjoni ħafna aħjar minn dan il-bniedem umli. Għaliex kont qed nilmenta ma’ Alla dwar is-sitwazzjoni tiegħi?”

Imbagħad niżlet għarkupptejha quddiem Alla u talbet il-maħfra Tiegħu talli kienet qed tilmenta dwar iċ-ċirkustanzi tagħha, u wiegħdet li minn issa ’l quddiem dejjem se tibqa’ grata lejn Sidha.

Din l-istorja turina li, jekk irridu nilmentaw, għandna ħafna affarijiet li nistgħu nilmentaw dwarhom. Imma jekk aħna verament nemmnu f’Alla, għandna eluf ta’ raġunijiet biex inkunu grati.

Kollox jiddependi fuq kif inħarsu lejn il-ħajja u kif nevalwaw l-affarijiet. Huwa bħal meta nħarsu lejn tazza, narawha nofsha vojta jew nofsha mimlija? Jiddependi minn liema perspettiva u minn liema “lenti” nħarsu lejn il-barkiet li Alla, Sidna, tana.

Jekk persuna tingħata…

Kemm kellu raġun il-Profeta Muħammad meta qal li jekk persuna tingħata dawn l-erba’ kwalitajiet, ikun bħallikieku ngħatat il-ġid kemm f’din id-dinja kif ukoll fil-Ħajja ta’ Wara: qalb grata; ilsien li jiftakar f’Alla; ġisem li jissaporti d-diffikultajiet bil-paċenzja; mara tajba u onesta.

Li jkollok saħħa u familja b’saħħitha, paċifika u fidila hija tassew barka kbira. Din hija xi ħaġa li ma tistax tinkiseb sempliċement permezz tal-ġid u l-mezzi tad-dinja.

Mhux din waħedha biżżejjed biex persuna tibqa’ grata lejn Sidha?

Iżda, jekk jiġu xi tbatijiet jew diffikultajiet, wieħed għandu juri paċenzja u reżistenza, u jevita li jilmenta jew jiddubita minn Sidna.

Alla huwa mal-paċenzjużi

Darba, il-Profeta Muħammad qal li l-fidi ma ġġib xejn ħlief ġid għal min jemmen. Jekk persuna li temmen tesperjenza xi ħaġa tajba, hija tkun grata, u dan ikun ta’ ġid għaliha. Iżda jekk tesperjenza xi diffikultà, il-persuna li temmen turi paċenzja, u dan ukoll ikun ta’ ġid għaliha. Għax Alla jgħid: “Żgur li Alla huwa ma’ dawk li jistabru.” U jgħid ukoll: “Agħti l-bxara t-tajba lill-paċenzjużi.”

Għalhekk, x’jista’ jkun hemm ġid akbar milli Alla nnifsu jagħtik aħbar tajba? Dan kollu jista’ jintlaħaq meta persuna tagħmel ħilitha biex issir qaddejja tassew paċenzjuża u grata lejn Alla.

Posted in Ahmadiyya, Ahmadiyya Malta, Article | Leave a comment

Purity and Goodness in Youth

Posted on October 18, 2026 by Laiq Ahmed Atif

Image: Zurijeta/Shutterstock.com

IS-SAFA U T-TJIEBA FIŻ-ŻGĦOŻIJA

It-Torċa, 18.10.2026 | Imam Laiq Ahmed Atif — amjmalta@gmail.com

“In-nazzjonijiet ma jistgħux jimxu ’l quddiem mingħajr ir-riformazzjoni taż-żgħażagħ.” Dan huwa l-kliem tad-deheb tat-Tieni Kalif tal-Komunità Ahmadiyya Musulmana, li jistabbilixxi tassew l-istandard li kull nazzjon għandu jimmira għalih biex iżomm postu b’dinjità fil-komunità internazzjonali.

Sabiex nifhmu l-livell morali, soċjali u spiritwali ta’ nazzjon, irridu nħarsu lejn iż-żgħażagħ tiegħu. Bl-istess mod, jekk irridu nħarsu ’l quddiem u nagħrfu x’jista’ jkun il-futur ta’ nazzjon, irridu nħarsu lejn iż-żgħażagħ tiegħu.

Mingħajr dubju, iż-żgħażagħ huma s-sinsla ta’ kull nazzjon. Jekk ikunu edukati sew, ta’ manjieri tajbin, bi mġiba xierqa, u jgawdu minn livell għoli ta’ għarfien u responsabbiltà soċjali, allura l-futur tan-nazzjon ikun f’idejn siguri.

Tassew, huma ż-żgħażagħ tal-lum li se jsawru s-soċjetà u jmexxu n-nazzjon ta’ għada; iż-żgħażagħ tal-lum huma l-mexxejja ta’ għada.

Ninvestu fil-formazzjoni taż-żgħażagħ tagħna

Għalhekk, jekk verament nixtiequ li naraw pajjiżna quddiem nett fil-komunità dinjija u, jekk nixtiequ nibnu futur ġust u mimli kompassjoni, jeħtieġ li nippjanaw b’għaqal u ninvestu fil-formazzjoni taż-żgħażagħ tagħna, filwaqt li nrawmu fihom valuri morali sodi.

L-iżvilupp etiku, edukattiv u spiritwali tagħhom se jsawwar is-soċjetà ta’ għada. Żgħażagħ iggwidati tajjeb iwasslu għal familji aktar paċifiċi, komunitajiet aktar b’saħħithom u nazzjon aktar kuntent u san.

Kemm huwa importanti dan is-suġġett taż-żgħażagħ. Dawn l-aħħar ġranet żort xi istituti edukattivi f’pajjiżina matul il-fresher’s week u ppruvajt nifhem u nosserva mill-qrib kemm hu importanti li ninvestu kull mezz possibbli fit-tiswir, it-trobbija u r-riforma taż-żgħażagħ tagħna.

Iż-żmien taż-żgħożija

Għalhekk, iż-żmien għandu jiġi apprezzat u użat b’għaqal. Dak li jgħodd mhuwiex biss x’jagħmel il-bniedem, iżda wkoll meta, fejn u għaliex jagħmlu. Huwa minnu li l-għemejjel fi żmien xieraq għandhom impatt ferm akbar. Is-safa u l-pjetà fiż-żgħożija huma verament virtujiet mill-isbaħ, għalhekk, iż-żgħażagħ għandhom jgħixu ħajja tat-tjieba u l-ġustizzja.

Pereżempju, meta persuna jkollha s-setgħa li tirredikola, tinsulta jew tumilja lil ħaddieħor mingħajr ma tibża’ mill-konsegwenzi, iżda tagħżel li tittrattah b’dinjità u rispett, tkun qed turi karattru morali ġenwin. Ir-rispett għandu l-akbar tifsira meta persuna jkollha l-possibbiltà li ma tagħtihx, iżda konxjament tagħżel li tagħtih.

Ir-reliġjon u l-emozzjonijiet u x-xewqat tal-bniedem

L-għan tar-reliġjon mhuwiex li telimina l-emozzjonijiet u x-xewqat tal-bniedem, iżda li tgħallem id-dixxiplina u mod xieraq tal-użu tagħhom. Ix-xewqat naturali mhumiex naturalment ħżiena; huwa l-użu ħażin tagħhom jew in-nuqqas ta’ kontroll fuqhom li jista’ jwassal lil persuna ’l bogħod mill-kondotta morali. Kif jispjega t-Tieni Kalif tal-Komunità Ahmadiyya Musulmana:

“Nemmen fl-Iżlam għax dan ma jippruvax li jkisser ix-xewqat naturali tiegħi, iżda jiggwidahom fid-direzzjoni t-tajba. Aktar minn hekk, ma jgħaffiġx kompletament ix-xewqat tiegħi u b’hekk ibiddilni f’ġebla; u lanqas ma jħallihom mingħajr kontroll u trażżin u b’hekk ibiddilni f’annimal. Iżda, bħal espert tal-irrigazzjoni li jħażżem l-ilmijiet u jiddireġihom fil-kanali tal-irrigazzjoni, b’hekk, ibiddel art niexfa f’waħda fertili, l-Iżlam jibdel b’kontroll u gwida xierqa x-xewqat naturali tiegħi fi kwalitajiet u prinċipji morali għolja.”

“L-Iżlam ma jgħidlix: Alla tak qalb li taf tħobb iżda mbagħad jipprojbilek tagħżel sieħeb jew sieħba tal-ħajja, jew li Hu tak is-sens tat-togħma u l-kapaċità li tapprezza ikel tajjeb, iżda mbagħad jipprojbik milli tiekol dan l-ikel. Bil-kontra, jgħallimni nħobb b’qalbi u bis-sewwa biex it-twettiq tar-riżoluzzjonijiet tajba tiegħi jiġu mħarsa permezz ta’ wliedi. Jippermettini niekol ikel tajjeb, iżda fil-limiti xierqa, sabiex ma nikolx sa ma nixba’ filwaqt li l-proxxmu tiegħi jibqa’ bil-ġuħ. B’dan il-mod, bit-trasformazzjoni tax-xewqat naturali tiegħi fi kwalitajiet morali għolja, l-Iżlam jissodisfa l-umanità tiegħi.”

Il-bilanċ sabiħ li r-reliġjon tistabbilixxi

Dan juri b’mod sabiħ il-bilanċ li r-reliġjon tfittex li tistabbilixxi. Ix-xewqat tal-bniedem m’għandhomx għalfejn jinqerdu; jeħtieġ li jiġu ggwidati. L-emozzjonijiet m’għandhomx għalfejn jiġu miċħuda; jeħtieġ li jiġu espressi fil-limiti morali xierqa. Il-pjaċir m’għandux għalfejn jiġi abbandunat; jeħtieġ li jiġi mfittex b’mod responsabbli u fil-limiti preskritti mill-fidi.

Għalhekk, it-test veru tal-karattru mhuwiex jekk persuna tastjenix mill-għemil ħażin meta ma jkollhiex l-opportunità jew il-kapaċità li twettqu. It-test akbar huwa jekk tkunx kapaċi teżerċita l-kontroll fuqha nnifisha meta t-tentazzjoni tkun qawwija, jekk tkunx kapaċi tibqa’ umli meta jkollha s-setgħa, jekk tkunx kapaċi turi mogħdrija meta jkollha l-ħila tagħmel il-ħsara, u jekk tkunx kapaċi tagħżel il-ġustizzja meta toroq oħra jkunu miftuħa quddiemha.

Nagħmlu l-aħjar użu taż-żgħożija

Għalhekk, mhuwiex biss importanti, iżda tassew kruċjali li ż-żgħażagħ tagħna jagħmlu l-aħjar użu taż-żgħożija tagħhom u jiddedikaw l-enerġija u l-kapaċitajiet mogħtija lilhom għat-tfittxija tal-eċċellenza fil-pjetà, fil-purità, fis-safa, fit-tjubija u fil-virtù.

Tabilħaqq, it-tiġdid u l-progress ta’ kull nazzjon jiddependu, sa ċertu punt kbir, mit-tiġdid u mill-iżvilupp morali taż-żgħażagħ tiegħu.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , , | Leave a comment

The Veil: Modesty, Dignity and Freedom

Posted on October 16, 2026 by Laiq Ahmed Atif

Image: Sofirinaja/Shutterstock.com

Il-Velu: Modestja, Dinjità u Libertà

In-Nazzjon, 16.10.2026 | Imam Laiq Ahmed Atif — amjmalta@gmail.com

F’dinja sekulari, ir-reliġjon, it-tradizzjonijiet reliġjużi u l-prattiki reliġjużi spiss jiġu kkritikati jew attakkati. Xi drabi naraw oppożizzjoni għall-bini tal-minareti fil-moskej, xi drabi għall-velu u l-ħiġab, u xi drabi anke għall-użu tal-kelma “Allah”, u l-lista tkompli.

Dan ġara, pereżempju, fil-Malasja fl-2010, meta xi Musulmani Malasjani argumentaw li “Allah” hija kelma reliġjuża li għandha tintuża biss mill-Musulmani. Għalhekk, huma qalu li l-Kattoliċi Rumani m’għandhomx jitħallew jużaw din il-kelma.

Fl-opinjoni tiegħi, it-tifsira vera tas-sekulariżmu hija li kull ċittadin għandu jħossu liberu u komdu li jkollu l-opinjonijiet u l-fidi tiegħu, jipprattikahom b’libertà sħiħa, u jaqsamhom ma’ oħrajn mingħajr biża’ jew pressjoni.

Il-fidi u r-reliġjon huma kwistjonijiet personali għal kull individwu. L-Istat jew il-Gvern m’għandux jindaħal fi kwistjonijiet ta’ fidi, bl-istess mod li r-reliġjon m’għandhiex tindaħal fit-tmexxija tal-Istat. Madankollu, kemm l-Istat kif ukoll ir-reliġjon huma pilastri importanti tas-soċjetà. Għalhekk, jistgħu jitkellmu ma’ xulxin, jaqsmu l-ideat, jitgħallmu minn xulxin u jiksbu għerf dwar kwistjonijiet nazzjonali u tal-komunità.

Id-djalogu, id-diskussjoni u l-fehim ta’ xulxin huma valuri importanti u għandhom dejjem jiġu rispettati. Madankollu, fid-dinja kumplessa li ngħixu fiha, minn żmien għal żmien naraw li dawn il-prinċipji ma jiġux rispettati.

Riċentement, il-Portugall daħħal liġi ġdida li tipprojbixxi lbies li huwa ddisinjat biex jaħbi l-wiċċ jew jipprevjeni l-identifikazzjoni ta’ persuna fi spazji pubbliċi. Hemm xi eċċezzjonijiet għal raġunijiet ta’ saħħa, xogħol, arti u temp, kif ukoll għal postijiet ta’ qima u ċirkostanzi oħra speċifikati.

Issa, il-Prim Ministru Taljan ħabbret ukoll projbizzjoni tal-burqa u n-niqab fl-iskejjel.

Sfortunatament, xi drabi kwistjonijiet bħal dawn jitqajmu biex jinkiseb vantaġġ politiku. Dan jidher ukoll fid-dikjarazzjoni tal-Prim Ministru Taljan. Dwar dan, AFP News qalet li: “L-Italja hija pajjiż fuq quddiem fil-kwistjoni tal-migrazzjoni, u l-integrazzjoni hija kwistjoni ewlenija fil-kampanja qabel elezzjoni ġenerali s-sena d-dieħla.”

Din l-analiżi tqajjem mistoqsijiet serji dwar jekk kunsiderazzjonijiet politiċi humiex qed jinfluwenzaw id-diskussjoni dwar il-prattiki reliġjużi.

Il-velu Iżlamiku

Fir-rigward tal-velu Iżlamiku, dan huwa kmandament divin li għandu l-għan li jħares id-dinjità, l-unur u l-protezzjoni tan-nisa.

Skont it-tagħlim Iżlamiku, dan mhuwiex kwistjoni ta’ inugwaljanza jew oppressjoni tan-nisa. Dan il-kmandament japplika kemm għall-irġiel kif ukoll għan-nisa. Għalhekk, il-Koran Imqaddes l-ewwel jagħti l-istruzzjoni lill-irġiel u mbagħad lin-nisa biex josservaw il-modestja.

Id-differenza fil-mod kif dawn l-istruzzjonijiet jiġu osservati hija marbuta, skont it-tagħlim Iżlamiku, mad-dmirijiet u r-rwoli differenti li jingħataw lill-irġiel u lin-nisa.

Attitudnijiet estremi dwar il-velu

Huwa fatt li, dwar il-velu jew il-ħiġab, insibu żewġ opinjonijiet estremi. Xi wħud jipprattikawh b’mod estrem, tant li n-nisa jiġu mċaħħda anke minn drittijiet bażiċi. Oħrajn, min-naħa l-oħra, iridu li l-velu jitneħħa għalkollox.

Il-Fundatur tal-Komunità Ahmadiyya Musulmana jgħid f’dan ir-rigward li: “In-nies adottaw attitudnijiet estremi rigward il-velu. L-Ewropa marret fl-estrem meta abolixxiet kompletament il-velu. Min-naħa l-oħra, xi Musulmani jmorru fl-estrem l-ieħor u lanqas iħallu lin-nisa tagħhom joħorġu minn djarhom, għalkemm ħafna drabi huwa neċessarju li dawn jivvjaġġaw jew joħorġu biex jaqdu l-bżonnijiet tagħhom. Aħna nemmnu li dawn iż-żewġ sitwazzjonijiet huma t-tnejn żbaljati.”

Lil hinn mill-politika tal-velu

Id-diskussjoni dwar il-velu Iżlamiku għandha għalhekk tmur lil hinn mis-sempliċi idea li jekk mara tgħatti lilha nnifisha dan bilfors ifisser li qed tiġi oppressa, jew li jekk tneħħi l-velu dan bilfors ifisser li qed tikseb il-libertà. Dawn iż-żewġ ideat jistgħu jinjoraw it-twemmin personali tal-mara, l-intenzjonijiet tagħha u d-dritt tagħha li tagħżel hi stess.

Il-prinċipju ewlieni għandu jkun li n-nisa jiġu trattati b’dinjità u rispett, kemm jekk jagħżlu li jilbsu b’mod modest u jgħattu lilhom infushom, kif ukoll jekk ma jagħmlux dan. Fl-istess ħin, il-komunitajiet reliġjużi għandhom jiżguraw li t-tagħlim reliġjuż jinftiehem u jiġi pprattikat b’għerf u moderazzjoni, filwaqt li jinżamm l-ispirtu veru tiegħu.

Il-kunċett Iżlamiku tal-modestja mhuwiex maħsub biex inaqqas il-valur tan-nisa jew jillimitahom. Meta jinftiehem sew, huwa ppreżentat bħala mezz ta’ dinjità, self-respect, moralità u tjieba. Għalhekk, id-diskussjoni m’għandhiex tkun biss dwar biċċa lbies, iżda dwar il-valuri, l-intenzjonijiet u l-libertà li hemm warajha.

Nipproteġu lilna nfusna milli niżbaljaw

Nixtieq nagħlaq b’żewġ siltiet mill-kitbiet tal-Fundatur tal-Komunità Ahmadiyya Musulmana, li jispjega l-filosofija wara dan il-kmandament divin. Huwa jgħid:

Is-sistema Iżlamika tal-velu bl-ebda mod ma titlob li n-nisa jinżammu maqfula bħal f’ħabs. Dak li jgħid il-Koran Imqaddes huwa li n-nisa għandhom jevitaw li juru s-sbuħija tagħhom u m’għandhomx iħarsu lejn irġiel li mhumiex qraba tagħhom. Dawk in-nisa li jkollhom joħorġu biex iwettqu r-responsabbiltajiet tagħhom jistgħu jagħmlu dan, iżda għandhom jipproteġu lilhom infushom u jikkontrollaw il-ħarsa tagħhom.

It-twissija fl-Iżlam li kemm l-irġiel kif ukoll in-nisa għandhom irażżnu lilhom infushom f’ċerti affarijiet għandha l-għan li tipproteġihom milli jiżbaljaw; il-għaliex għall-bidu l-bnedmin jinġibdu lejn il-vizzji, u mal-inqas provokazzjoni, jaqgħu bħalma persuna mġewħa taqa’ hekk kif tilmaħ l-ikel bnin. Huwa d-dmir ta’ kulħadd li jipproteġi lilu nnifsu.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , , , , , , , , , , , , , | Leave a comment

Programme Jalsa Salana Malta 2026

Posted on October 15, 2026 by Laiq Ahmed Atif

Programme Jalsa Salana Malta 2026Download
Posted in Ahmadiyya Malta, Jalsa Salana, Jalsa Salana Malta | Tagged , , , | Leave a comment

Gratitude: A Blessing and a great Remedy against Pride

Posted on October 14, 2026 by Laiq Ahmed Atif

Image: Maria Marganingsih/Shutterstock.com

Il-Gratitudni: Barka u Rimedju mill-aqwa kontra l-Kburija

Il-Leħen, 11.10.2026 | Imam Laiq Ahmed Atif — amjmalta@gmail.com

Jekk naħsbu ftit fuq l-univers u fuq il-ħolqien tal-bniedem, insibu li qabel ma Alla ħalaq lill-bniedem, Huwa kien diġà ħalaq għadd kbir ta’ barkiet u affarijiet li l-bniedem kellu bżonn.

Wieħed mill-attributi ta’ Alla li jissemma fil-Koran Imqaddes huwa Ar-Rahman, jiġifieri Dak li juri ħniena kbira u abbundanti. Il-ħniena ta’ Alla tingħata lill-ħolqien kollu, u din il-ħniena mhijiex biss għal dawk li jemmnu, iżda għal dawk kollha li Alla ħalaq.

Dak kollu li għandna bżonn u li fuqu tiddependi ħajjitna huwa rigal u favur minn Alla. Huwa jipprovdilna dawn il-barkiet qabel ma nkunu għamilna xi ħaġa biex ħaqqniehom, anzi saħansitra qabel ma nitwieldu u mingħajr ma nitolbuhom.

Din il-ħniena u l-grazzja ta’ Alla żgur li għandhom iwassluna biex inkunu grati lejh. Fil-fatt, dan kien ukoll it-tagħlim tal-profeti kollha ta’ Alla lill-popli tagħhom, li jkunu qaddejja grati lejn il-Mulej tagħhom.

Il-gratitudni hija wkoll waħda mill-ewwel valuri u drawwiet tajbin li nitgħallmu fid-dar u fl-iskola. Sa minn meta nkunu żgħar, nitgħallmu ngħidu “grazzi” meta xi ħadd jagħmlilna xi ħaġa tajba. Għalhekk, li nkunu grati lejn Alla u lejn nies oħra huwa importanti ħafna u juri x’tip ta’ nies aħna, u juri l-karattru tagħna.

Il-gratitudni twassal għall-barka

Meta nkunu grati, inkunu qed niftħu l-bibien għal aktar barkiet, ħniena u grazzja minn Alla l-Imbierek. Fil-Koran Imqaddes, Alla jgħid li, “Jekk tkunu grati, jekk tiżżu ħajr (ta’ kulma għamilt magħkom, u tajtkom), tabilħaqq inżidkom fil-barkiet, u żgur li nagħtikom aktar favuri.” (14:8)

Il-Qaddis Profeta Muħammad, is-sliem għalih, għex skont dan it-tagħlim b’mod eżemplari. Huwa kien jitlob lil Alla b’ħafna devozzjoni. Darba ġie mistoqsi għaliex kien jitlob daqshekk, meta Alla kien diġà wiegħdu s-suċċess u r-rebħa. Huwa wieġeb, “M’għandix inkun qaddej grat lejn il-Mulej tiegħi?”

Dan jgħallimna wkoll li aktar ma jkollna barkiet, aktar għandna nkunu grati. Il-gratitudni tgħinna wkoll nipproteġu lilna nfusna mill-kburija u mill-arroganza. Meta persuna tara kull suċċess, kull ħaġa tajba u kull barka bħala rigal mingħand Alla l-Ħanin, u tibqa’ grata lejh, hija tkun protetta mill-kburija, mill-arroganza, mill-ftaħir u milli turi ruħha aħjar minn ħaddieħor.

Iż-żerriegħa tal-kburija u tal-arroganza

Imma jekk persuna taħseb li s-suċċess tagħha ġej biss mill-kapaċità, mix-xogħol iebes u mill-intelliġenza tagħha stess, tkun qed tħawwel iż-żerriegħa tal-kburija u tal-arroganza f’qalbha. Din iż-żerriegħa tista’ tikber u ssir bħal siġra kbira, sakemm twassal lill-persuna titbiegħed mit-triq it-tajba u ssegwi t-triq tax-Xitan.

F’dak il-mument, il-persuna tibda taħseb li l-ġid u l-poter tagħha huma s-saħħa tagħha stess. Tista’ tibda temmen li l-flus u l-poter tagħha jistgħu jipproteġuha minn kull diffikultà u problema, u li bil-ġid u bl-influwenza tagħha tista’ tixtri kollox. Imma dan huwa nuqqas ta’ għerf u ta’ fehim.

Jekk persuna tuża l-ġid u l-poter tagħha waqt li tiftakar li dawn huma barkiet minn Alla, u tibqa’ grata għalihom, Alla jkompli jkabbar dawn il-barkiet u jżommha wkoll fit-triq it-tajba.

Għaliex xi nies ikollhom xi problema?

Kuljum naraw eżempji ta’ nies li, minħabba l-ġid u l-poter tagħhom, isiru aktar u aktar kburin, u fl-aħħar jispiċċaw jiffaċċjaw xi problema jew diffikultà. Għaliex jiġri dan?

Dan jiġri għax, minflok jibqgħu grati, jibdew jiddependu fuq il-ġid u l-poter tagħhom. Minn dan titwieled l-arroganza, u l-arroganza hija l-għerq ta’ ħafna ħażen.

Għalhekk, għandna dejjem nagħmlu l-gratitudni waħda mill-aktar kwalitajiet importanti f’ħajjitna. Għandna nirringrazzjaw lil Alla għall-barkiet kollha Tiegħu, nużawhom b’mod tajjeb u qatt ma nħallu l-ġid, is-suċċess jew il-poter jagħmluna kburin jew arroganti.

Posted in Ahmadiyya, Article | Tagged , , , , , , , , , , , , , , , , , , , , | Leave a comment

Man’s Journey towards Spiritual Perfection

Posted on October 11, 2026 by Laiq Ahmed Atif

Image: XanderSt/Shutterstock.com

IL-VJAĠĠ TAL-BNIEDEM LEJN IL-PERFEZZJONI SPIRITWALI

It-Torċa, 11.10.2026 | Imam Laiq Ahmed Atif — amjmalta@gmail.com

Alla l-Ħanin ħalaq lill-bniedem għall-qima Tiegħu. Il-qima ma tfissirx biss qima esterna u formali; iżda tfisser li l-bniedem għandu jagħmel ħiltu biex isir qaddej veru ta’ Alla l-Ħanin, jagħmel ħiltu biex jadotta l-attributi ta’ Alla l-Qaddis, u jagħmel ħiltu biex isir riflessjoni tal-kwalitajiet tal-Mulej.

Alla huwa Grazzjuż, Ħanin, Ġeneruż, Nobbli, Dak li Jagħti, Qaddis, Sors tal-Paċi, Dak li Jaħfer, Dak li Jipprovdi, Dak li juri kompassjoni, u ħafna iktar. Alla l-Ħanin jixtieq li l-bniedem ukoll jagħmel dawn il-kwalitajiet parti minn ħajtu u jsir qaddej li jagħmel ħiltu biex ikun eżempju perfett tal-attributi ta’ Alla l-Ħanin fuq l-art.

Imma persuna tilħaq f’daqqa u f’mument wieħed dan l-istat tal-qaddej veru, jew dan jeħtieġ sforz kontinwu u dixxiplina spiritwali għal żmien twil? Bla dubju, bħalma kull xogħol jeħtieġ iż-żmien tiegħu b’mod naturali, bl-istess mod, iż-żmien, l-isforz, it-taqbida, it-talb u l-perseveranza huma wkoll meħtieġa biex wieħed jgħaddi mill-istadji spiritwali.

Pereżempju, tifel jitwieled f’ġurnata waħda? Le. Għall-kuntrarju, disa’ xhur wara l-konċepiment, wara li jgħaddi minn diversi stadji u jgħaddi minn fażijiet differenti ta’ żvilupp, jiġi fid-dinja bħala tifel. It-twelid fiżiku tiegħu jibda minn qatra ta’ fluwidu. Il-Koran Imqaddes jiddeskrivi dan is-suġġett b’dan il-mod:

“Aħna tabilħaqq ħlaqna lill-bniedem minn sustanza tat-tajn, imbagħad poġġejnieh bħala qatra ta’ sperma f’post sigur (il-ġuf), imbagħad iffurmajna l-isperma demm magħqud, u mid-demm magħqud għamilna biċċa laħam, mill-biċċa laħam għamilna għadam, u ksejna l-għadam b’laħam, imbagħad żviluppajnieh f’ħolqien ieħor. Ikun imbierek Alla, l-aqwa fost il-ħallieqa.” (Il-Koran, 23:13-15)

Bniedem ma jsirx qaddis f’lejl wieħed

Dawn il-versi juru li t-twelid fiżiku tal-bniedem jitlesta wara li jgħaddi minn diversi stadji ta’ żvilupp. L-istess jgħodd għall-ħajja spiritwali tal-bniedem. Bniedem ma jsirx qaddis f’lejl wieħed, iżda, wara li jgħaddi minn vjaġġ twil u javvanza mill-istadji tal-iżvilupp spiritwali, jasal għall-istadji ogħla tat-tjieba u tal-pjetà.

Il-Koran Imqaddes iddeskriva l-istati fiżiċi, morali u spiritwali tal-bniedem bħala tliet kundizzjonijiet differenti. Għal dawn it-tliet kundizzjonijiet, il-Koran Imqaddes stabbilixxa tliet oriġini, jew sorsi, separati minn fejn joħorġu dawn il-kundizzjonijiet rispettivi.

It-tliet sorsi jew għejun:

Il-Fundatur tal-Komunità Ahmadiyya Musulmana spjega dan is-suġġett b’mod profond u importanti ħafna, u spjega t-tliet sorsi jew għejun.

(1) Ir-ruħ li titħeġġeġ għall-ħażen

L-ewwel għajn, li hija s-sors tal-istati naturali kollha, hija msejħa mill-Koran Imqaddes Nafse Ammarah, li tfisser il-jien li jħeġġeġ għall-ħażen, kif jgħid: “Ir-ruħ tassew tħeġġeġ (lill-bniedem) għall-ħażen.” (12:54)

Dan ifisser li hija karatteristika tal-bniedem li jitħeġġeġ għall-ħażen u jkun kontra li jilħaq il-perfezzjoni u stat morali tajjeb, u jitħeġġeġ lejn modi mhux mixtieqa u ħżiena. Għalhekk, l-inklinazzjoni lejn il-ħażen u l-eċċess hija stat uman li jiddomina l-moħħ ta’ persuna qabel ma tidħol fl-istat morali.

(2) Ir-ruħ li tikkritika u ċċanfar

It-tieni sors, li huwa s-sors tal-istat morali tal-bniedem, huwa msejjaħ mill-Koran Imqaddes Nafse Lawwamah, kif jingħad: “Tabilħaqq naħlef bir-ruħ li ċċanfar (lilha nnifisha u tindem).” (75:3)  

Jiġifieri, il-bniedem jasal sal-punt fejn jevalwa, iċanfar u jikkritika l-vizzji u l-eċċessi, u jħeġġeġ lilu nnifsu biex jikkontrolla x-xewqat u l-emozzjonijiet tiegħu permezz tar-raġuni. B’hekk, il-bniedem jitbiegħed mill-imġiba tal-annimali, jgħix b’mod morali u jsir denju ta’ ġieħ quddiem Alla.

Iżda, xorta waħda mhuwiex kompletament effettiv fil-prattika tal-virtù u xi kultant jiġi ddominat mill-emozzjonijiet naturali, meta jitfixkel u jaqa’. Huwa bħal tifel dgħajjef li ma jixtieqx jitfixkel u jaqa’, iżda jagħmel hekk minħabba d-dgħufija tiegħu, u mbagħad iħoss rimors minħabba d-dgħufija tiegħu. Fil-qosor, dan huwa l-istat morali tal-bniedem meta jfittex li jinkludi fih kwalitajiet morali għoljin u jħoss stmerrija lejn id-diżubbidjenza, iżda ma jistax jikseb suċċess sħiħ.

(3) Ir-ruħ li tinsab fil-paċi u fis-sliem

It-tielet sors, li għandu jiġi deskritt bħala l-bidu tal-istat spiritwali tal-bniedem, jissejjaħ mill-Koran Imqaddes Nafse Mutmainnah, jiġifieri, ir-ruħ li tinsab fil-paċi u l-mistrieħ, kif jingħad: “O ruħ li tinsab fil-paċi u fis-sliem, li sibt il-kumdità f’Alla, erġa’ lura lejn Sidek, int kuntenta bih u Hu kuntent bik. Idħol fost il-qaddejja magħżula Tiegħi, u idħol fil-Ġenna Tiegħi.” (89:28-31)

Dan huwa l-istadju meta r-ruħ ta’ persuna, wara li tinħeles mid-dgħufijiet kollha, timtela b’qawwiet spiritwali u tistabbilixxi relazzjoni ma’ Alla l-Ħanin, li mingħajr l-għajnuna Tiegħu ma tistax teżisti. Bħalma l-ilma li jinżel mill-għoli, minħabba l-ammont tiegħu u n-nuqqas ta’ ostakli, jiġri b’qawwa kbira, bl-istess mod ir-ruħ li tinsab fil-paċi u fis-sliem timxi lejn Alla b’xewqa, bi mħabba u b’qawwa kbira.

F’dan l-istat, ir-ruħ tinsab f’tali pożizzjoni li l-imħabba tagħha għal Alla ssir in-nutriment tagħha, u tixrob minn din l-għajn tal-ħajja u b’hekk tinħeles mill-mewt, u tikseb ħajja eterna, u l-perfezzjoni spiritwali.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , | Leave a comment

Understanding the True Spirit of the Islamic Veil

Posted on October 4, 2026 by Laiq Ahmed Atif

Image: Leolintang/Shutterstock.com

Nifhmu l-Ispirtu Veru tal-Velu Iżlamiku

It-Torċa, 04.10.2026 | Imam Laiq Ahmed Atif — amjmalta@gmail.com

Il-velu Iżlamiku, f’forom differenti, minn żmien għal żmien jiġi kkritikat u jispiċċa fl-aħbarijiet. Ħafna drabi, l-argumenti kontra l-“velu Iżlamiku” jew il-“ħiġab” jkunu l-istess: is-sigurtà, l-oppressjoni, id-dinjità tan-nisa, l-identità kulturali, u oħrajn.

Riċentement, wara li l-Prim Ministru Taljan tkellmet dwar pjanijiet biex jiġu pprojbiti l-burqa u n-niqab fl-iskejjel Taljani, id-dibattitu reġa’ qam, anke f’Malta. L-eks kandidat għall-Parlament Ewropew Lee Bugeja Bartolo qal ukoll li, “Malta għandha timxi immedjatament fuq il-passi tal-Italja billi tillimita n-numru ta’ barranin fil-klassijiet u tipprojbixxi l-ħiġab u l-burqa tal-bniet fl-iskejjel kollha ta’ Malta u Għawdex.”

Nemmen li dan is-suġġett mhux mifhum sew minn xi Musulmani u minn ċerti partijiet tas-soċjetajiet tal-Punent. Xi pajjiżi u soċjetajiet Musulmani marru wisq ’il bogħod fil-mod kif jipprattikaw il-velu, u xi kultant tilfu l-għan u l-għerf veru li hemm wara dan it-tagħlim.

Minn naħa, naraw irġiel Musulmani u gvernijiet li jinsistu li n-nisa għandhom ikunu mgħottija minn rashom sa saqajhom (head-to-toe) akkost ta’ kollox. Dan jista’ joħloq f’moħħ in-nies l-impressjoni li l-velu huwa forma ta’ oppressjoni.

Min-naħa l-oħra, insibu gvernijiet u gruppi Ewropej li jinsistu li n-nisa Musulmani ma jilbsu l-ebda għata u jagħmlu minn kollox biex ineħħulhom il-velu minn rashom jew jipprojbixxu dawn il-ħwejjeġ, anke jekk in-nisa nfushom ikunu jixtiequ jilbsuhom.

Fi kliem sempliċi, li mara tiġi vittimizzata billi tiġi mġiegħla tkun mgħottija minn rasha sa saqajha, jew billi tiġi mġiegħla tneħħi l-velu modest tagħha, mhuwiex skont il-valuri reliġjużi, soċjali u umanitarji. Iż-żewġ approċi jistgħu jsiru forom ta’ estremiżmu meta l-għażla personali tal-mara tiġi injorata.

Il-velu Iżlamiku mhuwiex priġunerija

Il-velu Iżlamiku ma jfissirx li n-nisa għandhom jiġu msakkra jew li għandhom ikunu mgħottija minn rashom sa saqajhom. Pjuttost, l-għan tiegħu huwa li jipproteġi d-dinjità tan-nisa permezz ta’ lbies deċenti u dinjituż, li fl-istess ħin iservi bħala limitu u protezzjoni.

Il-velu, l-għata tar-ras u l-enfasi fuq il-modestja ilhom jeżistu bħala tagħlim jew tradizzjoni f’diversi komunitajiet reliġjużi. Storikament, dawn il-prattiki tqiesu bħala ta’ valur f’ħafna tradizzjonijiet ta’ fidi.

Il-Koran Imqaddes isemmi żewġ nisa minn żmien Mosè li baqgħu fil-ġenb u ma ħadux l-annimali tagħhom jixorbu l-ilma flimkien mal-irġiel. Huma stennew minħabba l-modestja u resqu lejn l-ilma wara li l-irġiel spiċċaw.

In-nisa Nsara wkoll kienu jgħattu rashom fil-passat u kienu jilbsu ħwejjeġ modesti. Anke llum, is-sorijiet Kattoliċi Rumani jgħattu rashom, filwaqt li ħafna nisa tal-Punent jgħattu rashom meta jiltaqgħu mal-Papa. Fil-Pakistan, jien personalment rajt nisa Ħindu jgħattu rashom u għajnejhom waqt li jipprattikaw il-velu.

Insibu wkoll il-libsa tradizzjonali Maltija msejħa ‘l-għonnella’, li hija għata għar-ras u li għal sekli sħaħ kienet tintlibes minn kważi n-nisa Maltin adulti kollha. Aktar importanti minn hekk, il-Verġni Marija tradizzjonalment tiġi murija b’rasha mgħottija.

Għalhekk, kif jista’ l-għoti ta’ għata fuq ir-ras jew il-velu nnifsu jitqies bħala xi ħaġa ħażina?

Il-modestja, il-fidi u l-għażla personali

Il-kastità għandha titqies bħala parti mill-fidi, u m’hemm xejn ħażin fih innifsu f’mara li tagħżel li tgħatti ġisimha. Għażla bħal din mhux bilfors tfisser oppressjoni jew nuqqas ta’ ugwaljanza, u lanqas ma trid tkun mezz biex persuna timponi r-reliġjon tagħha fuq ħaddieħor.

Nemmen li li tgħatti ġismek b’mod deċenti mhuwiex sinjal ta’ inferjorità. Pjuttost, jista’ jkun mod kif persuna turi l-modestja, id-deċenza, id-dinjità u r-rispett tagħha. In-natura u l-għan veru tat-tagħlim Iżlamiku dwar l-ilbies huma marbuta mal-moderazzjoni, id-dinjità u l-protezzjoni.

Il-kmand tal-Koran hu għat-tnejn

Jekk naqraw fil-Koran Imqaddes fejn jissemma dan il-kmand, insibu li t-tagħlim mhuwiex indirizzat biss lejn in-nisa. Qabel ma Alla jagħti l-istruzzjonijiet lin-nisa, huwa jagħti lill-irġiel ukoll struzzjonijiet dwar ir-responsabbiltajiet tagħhom fis-soċjetà: “Għid lill-irġiel li jemmnu biex ibaxxu għajnejhom u jħarsu l-partijiet privati tagħhom.” (24:31)

Imbagħad il-Koran jgħid lin-nisa li jemmnu: “Għid lin-nisa li jemmnu biex ibaxxu għajnejhom u jħarsu l-partijiet privati tagħhom, u biex ma jurux is-sbuħija u t-tiżjin tagħhom ħlief dak li jidher minnu. Għandhom jiġbdu l-għata ta’ rashom fuq sidirhom.” (24:32)

X’inhu l-kunċett tal-ħiġab fl-Iżlam?

Fil-qosor, l-Iżlam jenfasizza r-relazzjoni bejn il-ġisem u l-moħħ. Meta persuna tgħatti ġisimha, hija tkun qed tipprova tipproteġi wkoll qalbha minn affarijiet mhux tajbin. L-irġiel huma mgħallma jikkontrollaw il-ħarsa tagħhom u ma jħarsux lejn in-nisa b’mod mhux xieraq. In-nisa huma mistennija jilbsu ħwejjeġ wesgħin u jkopru rashom u sidirhom.

In-nisa Musulmani jilbsu l-ħiġab u ħwejjeġ wesgħin biex iwettqu dak li huma jifhmu bħala l-kmand ta’ Alla. Dan iħeġġiġhom ikunu modesti u ma jilbsux b’mod li jkun intenzjonat biex jiġbed l-attenzjoni tal-irġiel. F’dan is-sens, il-ħiġab jista’ wkoll jipprovdi protezzjoni minn ħarsiet mhux mixtieqa.

Madankollu, il-velu jew il-ħiġab għandu jiġi osservat b’moderazzjoni. Kif qal il-Qaddis Profeta Muhammad, is-sliem għalih: “Il-moderazzjoni hija l-aħjar triq.”

Il-ħiġab għandu jintlibes bl-għan li persuna tikseb il-pjaċir ta’ Alla li Jista’ Kollox u biex jintlaħaq l-għan aħħari tal-velu: il-modestja, id-dinjità u l-ħajja ġusta.

Posted in Ahmadiyya Malta, Article | Tagged , , , , , , , , , , , , , , , , , | Leave a comment

Faith, Peace and Care for the Planet

Posted on September 27, 2026 by Laiq Ahmed Atif

FIDI, PAĊI U ĦARSIEN TAL-PJANETA

It-Torċa, 27.09.2026 | Imam Laiq Ahmed Atif — amjmalta@gmail.com

Li naqdu l-interessi nazzjonali u tal-komunità huwa dmir ta’ kull ċittadin, irrispettivament mill-isfond tiegħu, il-fidi, il-kulur tal-ġilda jew l-affiljazzjoni politika tiegħu. B’dan is-sens ta’ responsabbiltà f’moħħha, il-Komunità Ahmadiyya Musulmana Malta b’kollaborazzjoni mal-Kunsill Lokali tal-Gżira ħadet sehem b’mod attiv fil-Ġimgħa Ewropea għall-Iżvilupp Sostenibbli 2026, permezz ta’ attività komunitarja ffukata fuq il-fidi, il-paċi, il-kura tal-umanità u l-ħarsien tal-ambjent. Is-Sindku tal-Gżira tkellem waqt l-attività u semma l-inizjattivi tal-Kunsill biex juri kura u empatija lejn il-komunità, filwaqt li jipproteġi u jtejjeb l-ambjent lokali tagħna.

Nibnu komunitajiet paċifiċi u sostenibbli

L-iżvilupp sostenibbli mhuwiex biss dwar il-ħarsien tal-ambjent. Huwa wkoll dwar il-bini ta’ komunitajiet li jgħixu fil-paċi, li jilqgħu lil kulħadd, li jieħdu ħsieb xulxin u li kapaċi jaħdmu flimkien.

L-attività ġabret flimkien nies minn twemmin, sfondi u għaqdiet differenti biex jiddiskutu r-responsabbiltà komuni tagħhom lejn l-ambjent, il-ġirien u l-komunità kollha. Kienet opportunità biex nitgħallmu minn xulxin u naħsbu dwar kif il-fidi u l-valuri umani komuni jistgħu jħeġġuna nagħmlu ġid. Il-parteċipanti ddiskutew l-Għanijiet ta’ Żvilupp Sostenibbli (SDGs) tan-Nazzjonijiet Uniti u esploraw kif individwi u komunitajiet jistgħu jgħinu biex jintlaħqu dawn l-għanijiet.

L-attività ġiet organizzata bħala parti mill-Jiem ta’ Azzjoni għall-Iżvilupp Sostenibbli ta’ Malta 2026, u kkontribwiet għall-għanijiet usa’ tal-Ġimgħa Ewropea għall-Iżvilupp Sostenibbli 2026. L-għan kien li l-ideat u d-diskussjonijiet jinbidlu f’azzjoni konkreta u ta’ benefiċċju għall-komunità.

Il-ħarsien tal-pjaneta jibda mid-dar

Il-kelliema kollha enfasizzaw kemm huwa importanti li nibnu komunitajiet b’saħħithom ibbażati fuq ir-rispett lejn xulxin, id-djalogu, il-qalb tajba u l-kura ta’ xulxin. Ingħatat attenzjoni partikolari għar-responsabbiltà tagħna lejn il-ġirien, l-anzjani u dawk li jistgħu jkunu jeħtieġu l-għajnuna.

Il-kelliema enfasizzaw ukoll l-importanza ta’ valuri familjari b’saħħithom. Il-familja hija l-bażi ta’ dar paċifika u ta’ soċjetà paċifika. Jekk nitgħallmu nħobbu, nirrispettaw u nieħdu ħsieb lil dawk l-aktar qrib tagħna, inkunu nistgħu nwessgħu din il-kura għall-komunità kollha u, fl-aħħar mill-aħħar, għall-pjaneta kollha.

Għandna nqisu d-dinja bħala d-dar komuni tagħna. Kulħadd naturalment iħobb u jipproteġi d-dar u l-familja tiegħu. Bl-istess mod, jekk nifhmu li din il-pjaneta hija d-dar tagħna, inkunu aktar responsabbli dwar kif nużaw ir-riżorsi tagħha u kif nittrattaw l-ambjent.

Iżlam dwar il-ħarsien tal-ambjent

Mill-perspettiva Iżlamika, il-kura tal-ambjent tibda billi nagħrfu li l-univers u dak kollu li hemm fih huma parti mill-ħolqien ta’ Alla. Il-bnedmin ingħataw ir-responsabbiltà biex jieħdu ħsieb din id-dinja. Din ir-responsabbiltà tfisser li għandna nużaw ir-riżorsi naturali b’mod responsabbli u nevitaw qerda, ħela u tniġġis bla bżonn.

L-Iżlam ma jgħidx biex ma nibbenefikawx mir-riżorsi li tana Alla. Għall-kuntrarju, jgħallimna nużawhom b’mod responsabbli u nevitaw il-ħela, sabiex nies oħra u l-ġenerazzjonijiet futuri jkunu jistgħu jibbenefikaw minnhom ukoll. Il-Koran Imqaddes (7:32) jgħid: “Kulu u ixorbu, mingħajr ħela. Żgur li Huwa ma jħobbx il-ħela.”

Dan il-prinċipju sempliċi għandu importanza kbira għall-isfidi ambjentali li qed tiffaċċja d-dinja llum. Nistgħu nibbenefikaw minn dak li tagħtina d-dinja, filwaqt li niftakru li r-riżorsi tagħha mhumiex bla limitu u li għandna responsabbiltà lejn ħaddieħor.

Fidi, imħabba u responsabbiltà

Il-kura vera tal-umanità u tal-pjaneta hija marbuta mill-qrib mal-fidi u mat-twemmin f’Alla. Meta persuna tħobb lil Alla, għandha tipprova tiżviluppa l-kwalitajiet li Alla għallem lill-umanità tgħożż: il-qalb tajba, il-ħniena, il-kompassjoni, il-ġustizzja, il-protezzjoni u l-ġenerożità.

L-Iżlam jgħallem li l-imħabba lejn Alla għandha twassal għall-imħabba u l-kura lejn il-ħolqien Tiegħu. Din il-kura għandha tkun mhux biss lejn in-nies li jgħixu llum, iżda wkoll lejn il-ġenerazzjonijiet futuri.

B’dan il-mod, il-fidi tista’ tispira lin-nies biex isiru aktar konxji tar-responsabbiltajiet tagħhom lejn l-umanità u l-pjaneta.

Mid-djalogu għal azzjoni pratika

L-attività kkunsidrat ukoll x’jistgħu jagħmlu l-komunitajiet ta’ fidi flimkien. Hemm ħafna modi sempliċi kif il-komunitajiet jistgħu jaħdmu flimkien, fosthom:

  • Nedukaw lill-membri tal-komunità dwar ir-responsabbiltajiet ambjentali u soċjali.
  • Norganizzaw ġbir regolari ta’ ikel għal nies fil-bżonn.
  • Norganizzaw ġranet ta’ tindif tal-ambjent.
  • Inħeġġu lin-nies jimxu, jużaw ir-rota u t-trasport pubbliku biex nipproteġu l-ambjent, innaqqsu t-tniġġis u ngħixu ħajja aktar b’saħħitha u sostenibbli.
  • Norganizzaw attivitajiet għat-tħawwil tas-siġar u community gardening.
  • Ngħinu lir-refuġjati u lin-nies bla dar.
  • Inżuru anzjani, nies waħedhom jew nies li jgħixu iżolati.
  • Norganizzaw attivitajiet ta’ ġbir ta’ fondi flimkien għal nies li jkunu għaddejjin minn diffikultajiet.
  • Naħdmu flimkien biex inneħħu dak li jista’ jkun ta’ periklu jew ta’ ħsara fi spazji pubbliċi u fit-toroq u l-passaġġi tan-nies.
  • Noħolqu opportunitajiet biex nies ta’ twemmin u sfondi differenti jiltaqgħu, jitgħallmu u jagħtu servizz flimkien.

Dawn l-azzjonijiet jistgħu jidhru żgħar, iżda meta ħafna nies jaħdmu flimkien, jistgħu joħolqu bidla sinifikanti.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , , , | Leave a comment

Building Peaceful and Sustainable Communities

Posted on September 22, 2026 by Laiq Ahmed Atif

Ahmadiyya Muslim Jamaat Malta Participates in “Malta’s Sustainable Development Action Days 2026: From Ideas To Impact!”

Turkish-Maltahaber.com | The Ahmadiyya Muslim Jamaat Malta, in collaboration with the Gżira Local Council, actively participated in Malta’s Sustainable Development Action Days 2026 by organising a community event at the Gżira Local Council Hall, contributing to the wider objectives of the European Sustainable Development Week 2026.

The event was opened by the Mayor of Gżira, who highlighted the Council’s initiatives to promote care and empathy within the community while protecting and improving the local environment. He also spoke warmly of the friendship and cooperation between the Gżira Local Council and the Ahmadiyya Muslim Community, expressing his hope for many more collaborative initiatives in the future.

Faisal Mohammed Zakari, a member of the Ahmadiyya Muslim Community and a Sustainability Researcher and Analyst, delivered a detailed presentation on some of the key environmental and social challenges facing communities today. He provided an overview of the United Nations Sustainable Development Goals (SDGs) and explored practical ways in which individuals and communities can contribute towards achieving them.

A moderated panel discussion, led by Musawar Ahmad, brought together the Mayor of Gżira, Mr Bryan Corlett; Rev. Mark Ciantar OFM; and Imam Laiq Ahmed Atif. The discussion explored how faith communities, social organisations and local councils can help educate their communities and the wider public about their environmental and social duties and responsibilities.

The event concluded with participants making personal pledges and reflecting on key takeaways and practical lessons from the discussions. This was followed by a community lunch, providing an opportunity for participants to continue their conversations and strengthen connections in an informal setting.

The event brought together people from different faiths, backgrounds and organisations to reflect on their shared responsibility towards the environment, their neighbours and the wider community. It provided an opportunity for participants to learn from one another and consider how faith, cooperation and shared human values can inspire positive action. The event was proposed as part of Malta’s Sustainable Development Action Days 2026 and contributed to the broader objectives of the European Sustainable Development Week 2026. Through dialogue, education and community engagement, the initiative sought to encourage practical action towards building peaceful, inclusive and sustainable communities.

From Dialogue to Practical Action

The event also highlighted the importance of turning dialogue into practical action, with participants emphasising that meaningful change can begin with simple, practical steps at community level. A number of actions were identified through which communities can work together to strengthen social responsibility, care for the environment, and support those who may be experiencing hardship. These include:

  • Raising awareness by educating community members about environmental and social responsibilities.
  • Supporting people in need through regular food collections and other community initiatives.
  • Promoting sustainable mobility by encouraging walking, cycling, and the use of public transport to reduce carbon emissions, protect the environment, and promote healthier lifestyles.
  • Caring for the environment through community clean-up days, tree-planting activities, and community gardening.
  • Supporting refugees and people experiencing homelessness through practical assistance, inclusion, and community support.
  • Reaching out to those who may be isolated, including elderly residents and others who may benefit from companionship and practical support.
  • Supporting people experiencing hardship through joint fundraising activities and other forms of community assistance.
  • Making public spaces safer and more welcoming by working together to identify and remove hazards and sources of harm.
  • Building bridges across communities by creating opportunities for people of different faiths and backgrounds to meet, learn from one another, and work together in service of the wider community. UPF.ORG
Posted in Ahmadiyya, Ahmadiyya Malta, Events | Tagged , , , , , , , , , , , , , , , , , , , , , , , , , | Leave a comment

Community Police Inclusion Event in Birgu

Posted on September 21, 2026 by Laiq Ahmed Atif

On 4 September 2026, Ahmadiyya Muslim Jamaat Malta participated in the Community Police Inclusion Event held at Xatt ir-Risq, Birgu. The event, organised by the Malta Police in collaboration with local and regional councils, brought together people from different cultural and religious backgrounds.

Representatives of the Ahmadiyya Muslim Community introduced visitors to the community, its beliefs, and its humanitarian and social services. Many visitors showed interest in ID-DAWL, the Community’s monthly magazine. The prayer beads (Tasbeeh) displayed at the stand were also a special attraction and were warmly received by several visitors as a reminder to pray and strengthen their connection with God.

The officer in charge of the Community Police thanked Ahmadiyya Muslim Jamaat Malta for its participation. Her Excellency Marie-Louise Coleiro Preca, President Emeritus of Malta, also visited the Community’s stand and expressed her appreciation for its participation and contribution to the programme.

The event provided a valuable opportunity to build positive relationships, encourage mutual understanding, and share the peaceful message of Islam-Ahmadiyya with the wider society.

Posted in Ahmadiyya, Ahmadiyya Malta, Events | Tagged , , , , , , , , , , , , , | Leave a comment

From Division to Unity and Peace

Posted on September 20, 2026 by Laiq Ahmed Atif

Image: Foto Sale/Shutterstock.com

MINN FIRDA GĦAL GĦAQDA U PAĊI

It-Torċa, 20.09.2026 | Imam Laiq Ahmed Atif — amjmalta@gmail.com

Jista’ xi ħadd jimmaġina kemm tkun kbira t-tbatija ta’ persuna li jkollha uġigħ f’xi parti minn ġisimha? Kemm tkun affettwata b’mod negattiv il-ħajja ta’ persuna bħal din meta jkollha uġigħ, tbatija u diffikultajiet kontinwi?

Bla dubju, kull persuna f’sensiha tifhem li uġigħ f’parti waħda tal-ġisem jista’ jagħmel lill-ġisem kollu bla kwiet, imdejjaq u bla tama. Għalhekk, jekk uġigħ f’parti waħda tal-ġisem tal-bniedem iġiegħel lill-ġisem kollu jbati, allura x’jista’ jkun l-istat li ma nistgħux nimmaġinaw ta’ dinja li qed tiffaċċja mhux kunflitt wieħed, mhux tnejn, mhux tlieta, iżda ħafna kunflitti, gwerer u firdiet?

Analiżi qasira tas-sitwazzjoni globali tal-lum tagħmilha ċara ħafna li qed ngħixu f’dinja maqsuma, miksura, mifruda u mimlija kunflitti; dinja fejn il-paċi tinstab mhux ħafna; dinja fejn ir-firdiet u n-nuqqas ta’ qbil saru parti mill-ħajja ta’ kuljum; dinja li bil-qawwa kollha qed tixtieq għall-għajn tal-paċi u għad-dawl tas-serenità.

Stampa xokkanti tal-istat tad-dinja

Is-sitwazzjoni tad-dinja mhijiex biss dak li naraw fuq l-iskrins tat-televiżjoni tagħna kuljum; fil-fatt, hija ferm agħar milli nistgħu nimmaġinaw jew nifhmu. Rapport riċenti ppubblikat mill-Kumitat Internazzjonali tas-Salib l-Aħmar (ICRC), bit-titlu ‘Humanitarian Outlook 2026: A World Succumbing to War’, jippreżenta stampa xokkanti tal-istat tad-dinja.

Ir-rapport tal-ICRC huwa komprensiv. Skont is-sejbiet tiegħu, bħalissa d-dinja qed tiffaċċja diversi forom ta’ gwerra, inklużi kunflitti armati, ribelljonijiet u gwerer ċivili. Fil-qosor, ħafna pajjiżi madwar id-dinja qed jesperjenzaw vjolenza, instabbiltà u inkwiet b’xi forma jew oħra, u dan huwa ta’ tħassib serju għas-sitwazzjoni globali kollha.

Problemi ta’ tipi differenti

Hemm ħafna pajjiżi li qed jiffaċċjaw tipi differenti ta’ problemi u ribelljoni, iżda jirċievu ftit attenzjoni mill-midja u għalhekk rarament jiġu diskussi. Madankollu, is-sitwazzjoni globali kollha tibqa’ allarmanti.

Minbarra gwerer kbar li għaddejjin bħalissa fid-dinja, in-numru ta’ gwerer żgħar jew limitati, gwerer ċivili u kunflitti huwa bejn ħamsin u sittin. B’mod ġenerali, hemm aktar minn mitt pajjiż jew reġjun fid-dinja li jistgħu jiġu deskritti bħala affettwati minn gwerra, gwerra ċivili, kunflitt, ribelljoni jew konfrontazzjoni armata.

Skont ir-rapport tal-ICRC, in-numru ta’ kunflitti armati kompla jiżdied, u laħaq madwar 130 fl-2024. Din iċ-ċifra hija d-doppju tan-numru rreġistrat biss ħmistax-il sena qabel, fl-2009. Aktar minn għoxrin kunflitt komplew għal aktar minn għoxrin sena, u b’hekk ġenerazzjonijiet sħaħ ma jafu xejn ħlief il-gwerra. Bħalissa, aktar minn 204 miljun persuna jgħixu f’żoni taħt kontroll sħiħ jew ikkontestat ta’ gruppi armati.

Meta d-difiża tiġi qabel il-bniedem

Hija wkoll traġedja umana ta’ wġigħ li, minflok ma tonfoq fuq il-ġid tal-bniedem, id-dinja qed tonfoq ammonti enormi ta’ flus f’isem id-difiża. Skont l-Istitut Internazzjonali għar-Riċerka dwar il-Paċi ta’ Stokkolma (SIPRI), fl-2024 intefqu ammont xokkanti ta’ US$2.71 triljun fuq il-militar, li żdied għal US$2.88 triljun fl-2025.

Din in-nefqa militari li qed tikber qed tieħu riżorsi li huma essenzjali għall-ġid soċjali u umanitarju, bħall-edukazzjoni, il-kura tas-saħħa, it-tnaqqis tal-faqar, il-provvista tal-ħtiġijiet bażiċi u l-protezzjoni tal-ambjent. Skont in-Nazzjonijiet Uniti, huwa stmat li hemm bżonn ta’ US$93 biljun fis-sena biex il-ġuħ fid-dinja jintemm sal-2030.

Dawn iċ-ċifri juru b’mod ċar il-prijoritajiet tad-dinja kumplessa li ngħixu fiha, fejn relattivament ftit jintefaq biex tiġi salvata l-umanità, filwaqt li ġid enormi jintefaq fuq il-qerda tagħha. Dan l-iżbilanċ kbir juri li d-dinja qed timxi lejn aktar gwerer, mhux lejn il-paċi.

Ir-responsabbiltà kollettiva tal-umanità kollha

Il-Kap tal-Komunità Ahmadiyya Musulmana, waqt li kien qed jitkellem dwar l-istat attwali tal-affarijiet fid-dinja, qal li jekk dawn il-gwerer ikomplu, il-qerda u t-telf ta’ ħajjiet se jkunu akbar minn kull ħaġa li qatt rajna fl-istorja tal-bniedem. Il-qerda mhux se tibqa’ limitata għal ġenerazzjoni waħda, iżda, il-ġenerazzjonijiet futuri wkoll se jġorru l-konsegwenzi tagħha.

Għalhekk, hija r-responsabbiltà kollettiva tagħna li nħallu warajna dinja li fiha wliedna u l-ġenerazzjonijiet futuri jkunu jistgħu jgħixu fil-paċi. Irridu naraw li l-azzjonijiet tagħna tal-lum ma jikkawżawx tbatija lit-tfal ta’ għada minħabba n-nuqqasijiet tagħna. Inkella, huma jkollhom raġun iżommuna responsabbli talli ħallejniehom dinja maħkuma mill-fjammi u l-kunflitti.

Iż-żminijiet li qed ngħixu fihom jitolbuna nsaħħu r-rabtiet tagħna ma’ Sidna u ma’ xulxin. Irridu nibnu pontijiet ta’ mħabba, solidarjetà u fehim, minflok ħitan ta’ mibegħda, ostilità u firda. Irridu nagħtu preċedenza lill-għaqda fuq il-firda u nagħmlu ħilitna biex innaqqsu l-firdiet li qed jikbru bejn il-popli u n-nazzjonijiet.

Fuq kollox, irridu nħabirku biex ngħixu skont l-ogħla valuri morali u l-ogħla virtujiet, sabiex kliemna u għemilna jkunu ta’ kontribut għal dinja aktar ġusta, paċifika u mimlija kompassjoni.

Nagħlaq b’appell mill-qalb u talba għall-umanità mill-Kap tal-Komunità Ahmadiyya Musulmana, li talab:

“Jalla l-umanità tifhem l-urġenza ta’ dan il-mument, titla’ ’l fuq mid-differenzi fit-twemmin, fl-ideoloġija u fir-reliġjon, u taħdem flimkien għall-ġustizzja u l-kompassjoni. Jalla s-sħab mudlam tal-gwerra li jinsab fuq l-umanità jinfirex, u jerġa’ jidher sema sabiħ u paċifiku mibni fuq l-imħabba, it-tolleranza, il-fraternità u s-sagrifiċċju.” Ammen.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , , , , , , , , , , , , , | Leave a comment

The Status of Mary (Hazrat Maryam) in Islam

Posted on September 17, 2026 by Laiq Ahmed Atif
Posted in Ahmadiyya Malta, Interviews, TV interviews | Tagged , , , , , , , , , , , , , , , , , | Leave a comment

An Ideal Family Life: What keeps a family happy, strong, and united?

Posted on September 17, 2026 by Laiq Ahmed Atif
Posted in Ahmadiyya Malta, Interviews, Radio interview, www.ahmadija.org.mt | Tagged , , , , , , , , , , , , , , , , , , , , , | Leave a comment

Why do some young people vandalize private property and cars?

Posted on September 15, 2026 by Laiq Ahmed Atif

Image:Talk.mt

Għaliex xi żgħażagħ jagħmlu ħsara lill-proprjetà u l-karozzi privati?

It-Torċa, 13.09.2026 | IMAM Laiq Ahmed Atif — amjmalta@gmail.com

Fl-aħħar xhur u ġimgħat, il-midja rrappurtat inċidenti f’ċerti żoni ta’ Malta, partikolarment f’Swieqi, li jinvolvu xi żgħażagħ jagħmlu ħsara lil proprjetà u karozzi privati. X’inhi l-psikoloġija wara li wieħed jagħmel ħsara lill-proprjetà u l-affarijiet pubbliċi jew privati? Għaliex xi żgħażagħ jagħmlu dan u x’jieħdu minn dan kollu?

Naħseb li dawk it-turisti żgħażagħ li jagħmlu ħsara lill-karozzi u lill-proprjetajiet waqt li jkunu fuq vaganza jistgħu jagħmlu dan għal diversi raġunijiet, fosthom li jkunu fis-sakra jew jużaw l-alkoħol b’mod bla kontroll, li jdgħajjef il-ġudizzju tagħhom. Jistgħu jaħsbu li jinsabu ’l bogħod minn darhom, li ħadd ma jafhom, u li mhux se jkun hemm konsegwenzi għall-azzjonijiet mhux mixtieqa tagħhom.

Xi kultant, is-sens ta’ anonimità tista’ twasslhom biex jagħmlu dawn l-atti kriminali. F’okkażjonijiet oħra, jista’ jkun minħabba “peer pressure”, kultura li tipprova tidher “cool”, it-tfittxija għall-eċitament, li jippruvaw jimpressjonaw lil oħrajn, jew il-pressjoni tal-midja soċjali u x-xewqa għal likes, li kollha jistgħu jħeġġuhom iġibu ruħhom b’mod antisoċjali.

Barra minn hekk, fatturi bħall-għira, il-faqar jew nuqqas ta’ dak li wieħed għandu bżonn, il-preġudizzju, il-benesseri mentali, u mġiba bla kontroll jistgħu wkoll jikkontribwixxu biex in-nies jagħmlu ħsara lil oħrajn jew lill-proprjetà tagħhom. Xi nies jistgħu jaħsbu li meta jkunu fuq vaganza, jistgħu jagħmlu dak kollu li jridu; li huma ħielsa minn kull dmir u responsabbiltà soċjali u ċivika; u li huma indipendenti mil-limitazzjonijiet morali u soċjali.

Il-kawża ewlenija ta’ mġieba ħażina

L-Iżlam jiggwidana li mġibiet bħal dawn jistgħu jidħlu fil-ħajja ta’ persuna meta din tinsa lill-Mulej tagħha. Jekk dejjem niftakru li Alla li Jara Kollox qed jarana u li se nkunu mitluba nagħtu tweġiba għal kull għemil, allura mġiba bħal din tista’ tiġi evitata. Li tivvjaġġa lejn art barranija jista’ jipproteġi lil xi ħadd mill-għajnejn tal-ġenituri jew mill-ġudizzju tas-soċjetà, iżda qatt ma jista’ jipprovdilu kenn mill-ħarsa ta’ Alla. Qatt ma jistgħu jaħbu xejn minn quddiem il-Mulej tagħhom. Alla jgħid fil-Koran Imqaddes:

  • “Huwa tabilħaqq jaf dak kollu li hu sigriet u dak li hu l-aktar moħbi.” (20:8)
  • “Tassew li ma hemm xejn moħbi minn Alla, la fl-art u lanqas fis-sema.” (3:6)
  • “Alla jaf dak kollu li taħbu u dak kollu li tikxfu.” (16:20)

It-tifsira hija ċara li xejn ma jista’ jinħeba minn Alla. Anke jekk il-kameras CCTV tad-dinja jonqsu milli jaqbdu l-azzjonijiet ta’ xi ħadd, huma ma jistgħux jaħarbu mill-ħarsa Divina. Alla jaf dak kollu li nagħmlu, kull fejn u kull meta nagħmluh, kemm jekk fid-dawl kif ukoll jekk fid-dlam.

It-twissija Divina

Barra minn hekk, Alla jfakkarna li mhux biss l-azzjonijiet tagħna huma magħrufa minnu, iżda wkoll dak li jgħaddi minn moħħna u dak li hemm f’qalbna: “Huwa jaf sew b’kulma jgħaddi minn moħħkom u b’kulma hemm f’qlubkom.” (Il-Koran, 67:14)

Alla li Jista’ Kollox jiggwidana u jwissina wkoll li għandna dejjem noqogħdu attenti għal kull azzjoni u kull għemil tagħna, għax xejn mhu moħbi minnu, kemm fl-art kif ukoll fis-smewwiet. Huwa jgħid:

“Wissihom: ‘Sew jekk taħbu dak li għandkom fi qlubkom, u sew jekk tikxfuh, Alla jaf bih; u Huwa jaf b’dak kollu li hemm fis-smewwiet u b’dak kollu li hemm fl-art. Alla fuq kollox Setgħan.’” (Il-Koran, 3:30)

Is-sistema interna ta’ twissija u responsabbiltà

Barra minn hekk, l-Iżlam jipprovdi qafas qawwi għaliex ma jgħidx biss, “Tħallix li tinqabad.” Pjuttost, ifittex li jiżviluppa kuxjenza interna li tibqa’ attiva anke meta ħadd ma jkun qed iħares. Sakemm din is-sistema interna ta’ twissija tibqa’ attiva, nibqgħu fit-triq it-tajba. Anke meta ħsibijiet sataniċi bħal dawn jidħlu f’moħħna, is-sistema interna ta’ responsabbiltà tagħna mill-ewwel tqajjem l-allarm u tixgħel il-bozza ħamra interna, u ġġegħelna nieqfu.

Peress li Alla li Jista’ Kollox huwa Ħanin u Grazzjuż, u jħobb ħafna t-tjubija u jrid li l-qaddejja tiegħu jsiru ġusti u jimxu fit-toroq tat-tjubija u s-safa, Huwa bena fil-bnedmin sistema spiritwali li twissi kontinwament lill-persuna, sabiex tkun tista’ tevita t-toroq tal-ħażen u la tkun denja ta’ kastig f’din id-dinja u lanqas tiffaċċja l-għajb fil-Ħajja ta’ Wara. Meta jirreferi għal din l-istess sistema, Alla li Jista’ Kollox jgħid fil-Koran Imqaddes: “Tabilħaqq naħlef bir-ruħ li twaħħal fiha nnifisha.” (75:3)

Dan ifisser li l-kapaċità interna fil-bnedmin li twaħħal fihom infushom twissihom dwar il-ħażen, u tippermetti lill-kuxjenza tal-bniedem issir konxja mill-ħażin u tħeġġeġ lill-persuna titbiegħed minnu.

Fil-qosor

Bħala konklużjoni, jekk dejjem niftakru f’Alla u nżommu l-kuxjenza tagħna u s-sistema ta’ allarm divina li għandna ġewwa fina attivi, qatt ma naqgħu f’għemil ħażin, irrispettivament miċ-ċirkustanzi tagħna, kemm jekk qed ngħixu f’pajjiżna jew qed inżuru pajjiż ieħor bħala turisti għal ftit jiem. Hekk biss jista’ dan it-tip ta’ mġiba antisoċjali u kontra d-dmirijiet ċiviċi tiġi miġġielda b’mod effettiv u tinżamm il-paċi tas-soċjetà.

Ftakar, Alla jaf kollox, kull ħaġa moħbija u anke l-aktar sigrieti profondi.

Posted in Ahmadiyya, Ahmadiyya Malta, Article | Tagged , , , , , , , , , , , , , , , | Leave a comment

Id-Dawl 104

Posted on September 14, 2026 by Laiq Ahmed Atif

ID-DAWL 104 — AUGUST 2026

Id-Dawl 104Download
Posted in Id-Dawl, Id-Dawl Magazine | Tagged , , , , , , , , | Leave a comment

Peace is a Treasure for Humanity

Posted on September 9, 2026 by Laiq Ahmed Atif

Image: Afotostock/Shutterstock.com

Il-paċi hija teżor għall-umanità

In-Nazzjon, 09.09.2026| IMAM Laiq Ahmed Atif — amjmalta@gmail.com

Il-paċi mhijiex biss importanti, iżda hija wkoll teżor kbir għall-umanità. L-istorja tal-bniedem turi li kull meta jkun hemm paċi u kwiet fis-soċjetà, in-nies jimxu ’l quddiem u jkomplu jiksbu suċċess wara ieħor. Min-naħa l-oħra, meta s-soċjetà tgħaddi minn żminijiet diffiċli, mhux biss ma tavvanzax, iżda tmur lura. Huwa fatt li pajjiżi jew postijiet fejn hemm kunflitti qatt ma jistgħu jilħqu l-għanijiet tagħhom ta’ prosperità u tkabbir ekonomiku.

Għandna nifhmu b’mod tajjeb li kull pjan li nagħmlu ma jistax jirnexxi jekk ma jkunx hemm il-paċi.

Dak li qed jiġri fid-dinja llum juri li għad hemm ħafna xogħol x’jsir biex ikun hemm paċi u armonija fid-dinja. Is-sitwazzjoni fil-Lvant Nofsani, fl-Iran, fis-Sudan, fl-Afganistan, fis-Somalja u f’ħafna pajjiżi oħra turi biċ-ċar li mingħajr paċi, is-soċjetajiet ma jistgħux jimxu ’l quddiem.

Il-ħtieġa li nitkellmu dwar il-paċi f’Malta

Xi wħud jistgħu jgħidu li Malta hija pajjiż paċifiku u, bil-grazzja ta’ Alla li Jista’ Kollox, aħna m’għandniex dawn il-problemi. Allura għaliex il-paċi hija importanti għalina?

L-ewwel u qabel kollox, nitlob lil Alla l-Ħanin biex dejjem iberik lil pajjiżna, biex dejjem ingawdu paċi, biex in-nies kollha jgħixu fl-għaqda, fl-armonija u f’ambjent ta’ ħbiberija, u biex qatt ma niffaċċjaw problemi bħal dawn f’pajjiżna. Ammen.

Madankollu, irridu nifhmu wkoll li qed ngħixu f’dinja fejn dak li jiġri f’pajjiż jew reġjun wieħed jista’ jaffettwa lil kulħadd, u xi kultant anke lid-dinja kollha, kif ġara fil-kunflitt bejn l-Istati Uniti u l-Iran. Ħadd ma seta’ jimmaġina li dan kien se jkollu effett daqshekk kbir fuq l-ekonomija dinjija.

Dan juri biċ-ċar li l-pajjiżi kollha għandhom ikomplu jaħdmu u jistinkaw kemm għall-paċi fil-pajjiż tagħhom kif ukoll għall-paċi internazzjonali, għax it-tnejn għandhom effett fuq il-pajjiżi u n-nies madwar id-dinja.

Il-paċi tiġi l-ewwel f’kull ċirkustanza

Il-Koran Imqaddes jagħti importanza kbira lill-paċi. Jgħid li anke waqt gwerra, jekk naħa waħda tkun trid il-paċi, in-naħa l-oħra għandha wkoll taċċetta l-paċi u tafda f’Alla. Anke jekk ikun hemm il-biża’ li l-għadu jista’ jkun qed iqarraq, xorta waħda għandha tingħata prijorità lill-paċi. Il-Koran Imqaddes jgħid:

“Jekk (l-għedewwa) imilu lejn il-paċi u s-sliem, imxi int ukoll lejn il-paċi, u afda f’Alla. Żgur li Huwa dak li jisma’ kollox u jaf kollox. Iżda jekk ikollhom il-ħsieb li jqarrqu bik (u ma kinux sinċieri għall-paċi), tabilħaqq Alla huwa biżżejjed għalik.” (8:62–63)

Dawn il-versi, minbarra li jgħallmu prinċipju importanti dwar kif isiru ftehimiet ta’ paċi, juru wkoll x’inhu l-iskop veru tal-gwerra. Huma jgħallmu li l-gwerra għandha ssir biss biex tinżamm il-paċi, u mhux għal interessi personali, skopijiet moħbija jew biex wieħed juri s-saħħa militari tiegħu, kif naraw f’ħafna kunflitti u gwerer ta’ żmienna.

Għalhekk, jekk poplu li jkun kien qed jiġġieled jitlob il-paċi, il-poplu l-ieħor għandu jwaqqaf il-ġlied u jagħmel il-paċi miegħu. Anke jekk ikun hemm il-possibbiltà li l-għadu jkun qed jitlob il-paċi biex iqarraq jew biex jikseb aktar ħin, dan m’għandux iżomm lill-oħrajn milli jaċċettaw il-paċi. Dan juri li dak li jixtieq l-Iżlam huwa biss il-paċi u jistieden lill-bnedmin jagħmlu kull sforz biex jistabbilixxu u jżommu l-paċi.

Għaliex il-paċi hija daqshekk importanti?

Il-paċi hija importanti għax tippermetti lill-individwi, lill-komunitajiet u lill-pajjiżi jgħixu, jikbru u javvanzaw mingħajr il-biża’ kontinwa tal-kunflitti jew tal-vjolenza. Il-paċi tiżgura s-sigurtà tan-nies u toħloq ambjent fejn kulħadd jista’ jgħix mingħajr biża’ ta’ gwerra, kriminalità jew vjolenza.

Il-paċi tgħin ukoll lis-saħħa mentali u emozzjonali. Dan huwa importanti ħafna fi żmienna, meta naraw tant każijiet ta’ problemi tas-saħħa mentali u ta’ persuni li jagħmlu ħsara lilhom infushom, kemm lokalment kif ukoll madwar id-dinja. Li tgħix fil-paċi jnaqqas l-istress, l-ansjetà u t-trawma, u jgħin lin-nies jgħixu ħajja aktar b’saħħitha u aktar ferħana, li kull bniedem jistħoqqlu.

Il-paċi tipprovdi wkoll opportunitajiet u faċilitajiet għall-edukazzjoni u għall-kura tas-saħħa. Mingħajr paċi, kif jistgħu t-tfal jattendu l-iskola? U kif jistgħu n-nies jirċievu kura medika? Is-sitwazzjoni f’Gaża hija prova ċara ta’ dan, fejn eluf ta’ tfal tilfu l-edukazzjoni tagħhom minħabba l-gwerra, filwaqt li eluf ta’ persuni morda u midruba ma setgħux jirċievu kura medika.

Il-paċi tipproteġi wkoll l-ambjent. F’soċjetà paċifika, in-nies jistgħu jippjanaw aħjar kif jieħdu ħsieb l-ambjent. Il-paċi tagħmilha aktar faċli biex jiġu mħarsa r-riżorsi naturali u biex l-isfidi ambjentali jiġu indirizzati flimkien.

Barra minn hekk, il-paċi toħloq ambjent fejn l-ekonomija tista’ tikber. In-negozji jistgħu jaħdmu aħjar, jiżdiedu l-investimenti u jinħolqu aktar opportunitajiet ta’ xogħol f’soċjetajiet stabbli u paċifiċi.

Il-paċi ssaħħaħ ukoll ir-relazzjonijiet u tħeġġeġ il-fiduċja, il-kooperazzjoni, ir-rispett u l-fehim bejn l-individwi, il-komunitajiet, is-soċjetajiet u l-pajjiżi. Il-paċi tiggarantixxi d-drittijiet bażiċi tal-bniedem, tħeġġeġ l-iżvilupp, tippromwovi l-kultura, toħloq futur aħjar, u l-benefiċċji tagħha huma ħafna aktar.

Fil-qosor, il-paċi hija l-pedament ta’ soċjetà kuntenta u ta’ suċċess. Hija tgħin lin-nies jgħixu fis-sigurtà, jitgħallmu, jaħdmu, jibnu relazzjonijiet tajbin u jagħtu sehem pożittiv lid-dinja. Meta nippromwovu l-paċi fil-ħajja ta’ kuljum tagħna, inkunu qed ngħinu biex noħolqu futur aħjar għal kulħadd.

Posted in Ahmadiyya Malta, Article | Tagged , , , , , , , , , , | Leave a comment

Why should we have attachment with God?

Posted on September 6, 2026 by Laiq Ahmed Atif

Image: Mohd Shukri Mohd Yassin/Shutterstock.com

GĦALIEX GĦANDNA JKOLLNA RABTA MA’ ALLA?

It-Torċa, 06.09.2026 | IMAM Laiq Ahmed Atif — amjmalta@gmail.com

Huwa prinċipju komuni li ma jkunx hemm rabta jew relazzjoni ma’ xi ħadd mingħajr raġuni. Wara kull relazzjoni hemm xi realtà jew raġuni. Kemm jekk għandna relazzjoni mal-ġenituri tagħna, ma’ wliedna, mal-qraba tagħna, mal-ġirien tagħna, mal-ħbieb tagħna, mal-kollegi tal-iskola jew tax-xogħol, kull relazzjoni għandha xi ħaġa marbuta magħha.

Għalhekk tqum il-mistoqsija: għaliex għandna jkollna rabta ma’ Alla? X’inhi r-realtà tar-rabta ma’ Alla? X’inhu l-għan tagħha u x’benefiċċju għandha? X’inhi l-importanza li nkunu qrib Alla, u kif nistgħu niksbu din il-qrubija?

L-iktar ħaġa bażika hija li Alla huwa l-Ħallieq tagħna, dak li jipprovdilna, dak li jagħti l-mezzi biex iseħħu l-affarijiet, u dak li jieħu ħsiebna u jrabbinna. Għalhekk, bħala gratitudni għall-ġid li jagħmlilna, huwa meħtieġ li jkollna rabta ma’ Dak li jagħtina dan il-ġid.

Bl-istess mod kif inħobbu u jkollna rabta ta’ mħabba mal-ġenituri tagħna għaliex huma tawna l-ħajja u rabbewna, jekk huwa meħtieġ li jkollna rabta magħhom bħala gratitudni għall-ġid li għamlulna, allura ma għandux ikollna wkoll rabta ma’ Dak li ħalaq l-univers kollu u l-barkiet kollha li għandna?

It-tieni ħaġa hija li Alla l-Ħanin huwa s-sors ta’ kull ġid u l-għajn ta’ kull barka. Il-veru sors jinsab għand Alla, u l-barka tiġi mingħandu. Din tinkiseb meta wieħed jipprova jimxi fit-triq ta’ Alla, u bħala riżultat jikseb il-barkiet u l-qrubija Tiegħu.

Kif nistgħu niksbu l-qrubija ta’ Alla?

Il-qima u t-talb huma l-aħjar mezzi biex niksbu l-qrubija ta’ Alla. Meta persuna tqim lill-Ħallieq tagħha u waqt il-qima titlob minnu l-għarfien, il-fehim u l-għajnuna, Alla l-Għoli jgħin lill-qaddejja Tiegħu u jurihom it-toroq li jwasslu lejh.

Alla jgħid fil-Koran Imqaddes (29:70): “Dawk li jistinkaw għalina, żgur li niggwidawhom lejn it-toroq tagħna. Tassew, Alla huwa ma’ dawk li jagħmlu t-tajjeb.”

Jiġifieri, kull min jipprova jsib lil Alla bis-sinċerità kollha, żgur li jsib lil Alla. Kull min jipprova jsaħħaħ ir-rabta tiegħu ma’ Alla, Alla żgur jgħinu.

Imbagħad, biex niksbu l-qrubija ta’ Alla, huwa wkoll importanti ħafna li nagħmlu għemejjel tajbin. L-għemil tajjeb huwa barka kbira. Alla l-Ħanin ikun kuntent bl-għemil tajjeb u permezz tiegħu tinkiseb il-qrubija ta’ Alla.

Bħalma, biex titfejjaq minn marda wieħed irid itemm il-kura kollha tal-mediċina, għax jekk jieħu l-mediċina għal ftit jiem u mbagħad jieqaf, din ma tagħmilx l-effett tagħha, bl-istess mod, biex tinkiseb il-qrubija ta’ Alla, huwa meħtieġ li l-għemejjel tajbin jitkomplew sal-aħħar, tul il-ħajja kollha.

Mhuwiex biżżejjed li wieħed jagħmel għemejjel tajbin għal ftit jiem u mbagħad jidħol fil-ħajja tad-dinja u jaqa’ fid-dnub. Kif huwa meħtieġ li titlesta l-kura tal-mediċina, bl-istess mod huwa meħtieġ li titlesta l-kura tal-għemejjel tajbin, li tinfirex fuq il-ħajja kollha tagħna, sabiex ir-ruħ tkun kompletament imfejqa u r-ruħ tagħna tkun kompletament imsaħħa mill-barkiet ta’ Alla l-Ħanin.

Il-velenu tad-dnub

Flimkien mal-għemejjel tajbin, huwa wkoll meħtieġ li persuna tevita d-dnub. Għax id-dnub huwa bħal velenu. Jekk ikun hemm velenu fil-ġisem tal-bniedem jista’ jibqa’ ħaj? Żgur li le. Bl-istess mod, jekk ikun hemm velenu tad-dnub, ir-ruħ tal-bniedem imut.

Il-Fundatur tal-Komunità Ahmadiyya Musulmana jispjega dan u jgħid li, ftakru sew li d-dnub huwa velenu li, meta persuna tiekol minnu, tinqered. U mhux biss tinqered, iżda titlef ukoll il-qrubija ta’ Alla u ma tibqax denja li tirċievi din il-barka. Iktar ma persuna tkun involuta fid-dnub, iktar titbiegħed minn Alla. U d-dawl li kellu jasal għandha permezz tal-qrubija ta’ Alla jibqa’ jitbiegħed minnha. Hija tidħol fid-dlam u ssir vittma ta’ kull xorta ta’ problemi u diffikultajiet.

Iżda biex Alla jsalvana minn dan ir-riżultat perikoluż, Alla l-Għoli pprovda wkoll mezz. Jekk persuna tuża dan il-mezz, tkun tista’ tevita dan il-qiegħ tal-qerda u terġa’ tikseb il-qrubija ta’ Alla.

X’inhu dan il-mezz? Li nduru lura lejn Alla u nagħmlu indiema sinċiera.

Jiġifieri, jekk isir dnub, li huwa parti min-natura tal-bniedem, dan ma jfissirx li wieħed għandu jibqa’ jagħmel dnub wara l-ieħor. Pjuttost, għandu minnufih idur lejn Alla bl-indiema, jitlob il-maħfra Tiegħu, jitnaddaf minn dak id-dnub u mbagħad jerġa’ jimxi fit-toroq li jwasslu għall-qrubija ta’ Alla u għal rabta aktar qawwija miegħu.

Ir-rabta ma’ Alla

Ir-rabta ma’ Alla hija barka kbira ħafna. Il-Fundatur tal-Komunità Ahmadiyya Musulmana jesprimi dan fil-poeżiji tiegħu b’dan il-mod:

Dawk il-ħżiena qatt ma jsibu għajnuna mingħand Alla;

Hu qatt ma jħalli lill-ġusti u vera qaddejja Tiegħu jintilfu.

Dawk biss ikunu qrib Tiegħu li jitilfu lilhom infushom;

Dawk egoisti ma jsibux triq lejn il-preżenza għolja Tiegħu.

Din hi l-unika triq, għażiż tiegħi, biex titlob li tkun qrib Tiegħu:

Fittex biss l-Għajnuna Tiegħu u ħalli kull mezz ieħor warajk!

Nitolbu lil Alla l-Ħanin biex iżidna fir-rabta tagħna miegħu, jagħtina l-ħila nagħmlu għemejjel tajbin, u jżommna dejjem ’il bogħod mit-toroq tad-dnub, filwaqt li jżidna fil-ġustizzja u fit-tjieba. B’hekk, inkunu wirtu l-barkiet ta’ Alla f’din id-dinja, u fil-ħajja li ġejja nkunu werrieta tal-Ġonna eterni Tiegħu. Ammen.

Posted in Ahmadiyya Malta, Article | Tagged , , , , , , , , , , , , , | Leave a comment

How to Protect Ourselves from Satan

Posted on August 30, 2026 by Laiq Ahmed Atif

iStock.com/Stanciuc

Kif Nipproteġu lilna Nfusna mix-Xitan

It-Torċa, 30.08.2026 | IMAM Laiq Ahmed Atif — amjmalta@gmail.com

Ix-Xitan ilu għadu tal-bniedem mill-bidu nett u dejjem se jibqa’ għadu tiegħu. L-għadwa tax-Xitan mhijiex ġlieda fejn jiġi quddiem il-bniedem u jiġġieled miegħu wiċċ imb wiċċ. Minflok, juża diversi skużi, qerq u inganni, kif ukoll it-tentazzjonijiet tal-ħajja. Huwa jipprova jqajjem ix-xewqat u l-egoiżmu tal-bniedem, u ftit ftit iwasslu biex jitbiegħed mill-għemejjel tajbin u jersaq lejn il-ħażin.

Alla l-Ħanin jiġbed l-attenzzjoni tal-fidili lejn dan u jgħidilhom biex dejjem ikunu attenti mill-attakki tax-Xitan. Alla li Jista’ Kollox jispjega li anke meta persuna taċċetta l-fidi, ix-Xitan ma jħallihiex waħedha. Hu jibqa’ jipprova jqarraq biha u jtellifha mit-triq it-tajba. Alla jgħid fil-Koran Imqaddes:

“Intom li temmnu, timxux fil-passi tax-Xitan. Min jimxi fil-passi tiegħu għandu jkun jaf li Xitan jwassal lin-nies għal dak li hu faħx, immorali u ċarament ħażin. Kieku ma kienx għall-grazzja u l-ħniena ta’ Alla fuqkom, ħadd minnkom qatt ma kien ikun safi u pur. Iżda Alla jsaffi u jippurifika lil min irid Hu. Alla jisma’ kollox u jaf kollox.” (Il-Koran, 24:22)

Il-bibien tal-ħniena u tal-grazzja ta’ Alla

Ħafna nies jaqgħu fin-nassa tal-inganni tax-Xitan u jisimgħu dak li jgħidilhom, u b’hekk jitbiegħdu mit-triq it-tajba. Għalhekk, il-periklu tax-Xitan huwa periklu kbir ħafna. Hija biss il-grazzja speċjali ta’ Alla li tista’ ssalva lill-bniedem minn dan il-periklu kbir.

Fl-aħħar ta’ dan il-vers, Alla jagħti lill-fidili serħan il-moħħ billi jiddeskrivi lilu nnifsu li, “Alla huwa Dak li jisma’ kollox.” Għalhekk, ħabbtu fuq il-bieb Tiegħu, sejħulu u ibqgħu sejħulu b’persistenza. Ibqgħu umli quddiemu fit-talb.

Għalhekk, dejjem dur lejn Alla meta jkollok bżonn. Dejjem fittex l-għajnuna Tiegħu biex jipproteġik mill-attakki tax-Xitan. Dejjem inżel għarkopptejk quddiem Sidek, u itolbu jipproteġik minn kull ħażen, immoralità u għemil bla ħniena li Satana jħajrek tagħmel.

Kull darba li ssejjaħ lill-Mulej tiegħek, issib il-bibien tal-ħniena u tal-grazzja Tiegħu miftuħin beraħ għalik. Huwa jipproteġik minn Xitan u minn kull ħażen li jipprova jħajrek għalih. Għax Alla jisma’ kollox, Alla huwa Ħanin, u Alla għandu setgħa fuq kollox.

In-nases u l-inganni tax-xitan

Dan huwa minnu għax meta x-Xitan qal lil Alla li, jekk jingħata l-permess, se jattakka lill-bniedem minn kull naħa u jipprova jtellfu t-triq b’kull mezz. Iżda dawk li huma qaddejja veri u sinċieri ta’ Alla se jibqgħu protetti mill-attakki tiegħu. Il-pjanijiet u l-attakki tiegħu ma jkollhomx effett fuqhom. Iżda ħafna nies oħra se jimxu warajh.

Alla ta lix-Xitan il-permess biex jipprova jagħmel dan, iżda fl-istess ħin wissa li dawk li jagħżlu li jimxu wara x-Xitan se jkollhom il-kastig tal-Infern.

Meta Xitan talab il-permess mingħand Alla, Alla qallu b’mod ċar li l-qaddejja veri Tiegħu qatt mhu se jiġu mqarrqa mill-qerq u t-tentazzjonijiet tiegħu. Huma jibqgħu dejjem sodi fil-fidi tagħhom u jimxu fit-triq tas-sewwa. Alla jgħid fil-Koran Imqaddes: “Verament, li ma għandek ebda setgħa fuq il-qaddejja Tiegħi.” (15:43)

Fl-istess ħin, Alla li Jista’ Kollox bagħat il-profeti Tiegħu biex juru lill-bnedmin it-triq it-tajba. Għallimhom kif jirranġaw lilhom infushom u kif itejbu ħajjithom.

Kif nista’ nsir qaddej veru ta’ Alla?

Fidil veru għandu jistaqsi lilu nnifsu: Kif nista’ nsir wieħed mill-qaddejja sinċieri ta’ Alla?

Biex persuna ssir qaddejja sinċiera ta’ Alla, Alla tana t-triq fil-vers imsemmi hawn fuq: għandna nipproteġu lilna nfusna minn kull ħaġa li hija indeċenti, ħażina, vojta, bla siwi jew li Alla ma jħobbx.

Min jipproteġi lilu nnifsu minn dawn l-affarijiet, il-ħniena ta’ Alla tippurifikah u jsaffih; u min jiġi purifikat minn Alla isir pur, piju u ġust. Meta persuna tasal għal din il-purità, ix-Xitan ma jkunx jista’ jersaq lejha bl-istess mod.

Għandna niftakru wkoll li l-attakk tax-Xitan ma jseħħx f’daqqa. Huwa jattakka ftit ftit. Huwa jista’ jdaħħal xi ħaġa żgħira u ħażina fil-qalb ta’ persuna u jġiegħelha taħseb: X’differenza tagħmel din il-ħaġa żgħira? Mhijiex dnub kbir.

Imbagħad dawn id-dnubiet żgħar jistgħu jsiru l-ewwel pass li jwassal lill-persuna lejn dnubiet akbar.

Mhuwiex biss serq jew qtil li għandhom jitqiesu bħala dnubiet kbar. Kull ħaġa ħażina li teqred il-paċi u s-serħan tal-komunità tista’ ssir ħażen kbir. Bil-mod il-mod, persuna tista’ titlef l-għarfien ta’ kemm dak li qed tagħmel huwa ħażin.

Timxux fil-passi tax-Xitan

Għalhekk, Alla li Jista’ Kollox jgħallimna li jekk irridu nsiru puri u jekk irridu niksbu l-pjaċir ta’ Alla, għandna nistinkaw kontinwament biex nibqgħu ’l bogħod mill-ħażin u ma nimxux wara l-passi tax-Xitan.

Fl-istess ħin, għandna dejjem infittxu l-protezzjoni ta’ Alla, nitolbuh jgħinna u nkomplu nippurifikaw lilna nfusna. Għandna nsejħu lil Alla kontinwament, f’kull ħin, u nitolbuh għall-għajnuna Tiegħu. Mingħajr l-għajnuna ta’ Alla, ma nistgħux nibqgħu siguri mill-attakki tax-Xitan.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , , , , , , | Leave a comment

Id-Dawl 103

Posted on August 30, 2026 by Laiq Ahmed Atif

ID-DAWL 103 — JULY 2026

Id-Dawl 103Download
Posted in Ahmadiyya, Ahmadiyya Malta, Id-Dawl, Id-Dawl Magazine | Tagged , , , , , , , , , , , , , , , , , , , , | Leave a comment

Id-Dawl 102

Posted on August 30, 2026 by Laiq Ahmed Atif

ID-DAWL 102 — JUNE 2026

Id-Dawl 102Download
Posted in Ahmadiyya, Ahmadiyya Malta, Id-Dawl, Id-Dawl Magazine | Tagged , , , , , , , , , , , , , , , , , , | Leave a comment

Id-Dawl 101

Posted on August 30, 2026 by Laiq Ahmed Atif

ID-DAWL 101 — MAY 2026

Id-Dawl 101Download
Posted in Ahmadiyya, Ahmadiyya Malta, Id-Dawl, Id-Dawl Magazine | Tagged , , , , , , , , , , , , , , , , , , , , , , | Leave a comment

Id-Dawl 100

Posted on August 30, 2026 by Laiq Ahmed Atif

ID-DAWL 100 — APRIL 2026

Id-Dawl 100Download
Posted in Ahmadiyya, Ahmadiyya Malta, Id-Dawl, Id-Dawl Magazine | Tagged , , , , , , , , , | Leave a comment

Where there is a will, there is always a way

Posted on August 27, 2026 by Laiq Ahmed Atif

MIN IRID, ISIB IT-TRIQ

In-Nazzjon, 26.08.2026 | Imam Laiq Ahmed Atif — amjmalta@gmail.com

Fid-dinja nsibu u nirċievu ħafna rigali ta’ valur, imma għall-ġenituri l-isbaħ rigal huwa wliedhom, u b’mod speċjali għall-ommijiet, uliedhom huma l-aqwa rigal li qatt setgħu jirċievu. Darba qrajt qawl sabiħ li jgħid li, “Omm hija l-ewwel imħabba vera ta’ binha. Iżda għall-omm, iben huwa l-aħħar imħabba ta’ ommu.”

Kemm hu sabiħ. Bla dubju ta’ xejn kull omm tħobb lil uliedha bla għadd, tabilħaqq, aktar minnha nfisha. Għalhekk, il-kelma “l-aħħar” fil-qawl ta’ hawn fuq jista’ jinftiehem ukoll bħala l-akbar imħabba ħelwa u vera tagħha. U għaliex ma jkunx hekk? Għax uliedhom huma demmhom stess; huma parti minn ġisimhom u minn ruħhom, u l-ġenituri jħobbu lil uliedhom għax huma “biċċa waħda” minnhom.

Kif it-tfal huma l-akbar sors ta’ ferħ għall-ġenituri tagħhom, hekk ukoll it-tbatija u n-niket tagħhom huma l-akbar sors ta’ uġigħ għall-ġenituri. Din it-tbatija ssir saħansitra akbar meta l-ġenituri jsiru jafu li binhom jew binthom qed jużaw id-droga jew is-sustanza. Dan ifisser li wliedhom tilfu t-triq it-tajba u bdew jimxu fit-triq il-ħażina.

Il-vizzju tad-droga huwa bħal ħakk

It-triq tad-droga hija triq mudlama u mimlija tbatija, fejn f’kull pass l-uġigħ ikompli jiżdied. Fit-tfittxija għall-paċi, il-persuna tibqa’ ddur bla kwiet, imma l-paċi vera tibqa’ ħafna ’l bogħod. Il-persuna timxi f’mina mudlama biex issib id-dawl, iżda ssib li l-mina qatt ma tispiċċa.

Dawk li jużaw id-droga ħafna drabi jaħsbu li qed isibu serħan u mistrieħ, imma dan is-serħan temporanju fl-aħħar iwassal għal tbatija li tibqa’. Huwa bħal persuna li jkollha ħakk; meta tobrox il-post, tħoss serħan għal ftit ħin, imma wara ftit jibda joħroġ id-demm, u l-ħakk li kien jidher li qed jagħti serħan jinbidel f’ferita.

Iċ-ċerimonja annwali tal-Caritas

F’Ġunju kelli l-opportunità nattend iċ-ċerimonja annwali tal-gradwazzjoni ta’ Caritas Malta. Din iċ-ċerimonja annwali ssir biex tagħti rikonoxximent u kuraġġ lil dawk li, bil-kuraġġ, bid-dedikazzjoni, bit-talb u bil-għajnuna ta’ nies professjonisti, irnexxielhom jegħlbu d-dipendenza tagħhom fuq id-droga. Fl-istess ħin, twassal messaġġ lis-soċjetà li d-droga hija biss triq ta’ telf. Ma ġġib xejn ħlief qerda; mill-bidu sal-aħħar, toffri biss ħsara.

Storja ta’ omm ta’ uġigħ u qsim il-qalb

Matul iċ-ċerimonja smajna wkoll l-istorja ta’ omm li d-dinja tagħha nbidlet kompletament ta’ taħt fuq meta saret taf li binha kien qed juża d-droga. Kollox madwarha deher imfarrak. Kien mument ta’ xokk u konfużjoni għaliha. Imbagħad bdew ġejjin mistoqsijiet bla tmiem: Kif wasal sa hawn? Kien hemm xi nuqqas fit-trobbija tiegħi? Fejn żbaljajt? Kif ma ndunajtx qabel? Xi stajt għamilt aħjar? Għaliex ibni spiċċa priġunier ta’ dan il-vizzju? X’kien se jiġri minnu? Il-lista ta’ mistoqsijiet dehret li qatt ma kienet se tispiċċa.

Din l-omm irrakkontat li, “Minn hemm bdiet mixja iebsa, u twila… Għaddejna minn ħafna tbatija. Il-vizzju ma jolqotx biss lill-persuna li tkun qed tbati minnu — jolqot lill-familja kollha. Jisraq il-paċi tad-dar, iġib tensjoni kontinwa. Ibni sar bniedem ma nafuhx, u kellna nitgħallmu naċċettaw ir-realtà kif kienet, u ma nħarsux biss lejn id-dlam li ġabet magħha din il-problema, imma nfittxu dik ix-xrara żgħira ta’ tama.”

Qalet li, “kien hemm ġranet fejn kont inqum b’toqol kbir u norqod b’qalbi miksura. Kull darba li kien joħroġ mid-dar kont nistenna li nerġa’ narah lura. Kull telefonata kienet iġġib magħha mument ta’ paniku. Kont ngħix b’ansjetà kontinwa u biża’ ta’ x’kien ser jigri minn mument għall-ieħor.”

Iżda meta nduna li qabad it-triq il-ħażina, hu ħa pawża, ħaseb, evalwa, u ddeċieda li jibdel it-triq mid-droga lejn in-normalità. Min irid, isib it-triq. Sab il-bibien ta’ Caritas miftuħa u minn hemmhekk beda l-vjaġġ pożittiv u wasal fejn riedu.

Lezzjonijiet importanti minn din l-istorja vera u ħajja

Dan u ħafna stejjer oħrajn simili jiġbdu l-attenzjoni tagħna lejn xi lezzjonijiet importanti ħafna li rridu nitgħallmu.

L-ewwel nett, għandna nibnu relazzjoni b’saħħitha bejn il-ġenituri u wliedna, u nħeġġu djalogu regolari u miftuħ dwar l-isfidi u r-realtajiet ta’ madwarna. It-tfal għandhom jiġu mgħallma dwar il-ħsara u l-perikli tad-droga, kif ukoll dwar vizzji u problemi soċjali oħra.

It-tieni nett, it-tfal għandhom dejjem ikunu sensittivi għas-sentimenti tal-ġenituri tagħhom. Qatt m’għandhom jieħdu l-imħabba u s-sagrifiċċji tal-ġenituri tagħhom for granted. Minflok, għandhom jikbru bħala persuni responsabbli li jiddiskutu d-deċiżjonijiet importanti mal-ġenituri tagħhom, għax il-ġenituri huma l-aqwa gwida tagħhom u dawk li jixtiqulhom l-aħjar fil-ħajja.

It-tielet nett, it-tfal għandhom dejjem iżommu f’moħħhom li l-iżbalji u l-għażliet ħżiena tagħhom jistgħu jġibu uġigħ u tbatija kbira lill-ġenituri tagħhom. Għalhekk, għandhom jieħdu ħsieb il-ġenituri tagħhom u qatt ma jsiru kawża ta’ niket jew tbatija għalihom. Minflok, għandhom dejjem jagħmlu ħilithom biex jonoraw, jirrispettaw u jaqdu lill-ġenituri tagħhom bl-aħjar mod li jistgħu.

Jalla Alla li Jista’ Kollox ibierek lil uliedna kollha b’suċċess u kisbiet sbieħ f’kull stadju ta’ ħajjithom, u jħarishom taħt il-protezzjoni u l-ħniena Tiegħu minn kull ħażen u kull vizzju soċjali. Jalla jagħti wkoll lill-ġenituri l-ferħ li jaraw lil uliedhom jikbru bħala persuni twajba, responsabbli u ta’ suċċess. Ammen.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , , , , , | Leave a comment

The World is a Field for the Hereafter

Posted on August 23, 2026 by Laiq Ahmed Atif

Image: MalikNalik/Shutterstock.com

Id-Dinja hija l-Għalqa tal-Ħajja ta’ Wara

Meta nimlew ħajjitna bi kliem ta’ ġid, b’imġiba tajba, bl-onestà, bit-talb, bl-imħabba u bil-qima lejn Alla, bl-għajnuna lill-foqra, bir-rispett lejn il-familja, bil-verità, bil-fedeltà, bit-tjieba u bis-safa tal-qalb, inkunu qegħdin niżirgħu żerriegħa tajba li, fiż-żmien tagħha, tagħti dejjem frott abbundanti, bnin u ħelu.

It-Torċa, 23.08.2026 | IMAM Laiq Ahmed Atif — amjmalta@gmail.com

“Id-dinja hija l-għalqa tal-ħajja ta’ wara.” F’dawn il-ftit kliem, il-Qaddis Profeta Muħammad, is-sliem għalih, għallem verità kbira. Jekk bniedem jaħseb fuqha u jgħix skontha, jista’ jsib il-ġid kemm f’din id-dinja kif ukoll fil-ħajja ta’ wara.

Fil-ħajja naraw li dak li jiżra’ l-bniedem, dak jaħsad. Jekk jiżra’ qamħ, jikber qamħ. Jekk jiżra’ xgħir, jikber xgħir. Bl-istess mod, l-għemejjel tajbin jagħtu frott tajjeb, u l-għemejjel ħżiena jwasslu għal riżultati ħżiena.

Għalhekk għandna dejjem niftakru li kull għemil għandu konsegwenza. Meta nimlew ħajjitna bi kliem tajjeb, imġiba tajba, onestà, qima lejn Alla, talb, imħabba lejn Alla, għajnuna lill-foqra, rispett lejn il-familja, verità, fedeltà, tjieba u biża’ minn Alla, inkunu qed niżirgħu żerriegħa tajba. Alla jbierek dawn l-għemejjel u jagħtina l-frott tagħhom kemm f’din id-dinja kif ukoll fil-ħajja ta’ wara. Tabilħaqq, il-premju tal-ħajja wara l-mewt ikun ħafna akbar u isbaħ, għax din hija ħajja eterna.

Id-dinja u r-reliġjon jeħtieġu ħidma

Il-Fundatur tal-Komunità Ahmadiyya Musulmana jgħid li, “Ir-reliġjon u d-dinja t-tnejn jeħtieġu sforz u ħidma. Għalhekk aħdem u fittex, u tkunx għażżien.”

Dan ifisser li kull suċċess, kemm jekk hu ta’ din id-dinja kif ukoll spiritwali, jeħtieġ sforz, ħidma u perseveranza kontinwa. Jeħtieġ nitolbu lil Alla. Jeħtieġ nagħmlu sagrifiċċji. Huwa biss wara dan li wieħed jikseb is-suċċess.

Li wieħed jaħseb jew jagħmel pjan biss mhuwiex biżżejjed. Pereżempju, jekk xi ħadd jixtieq imur Għawdex iżda ma jibdiex il-vjaġġ tiegħu, jista’ jasal Għawdex? Żgur li le. Bl-istess mod, mingħajr sforz u ħidma, lanqas is-suċċess spiritwali ma jista’ jinkiseb.

Bl-istess mod, biex insibu lil Alla u nimxu fit-triq it-tajba rridu nagħmlu sforz. Kif wieħed ma jistax isir tabib, avukat jew inġinier mingħajr studju u xogħol iebes, hekk ukoll ma jistax jikseb il-qrubija lejn Alla u t-tjieba mingħajr sforz.

Bħall-bidwi jħejji l-art, irridu nħejju qalbna u moħħna

Il-bidwi jagħżel art tajba, iħejjiha, jaħritha, u wara jiżra’ ż-żerriegħa. Imma x-xogħol ma jispiċċax hemm. Hu jkompli jieħu ħsieb il-wiċċ tar-raba’ sakemm jasal iż-żmien tal-ħsad.

L-istess jiġri fil-ħajja spiritwali. Irridu nħejju qalbna u moħħna, ngħixu f’ambjent tajjeb, nagħmlu għemejjel tajbin u nibqgħu naħdmu fuqna nfusna biex nikbru fil-fidi u fit-tjieba.

Kif il-bidwi jaħsad dak li jkun żera’, hekk ukoll il-bniedem jirċievi skont l-għemejjel tiegħu. Siġra li tagħti frott ħelu tipproduċi frott ħelu, u żerriegħa ħażina tagħti frott ħażin. Is-siġar tal-larinġ jagħtu larinġ, u s-siġar taż-żebbuġ jagħtu żebbuġ. Bl-istess mod, l-għemejjel tajbin iġibu l-barka ta’ Alla, waqt li l-għemejjel ħżiena jwasslu għad-dispjaċir u l-kastig.

Imberkin huma dawk li…

Għandna dejjem niftakru li din id-dinja hija biss post temporanju. Il-ħajja vera hija dik ta’ wara l-mewt. Għalhekk irridu nippreparaw għaliha billi nagħmlu għemejjel tajbin.

Imbierek il-bniedem li jqatta’ lejl u nhar jiġbor provvista u teżor għall-Ħajja Eterna. Imberkin dawk li jkabbru l-ħsad tat-tjieba. Imberkin dawk li jiżirgħu ż-żerriegħa tal-pjetà u s-safa. Henjin dawk li jħawlu għemejjel tajbin u ta’ virtù li jagħtu frott ħelu.

Imberkin dawk li ma jqattgħux il-ħin kollu mħassbin biss bl-affarijiet ta’ din id-dinja, iżda dejjem jagħmlu sforz u jistinkaw biex ikollhom tmiem imbierek. Imberkin dawk li għandhom fidi f’Alla u jemmnu fil-wegħdiet Tiegħu.

Imberkin dawk li jagħtu prijorità lil Alla li Jista’ Kollox fuq kull ħaġa oħra, għax lilhom tingħata prijorità fis-Sema. Imberkin dawk li jqisu l-kelma ta’ Alla b’unur u rispett, għax lilhom tingħata ġieħ u dinjità fis-Saltna Divina.

Id-dinja hija biss post temporanju

Din il-ħajja mhijiex kollox. Hija żmien ta’ tħejjija għall-ħajja eterna. Bħalma student jistudja sena sħiħa biex jgħaddi mill-eżamijiet, hekk ukoll għandna nqattgħu ħajjitna nippreparaw għall-ħajja wara l-mewt.

Alla ma jgħidx li ma għandniex ingawdu l-barkiet tad-dinja. Imma jgħid li m’għandniex ninsew id-dmirijiet tagħna lejn Alla waqt li nfittxu l-affarijiet tad-dinja.

Il-Fundatur tal-Komunità Ahmadiyya Musulmana jgħid: “Dawk li jersqu lejn Alla ma jagħmlux lid-dinja l-akbar għan tagħhom. Id-dinja ssir qaddejja tagħhom. Imma dawk li jagħmlu lid-dinja l-uniku għan tagħhom, fl-aħħar jispiċċaw umiljati.”

Għalhekk għandna dejjem niftakru fil-kliem: “Id-dinja hija għalqa fejn nippreparaw, niżirgħu u nikkultivaw għall-ħajja eterna.”

Dak li niżirgħu llum, dak se naħsdu għada. Nitolbu lil Alla jagħtina l-qawwa biex nagħmlu għemejjel tajbin, inkunu sinċieri, nitolbu b’mod regolari, naqdu lill-oħrajn u ngħixu l-ħajja tal-pjetà u s-safa sabiex fil-Jum tal-Ġudizzju nirċievu l-frott sabiħ tal-għemejjel tagħna. Ammen.

Posted in Ahmadiyya, Ahmadiyya Malta, Article | Tagged , , , , , , , , , , , , , , , , , , , , , , , | Leave a comment

Let’s get away from the edge before it’s too late

Posted on August 16, 2026 by Laiq Ahmed Atif

NERSQU ’L BOGĦOD MIX-XIFER QABEL MA JKUN TARD WISQ

It-Torċa, 16.08.2026 | IMAM Laiq Ahmed Atif – amjmalta@gmail.com

Qatt rajt lil xi ħadd li huwa sinjur ħafna u għandu kull kumdità tad-dinja, iżda fl-istess ħin qed ibati minn marda serja? Tista’ persuna bħal din tassew tgawdi jew tibbenefika minn dawk il-barkiet? L-istess prinċipju japplika għad-dinja. Nazzjon jista’ jkollu ġid kbir, negozji li sejrin tajjeb, u tkabbir ekonomiku qawwi, iżda mingħajr paċi u sigurtà, dawn il-kisbiet jitilfu ħafna mill-valur tagħhom. Meta ma jkunx hemm paċi, il-prosperità materjali titlef it-tifsira tagħha. Fil-qosor, il-paċi hija l-pedament tal-prosperità tagħna u ta’ ħajja umana b’tifsira.

Billi jagħraf kemm il-paċi hija importanti, il-Kap Dinji tal-Komunità Ahmadiyya Musulmana, il-Qdusija Tiegħu Ħażrat Mirża Masroor Aħmad, jibqa’ jfakkar lid-dinja fir-responsabbiltajiet tagħha biex tistabbilixxi paċi dejjiema. Huwa jenfasizza l-ostakli ewlenin li jfixklu l-kisba tal-paċi u joffri gwida prattika, u soluzzjonijiet biex tinbena dinja aktar paċifika.

Ftit ġimgħat ilu, waqt li kien qed jindirizza laqgħa dwar il-paċi, il-Qdusija Tiegħu enfasizza diversi prinċipji importanti biex tinkiseb paċi dejjiema. F’dan l-artiklu, nixtieq nippreżenta xi wħud mill-punti ewlenin mid-diskors tiegħu għall-benefiċċju tal-qarrejja tagħna.

Huwa spjega li, l-Iżlam jgħallimna li għandna naħdmu għall-ġid komuni bla waqfien u m’għandna qatt naqtgħu qalbna. U x’hemm aktar ta’ benefiċċju milli tħabrek biex issalva lill-umanità mill-qerda tagħha stess? Jekk ma nippruvawx inwaqqfu l-ġlied, il-vjolenza, il-mibegħda u l-inġustizzja li qegħdin jagħmlu ħsara kbira lit-tessut tas-soċjetà moderna b’rata mgħaġla, dan mhux biss se joħloq devastazzjoni totali fi żminijietna, imma se jitfa’ dell twil fuq il-ħajjiet tal-ġenerazzjonijiet futuri.

Għaliex qed niġġieldu kontra wliedna u wlied uliedna?

Huwa enfasizza t-theddid tal-armi nukleari u staqsa li, minflok ma qegħdin iħallu liċ-ċittadini komuni jibnu ħajjiet aħjar għall-familji tagħhom, għalfejn il-mexxejja tad-dinja qegħdin iressqu lill-umanità lejn il-preċipizju ta’ diżgrazzja inkonċepibbli?

Tassew, bħala bnedmin, irridu nistaqsu lilna nfusna għaliex qed niġġieldu mhux biss kontra xulxin, iżda wkoll kontra wliedna, kontra n-neputijiet tagħna u kontra l-ġenerazzjonijiet futuri.

Wieħed mill-prinċipji fundamentali tal-Iżlam huwa li wieħed għandu jixtieq għall-oħrajn dak li jixtieq għalih innifsu. Jiena nemmen bis-sħiħ li kieku nagħtu kas ta’ dan il-prinċipju tad-deheb, kieku d-dinja tinbidel f’ġenna ta’ paċi u fehim.

It-twaqqif tal-paċi u l-armonija

Matul żjara li għamel fit-Turkija, il-Papa Ljun iddikjara li t-Tielet Gwerra Dinjija qiegħda sseħħ diġà bil-biċċiet u li l-ġejjieni tal-umanità jinsab f’periklu kbir.

Għalhekk, id-dinja għandha bżonn urġenti li n-nies jingħaqdu b’għan wieħed: it-twaqqif tal-paċi u l-armonija. Il-Komunità Ahmadiyya Musulmana minn dejjem kienet fuq quddiem nett ta’ dan l-isforz u se tibqa’ tkun. Aħna norganizzaw l-attivitajiet bit-tama li jkattru l-fehim reċiproku u, forsi, jnebbħu lil xi wħud biex jaħdmu għall-kawża tal-paċi. Kien bl-istess skop f’moħħi li għadd ta’ snin ilu jiena ktibt lil diversi mexxejja tad-dinja biex inħeġġiġhom iwarrbu d-differenzi ta’ bejniethom u jaħdmu flimkien għall-ġid tal-umanità.

Barra minn hekk, il-ksib tal-paċi jeħtieġ ukoll spirtu ta’ sagrifiċċju. Ma jistax ikun li nazzjon jistenna l-konċessjonijiet mingħand ħaddieħor u huwa jirrifjuta li jagħmel tiegħu. Għalkemm jiena nitħaddet minn perspettiva Iżlamika, nemmen bis-sħiħ li l-ġustizzja hija prinċipju universali li jservi bħala garanzija għall-paċi f’kull livell tas-soċjetà u fost in-nies ta’ kull reliġjon u twemmin. Id-differenzi reliġjużi m’għandhom qatt iġiegħlu persuna twarrab l-għerf ta’ segwaċi ta’ fidi jew tradizzjoni oħra.

Il-qalb komuni tal-umanità tixtieq il-paċi

Minkejja r-realtijiet inkwetanti globali, jiena nemmen bis-sħiħ li, filwaqt li ċerti individwi u nazzjonijiet jixxennqu għall-poter, ir-rikkezzi u r-riżorsi tal-oħrajn, il-qalb komuni tal-umanità tixtieq sempliċiment li tgħix fil-paċi.

Kull persuna, għalhekk, għandha sehem x’tagħti, u l-urġenza ta’ dik il-parteċipazzjoni tinħass ma’ kull jum li jgħaddi. Għaldaqstant ma nistgħux naħsbu biss fina nfusna. Minflok, kollha kemm aħna għandna d-dmir li naħsbu fid-dinja li se nħallu warajna għal uliedna u għal dawk li se jsegwuna.

Ejja naġixxu issa ħalli dawk li ġejjin warajna jistgħu jirtu dinja mimlija sliem u prosperità u mhux jittaqqlu bil-piż tal-fallimenti tagħna. Ejja naġixxu issa ħalli niffrankaw il-ħars ikrah ta’ wliedna, li se jsaqsu għalfejn ħallejnielhom dinja li qiegħda taqbad.

Talba sinċiera lil Sidna

Jalla Alla Omnipotenti jgħin lill-bniedem jifhem il-gravità ta’ din is-siegħa, u jalla n-nies kollha, anki ta’ reliġjonijiet u twemmin differenti, jingħaqdu flimkien bl-għan komuni li jistabbilixxu l-paċi fid-dinja. Jalla s-sħab iswed tal-gwerra li jittajjar b’theddida fuqna lkoll jgħib u jħalli warajh smewwiet koħol ċari ta’ paċi, imħabba u kompassjoni. Ammen.

Posted in Ahmadiyya, Ahmadiyya Malta, Ahmadiyya: The True Islam, Article | Tagged , , , , , , , , , , , , , , , , , , , , , , , | Leave a comment

Protecting Our Climate, Protecting Our Future

Posted on August 9, 2026 by Laiq Ahmed Atif

Image: By-Studio/Shutterstock.com

INĦARSU L-KLIMA TAGĦNA, INĦARSU L-FUTUR TAGĦNA

It-Torċa, 09.08.2026 | Imam Laiq Ahmed Atif — amjmalta@gmail.com

L-Ewropa bħalissa qed tgħaddi minn waħda mill-ikbar mewġiet ta’ sħana li qatt ġew irreġistrati, u Malta hija wkoll milquta. Fit-18 ta’ Lulju, l-ogħla temperatura rreġistrata f’Malta matul is-sena 2026 kienet ta’ 43.3°C, rekord ġdid għax-xahar ta’ Lulju f’Malta. Barra minn hekk, f’Malta u madwar l-Ewropa ġew irrappurtati ħafna nirien li mhux biss ġiegħlu lin-nies jitilqu minn djarhom, iżda wkoll għamlu ħsara kbira lill-ambjent u lill-proprjetà.

Dak li qed jiġri quddiem għajnejna huwa biss riflessjoni ta’ dak li qed jiġri madwar il-kontinent Ewropew kollu u, b’estensjoni, madwar id-dinja kollha. L-Ewropa hija l-aktar kontinent fid-dinja li qed jisħon malajr. Skont is-Servizz Ewropew Copernicus dwar it-Tibdil fil-Klima, mit-tmeninijiet ’l hawn it-temperaturi żdiedu darbtejn aktar malajr mill-medja globali.

Fl-aħħar erba’ snin, aktar minn 200,000 persuna madwar l-Ewropa mietu minħabba kawżi marbuta mas-sħana, u l-biċċa l-kbira ta’ dawn l-imwiet setgħu ġew evitati, qalet dan l-Uffiċċju Ewropew tal-Organizzazzjoni Dinjija tas-Saħħa.

Sitwazzjoni serja ħafna

Dan juri b’mod ċar l-impatt tat-tibdil fil-klima fl-Ewropa u madwar id-dinja kollha. Din hija sitwazzjoni serja ħafna li teħtieġ l-attenzjoni ta’ kull wieħed u waħda minna, tal-umanità kollha. Aħna lkoll għandna nagħmlu l-parti tagħna biex id-dinja tagħna tkun aktar sostenibbli u timxi ’l quddiem b’rispett lejn l-ambjent.

Ix-xjenzati ilhom iwissu li t-tibdil fil-klima qed iżid kemm il-frekwenza kif ukoll l-intensità tas-sħana u n-nixfa. Dan il-global warming huwa ta’ tħassib kbir, speċjalment meta nqisu n-nirien u l-mewġa ta’ sħana li rajna fl-aħħar ġimgħat.

Riċentement, il-Kap tal-Komunità Ahmadiyya Musulmana ġie mistoqsi dwar ir-raġunijiet tat-tibdil fil-klima, minbarra dawk magħrufa sew. Huwa wieġeb: “Wieħed mill-fatturi ta’ dan it-tibdil fil-klima huwa ż-żieda fil-popolazzjoni. Il-popolazzjoni tad-dinja qed tkompli tikber, il-qtugħ tas-siġar qed ikompli u dejjem qed jinqatgħu aktar siġar, filwaqt li l-użu tal-karozzi qed ikompli jiżdied ħafna.”

Imbagħad il-Qdusija Tiegħu ta eżempju billi qal li llum il-ġurnata, anke jekk wieħed ikollu jmur post qrib, xorta waħda jagħżel li jsuq il-karozza minflok jimxi. Huwa qal li t-tibdil fil-klima huwa proċess naturali li jiġri waħdu, iżda l-azzjonijiet tal-bniedem ħadmu bħal fann li qed iħaffef dan il-proċess.

Ġustizzja ambjentali

Iddiskutejna ħafna u nafu x’inhu qed jikkawża t-tisħin globali u x’inhuma l-affarijiet li qed ibiddlu l-klima tagħna. Issa wasal iż-żmien li nżidu l-isforzi tagħna biex mhux biss nikkontrollaw il-ħsara, iżda wkoll nibdlu l-prijoritajiet tagħna fir-rigward tal-klima u ambjent sostenibbli.

Kelma waħda importanti li tiġi f’moħħi hija “ġustizzja”, jiġifieri li rridu nagħmlu ġustizzja mal-ambjent tagħna jekk irriduh ikun sostenibbli, b’saħħtu u prosperu. Il-ġustizzja ambjentali hija pass importanti biex nibnu dinja b’ambjent aktar b’saħħtu. Irridu noqogħdu attenti ħafna kif nużaw ir-riżorsi naturali li għandna, b’mod ġust u sostenibbli, biex ma noħolqux żbilanċ fil-klima. Irridu nagħżlu metodi sostenibbli biex inżommu dan il-bilanċ.

X’inhi t-triq ’il quddiem?

Kif jgħid il-qawl, ‘prevention is better than cure.’ Għalhekk, id-dinja trid tinvesti aktar fil-prevenzjoni ta’ aktar ħsara lit-tibdil fil-klima u lit-tisħin globali, mhux biss fil-ġlieda kontrihom. Irridu nieħdu passi konkreti biex ma nħallux is-sitwazzjoni tmur għall-agħar.

Għandna nagħmlu t-tranżizzjoni lejn enerġija nadifa malajr kemm jista’ jkun, intejbu l-effiċjenza fl-użu tal-enerġija u nużaw metodi naturali u li jirrispettaw l-ambjent. Irridu wkoll nibdlu s-sistemi tat-trasport u noħolqu kultura li tgħin lill-ambjent. Għandna nnaqqsu l-użu tal-karozzi privati, inżidu l-użu tat-trasport pubbliku u nagħżlu mezzi aktar naturali bħall-mixi u r-rota.

M’għandniex naħlu ikel jew enerġija, u dejjem irridu nużawhom b’għaqal. Minflok nużaw diversi fannijiet u air conditioners fid-dar, il-familja kollha għandha tinġabar f’kamra waħda biex tevita l-użu ta’ ħafna fannijiet u air conditioners. Għandna nitfu d-dwal kollha li mhumiex meħtieġa u ma naħlux ilma.

Inħawlu aktar siġar

Irridu nipproteġu u nirrestawraw in-natura, inħawlu aktar siġar u nwaqqfu l-qtugħ tas-siġar. Għandu jkun hemm politika fil-livell tal-gvern li għal kull siġra li tinqata’, jitħawlu għaxar siġar oħra. Għandhom jiġu introdotti skemi nazzjonali li jħeġġu t-tħawwil tas-siġar, u n-nies għandhom jiġu mħeġġa jħawlu siġar fl-ambjent ta’ madwarhom.

In-negozji u l-kumpaniji tal-kostruzzjoni għandhom ukoll ikunu obbligati jevitaw kull ħsara lill-ambjent. Minflok, għandhom jinvestu fit-tħawwil tas-siġar u fil-ħolqien ta’ ambjent b’saħħtu madwar il-proġetti tan-negozju u tal-kostruzzjoni.

Din hija responsabbiltà ta’ kulħadd. Kull wieħed u waħda minna għandu jagħti sehemu biex mhux biss jipprevjeni aktar ħsara, iżda wkoll jirrestawra dak li diġà ġarrab il-ħsara, sabiex il-ġenerazzjonijiet futuri jkunu jistgħu jgawdu s-sbuħija tan-natura minflok iwaħħlu fina għall-ħsara li għamilna lill-klima.

Posted in Ahmadiyya Malta, Article | Tagged , , , , , , , , , , , , , , , , , , , , , , , , , , , , | Leave a comment

What is Humility and Why Does it Matter?

Posted on August 4, 2026 by Laiq Ahmed Atif
Posted in Ahmadiyya Malta, Interviews | Tagged , , , , , , , , , , , , , , , , , | Leave a comment

The Journey from Spiritual Death to Spiritual Life

Posted on August 2, 2026 by Laiq Ahmed Atif

Image: Solarseven/Shutterstock.com

IL-MIXJA MILL-MEWT SPIRITWALI GĦALL-ĦAJJA SPIRITWALI

It-Torċa, 02.08.2026 | Imam Laiq Ahmed Atif — amjmalta@gmail.com

Ħafna drabi nisimgħu nies jitkellmu dwar il-mewt fiżika, li sseħħ meta persuna tmut u r-ruħ tagħha titlaq mill-ġisem fiżiku. Din il-mewt hija ċerta u kull bniedem se jgħaddi minnha kif jgħid Alla li Jista’ Kollox fil-Koran Imqaddes (29:58): “Kull ruħ idduq il-mewt, imbagħad lejna titreġġgħu lura.”

Madankollu, il-Koran Imqaddes isemmi wkoll tip ieħor ta’ mewt u jgħid li l-Profeti ta’ Alla jagħtu l-ħajja lil dawk il-mejtin. X’inhi din il-mewt? X’jgħid Alla dwarha?

Il-Koran jgħid: “Intom li temmnu, wieġbu lil Alla u lill-Messaġġier Tiegħu meta jsejħilkom għal dak li jagħtikom il-ħajja.” (Il-Koran, 8:25)

Jekk naħsbu sew fuq dan il-vers, naraw li Alla mhux qed jitkellem dwar il-mewt fiżika, għax qed jindirizza lil dawk li diġà huma ħajjin u jemmnu. Allura, liema mewt hi din li minnha Alla jrid li l-fidili biex jiġu għand il-messaġġiera sabiex jagħtihom il-ħajja?

Li tkun ħaj mill-ġdid

Il-kliem “jagħtikom il-ħajja” għandu tifsira kbira. Il-Profeti ta’ Alla dejjem isejjaħu lin-nies biex jagħtuhom ħajja ġdida. Imma din mhix ħajja fiżika. Hija ħajja spiritwali.

Alla, fil-ħniena Tiegħu, bagħat Profeti u Messaġġiera tul l-istorja umana biex jiggwidaw u jtejbu lill-umanità. Il-Profeti jiġu  fid-dinja meta n-nies ikunu tbiegħdu minn Alla u l-ispiritwalità, il-moralità u t-tjubija jkunu naqsu ħafna; meta l-mewt spiritwali tkun qed tipprevali fuq l-ispiritwalità u l-moralità.

Alla jibgħat il-gwida divina biex jagħti l-ħajja lil nies li kienu mejta spiritwalment sabiex jerġgħu jsiru ħajjin spiritwalment, moralment, soċjalment, etikament, reliġjożament. U s-soċjetà terġa’ ssir ħadra u produttiva bil-ħdura u l-frott spiritwali, u terġa’ timtela bit-tjubija u l-barkiet.

Il-fidi hija biss il-bidu tal-vjaġġ spiritwali

Blad dubju, il-mewt fiżika sseħħ darba biss. Imma jekk persuna tkun mejta spiritwalment, moralment u etikament, tkun qisha qed tmut kull jum. Jekk il-qalb ta’ persuna tkun vojta minn kull tjubija, ħniena, mogħdrija u mħabba, dik il-qalb tkun spiritwalment mejta, u tassew, din hija l-mewt vera tal-bniedem: li jkun tilef kull umanità.

Xi ħadd jista’ jistaqsi: F’dan il-vers Alla qed jitkellem mal-fidili, li diġà emmnu u sabu ħajja ġdida. Għaliex qed jgħidilhom biex jieħdu l-ħajja?

Irridu nifhmu li l-fidi hija biss il-bidu tal-vjaġġ spiritwali, mhux it-tmiem tiegħu. Pereżempju, meta tifel jibda l-iskola jsir student, iżda dan ma jfissirx li laħaq l-ogħla livell ta’ tagħlim. Bl-istess mod, min jemmen huwa mistieden ikompli javvanza sakemm jilħaq l-ogħla livell ta’ qrubija lejn Alla.

Meta persuna taċċetta l-fidi, tkun tista’ twieġeb għas-sejħa ta’ Alla. Imma xorta jista’ jkun li qalbha tkun marbuta wisq mal-affarijiet tad-dinja. L-imħabba tagħha lejn id-dinja tkun għadha qawwija, u r-relazzjoni tagħha ma’ Alla tkun għadha mhux soda biżżejjed.

Hekk kif min jemmen jikber spiritwalment, gradwalment isir aktar devot lejn Alla. Iktar ma jwieġbu għas-sejħa ta’ Alla, jobdu l-kmandi Tiegħu u jaħdmu biex isaħħu r-relazzjoni tagħhom Miegħu, iktar jimxu minn stat ta’ mewt spiritwali għall-ħajja spiritwali.

Il-qofol tal-ħajja vera

Meta l-fidi u l-għemejjel tajbin jilħqu l-ogħla livell tagħhom, dik hija l-ħajja vera li Alla qed isejjaħ għaliha f’dan il-vers. Li tgħaddi mill-mewt għall-ħajja jfisser li tħalli warajk stat spiritwali dgħajjef u tidħol f’wieħed aħjar. Dan mhux faċli. Iktar ma persuna tkun mejta spiritwalment, iktar ikollha bżonn tagħmel sforz biex terġa’ lura lejn ħajja spiritwali.

Jekk l-imħabba tagħna lejn id-dnub u l-affarijiet ħżiena qed tikber, inkunu qed nitbiegħdu minn Alla. Kull persuna taf x’inhuma d-dgħufijiet tagħha u x’inhu d-dlam li hemm ġewwa fiha. Dan huwa d-dlam tad-dnub u l-ħażen. Meta persuna tħalli dan id-dlam warajha u tibda timxi lejn Alla, tibda tara l-preżenza Tiegħu kullimkien, għax Alla huwa d-Dawl.

Naqqas ir-rabta tiegħek mad-dinja

Darba raġel mar għand il-Qaddis Profeta Muħammad, is-sliem għalih, u qallu: “O Messaġġier ta’ Alla, urini għemil li jekk nagħmlu, Alla jħobbni u n-nies ukoll iħobbuni.” Il-Profeta wieġbu: “Naqqas l-irbit tiegħek mad-dinja, u Alla jħobbok; u tixtieqx dak li għandhom in-nies, u n-nies iħobbuk.”

F’dan id-diskors, il-Profeta wera t-tifsira vera ta’ “ma tkunx marbut mad-dinja”. Dan ma jfissirx li persuna għandha tirrifjuta l-affarijiet tajbin u l-barkiet li Alla ta lill-bniedem, jew li tarmi jew tittraskura l-ġid tagħha.

It-tifsira vera hija li l-fiduċja u t-tama tal-bniedem għandhom ikunu f’Alla u fil-wegħdiet Tiegħu ta’ maħfra u premju, mhux fil-flus jew fil-affarijiet tad-dinja. Persuna tista’ tkun sinjura, iżda l-ġid tagħha m’għandux ikun is-sors tas-sigurtà tagħha jew l-aktar ħaġa importanti f’qalbha.

Min jemmen għandu jafda f’Alla, għax il-barkiet, il-ħniena u l-premju Tiegħu huma ħafna akbar minn kull ħaġa li tista’ toffri din id-dinja.

Posted in Ahmadiyya Malta, Article | Tagged , , , , , , , , , , , , , , , | Leave a comment