FIL-GWERRA MA JIRBAĦ ĦADD

“Kull min joqtol bniedem… qisu qatel l-umanità kollha; u min isalva l-ħajja, qisu salva lill-bnedmin kollha.” (Il-Koran, 5:33)

Dawn l-aħħar ġimgħat kienu verament diffiċli minħabba s-sitwazzjoni kerha ħafna fil-Palestina minħabba l-gwerra bejn l-Iżrael u l-Ħamas. Kif jgħidu, fil-gwerra ma jirbaħ ħadd u kulħadd jitlef fil-gwerra. Għal darb’oħra dan reġa’ ġie ppruvat veru. Rajna filmati u ritratti tal-waħx, il-biki, il-qtil, il-ħsara u qerda ta’ bini pubbliku u privat, inklużi sptarijiet. Meta nara dan kollu, nistaqsi, xi nkiseb permezz ta’ din il-gwerra? L-aktar tweġiba sempliċi hija ‘xejn ħlief telf kbir’.

Inqatlu eluf ta’ nies innoċenti fosthom tfal, nisa u anzjani, li jfisser eluf ta’ djar u familji ġew meqruda; it-tfal saru orfni, in-nisa saru romol, u l-ommijiet tħallew mingħajr uliedhom.

Sfortunatament, il-poteri ewlenin, filwaqt li jesprimu simpatija, ma jridux jamministraw il-ġustizzja u mhumiex serji dwar din il-kwistjoni. Huma jemmnu li l-gwerra se tibqa’ konfinata għal dawk iż-żoni, iżda mhumiex konxji. Anke l-għorrief fosthom bdew jgħidu li l-gwerra mhux se tkun limitata għal dawk ir-reġjuni iżda se tinfirex aktar u tilħaq pajjiżi tagħhom stess. Il-pajjiżi kbar m’għandhomx jinsew li meta l-fjammi tan-nar jinfirxu ma jeħilsu lil ħadd; u ma jagħmlu ebda distinzjoni bejn kbar jew żgħar, u bejn sinjuri jew foqra.

Għalhekk, hija t-talba umli tiegħi li, minflok aktar firda u aktar eskalazzjoni tal-mibegħda, huwa aktar għaqli li tinżera’ ż-żerriegħa tal-imħabba, ir-rikonċiljazzjoni u l-paċi. Għax meta hemm paċi, kulħadd igawdi, u meta hemm gwerra kulħadd jitlef. Meta l-bniedem ma jiflaħx ma jista’ jagħmel xejn, u ma jistax igawdi anke jekk ikun hemm l-ikel bnin quddiemu; bl-istess mod, meta hemm kunflitt fis-soċjetà, ħadd ma jista’ jistrieħ u jgawdi.

Għalhekk, il-Qaddis Profeta Muħammad, is-sliem għalih, qal li ma tixtiqux gwerra jew li tiltaqgħu mal-għadu fil-battalja, iżda, dejjem tistinkaw għall-paċi, il-prosperità u t-trankwillità. Huwa għallimna li biex tiżviluppa l-paċi u tneħħi l-mibegħda mill-qalb, persuna trid tgħin kemm lill-oppressur kif ukoll lil min hu oppressat. Huwa qal li, “Għin lil ħuk kemm jekk hu l-oppressur kif ukoll jekk hu l-oppressat.” Meta semgħu dan, sħabu qalu li, “Nifhmu li aħna għandna ngħinuh meta hu l-parti aggravata, imma kif għandna ngħinu meta hu jkun qed iwettaq il-ħażin?” Hu qal: “Żommulu idu,” jiġifieri li tista’ tgħin lill-oppressur billi twaqqaf milli jaġixxi b’mod krudili sabiex ikun jista’ jiġi salvat mir-Rabja ta’ Alla.

Illum huwa importanti li ngħinu liż-żewġ naħat, il-vittmi u l-ħatja. Nistgħu ngħinu lill-vittmi billi nuru solidarjetà u noffrulhom għajnuna umanitarja, u nistgħu ngħinu l-ħatja billi ‘nżommu jdejhom’.