Image: Jamesteohart/Shutterstock.com

Il-kisbiet u l-ferħ dinji huma temporanji: Is-suċċess veru jinsab lil hinn mill-qligħ materjali

It-Torċa, 11.01.2026 | Imam Laiq Ahmed Atif — amjmalta@gmail.com

Fil-ħajja tagħna ta’ kuljum, niltaqgħu ma’ kull tip ta’ persuna—għonja u foqra, żgħażagħ u kbar, b’saħħithom u dgħajfa, twal u qosra. Din id-diversità fil-ħolqien mhijiex bla skop. Madankollu dawk li jesperjenzaw tbatija jew li huma inqas fortunati spiss jistaqsu għaliex iridu jiffaċċjaw provi bħal dawn filwaqt li oħrajn madwarhom jidhru li jgawdu l-faċilità u l-lussu.

Dan l-aħħar jien ukoll ġejt mistoqsi dwar dan matul xi intervista. Li, għaliex jien li nġorr il-toqol tat-tbatija? Għaliex għandi inqas minn ħaddieħor?

Iktar ġid, iktar responsabbiltà

Mal-ewwel daqqa t’għajn, din tidher mistoqsija valida. Madankollu, wara riflessjoni aktar fil-fond, insibu li li tkun inqas fortunat mhux neċessarjament kawża ta’ dwejjaq; pjuttost, spiss iġorr inqas piżijiet u responsabbiltajiet. Il-mezzi tad-dinja m’għandhomx jitqiesu bħala mezz ta’ pjaċir biss, iżda bħala mezz ta’ prova u responsabbiltà kbira. Il-Koran Imqaddes jgħallem li l-ġid u t-tfal huma mezz ta’ prova.

“Ġidkom u wliedkom huma biss tiġrib (mingħand Alla, biex jara x’se tagħmlu bihom). Alla għandu ħlas kbir.” (64:16)

“Kunu afu li ġidkom u wliedkom huma biss prova u li huwa Alla li għandu premju kbir.” (8:29)

Dan ifisser li aktar ma wieħed jippossjedi, aktar isir responsabbli quddiem Alla. Il-mezzi tad-dinja m’għandhomx jitqiesu sempliċement bħala sorsi ta’ kumdità iżda bħala toroq ta’ responsabbiltà u ttestjar. Dawk li għandhom inqas naturalment ikunu responsabbli għal inqas, għax Alla ma jżommx persuna responsabbli għal dak li ma jkunx tahom.

Dawk imberkin bil-ġid biex jonfquh fil-kawża tal-fidi u l-umanità biex ifittxu l-pjaċir ta’ Alla jistgħu jibdlu dik il-barka f’saħta jekk ikunu fallew il-prova tagħhom.

Huwa ċar ukoll li l-ġid, it-tfal, u s-suċċess fid-dinja jġibu ferħ u kuntentizza. Madankollu dawn jistgħu jsiru sorsi ta’ ferħ veru biss meta jintużaw skont il-kmandamenti ta’ Alla.

Tipi differenti ta’ ferħ

Hemm tipi differenti ta’ ferħ, il-pjaċir marbut mal-ikel, il-ferħ taż-żwieġ u r-relazzjonijiet, u l-pjaċir miksub mill-ġid u l-kisbiet fid-dinja. Xi nies isibu ferħ fl-ikel, xi wħud iqattgħu ħin mal-familji tagħhom, filwaqt li oħrajn jibqgħu kontinwament impenjati bin-negozji tagħhom, ifittxu li jakkumulaw aktar u aktar ġid u jsibu pjaċir fil-ġbir ta’ għana dinji.

Madankollu, spiss ninsew li l-mezzi u l-pjaċiri kollha tad-dinja huma temporanji, mhux eterni. Meta persuna titlaq minn din id-dinja, tħalli kollox warajha u ma tieħu l-ebda ġid materjali magħha. Dak li ġġorr huma l-għemejjel tajbin tagħha, il-qligħ spiritwali tagħha, l-imħabba tagħha għal Alla, u s-servizz tagħha lejn sħabha l-bnedmin.

Il-pjaċiri dinjija huma bħal miraġġ fid-deżert

Fil-qosor, dawn il-kisbiet u l-ferħ tad-dinja mhumiex eterni, għalhekk jekk wieħed jorbot qalbu magħhom żgur iwassal għat-telf, għax jasal żmien meta dawn il-pjaċiri jsiru morri. Jiġi l-mument meta l-bniedem jirrealizza li dawn il-pjaċiri ma kienu xejn ħlief bħal miraġġ fid-deżert, fejn min hu bil-għatx jaħseb li hemm l-ilma sakemm, meta jasal għalih, isib li hija biss illużjoni.

Il-pjaċiri tad-dinja mhumiex aktar minn miraġġ fid-deżert, u ma jistgħux jaqtgħu l-għatx spiritwali tagħna u jipprovdu salvazzjoni eterna.

Barra minn hekk, għandna nifhmu wkoll li, is-suċċessi tad-dinja huma inseparabbli mill-provi. Il-Koran Imqaddes jiddikjara: “Alla ħalaq il-mewt u l-ħajja biex iġarrabkom (u jara) min minnkom huwa l-aħjar fl-għemil.” (67:3)

Is-suċċess u l-falliment; il-ħajja u l-mewt

Is-suċċess u l-falliment ukoll huma kwistjonijiet ta’ ħajja u mewt. Is-suċċess jagħti l-ħajja lill- persuna, jagħtiha nifs ġdid, filwaqt li l-falliment jista’ jinħass bħall-mewt; u għal dawk ta’ qalbhom dgħajfa, jista’ saħansitra jwassal għall-mewt fiżika tagħhom.

Wieħed għandu jiftakar li l-ħajja u l-mewt ordinarji jistgħu jiġu tollerati, iżda ħajja u mewt  infernali jistgħu jwasslu għal uġigħ intensiv.

Persuna tassew fortunata hija dik li, wara li tesperjenza l-falliment, fl-aħħar mill-aħħar tirnexxi u ssir saħansitra aktar b’saħħitha. Il-fidi tagħhom f’Alla tikber, u jieħdu pjaċir billi jirriflettu fuq l-għeġubijiet Tiegħu. Għal individwi bħal dawn, is-suċċess tad-dinja jsir mezz biex jinkiseb suċċess spiritwali veru.

Fil-verità, l-hena dejjiema u l-kumdità ġenwina ma jinsabux fil-pussess tad-dinja. Anke jekk wieħed ikollu ħafna mill-affarijiet li toffri d-dinja, l-hena vera u dejjiema tibqa’ ma tintlaħaqx permezz ta’ mezzi materjali biss.

Il-kisbiet tad-dinja huma mogħdijiet li jwasslu għand Alla

Għalhekk, huwa importanti li m’għandniex inkunu kuntenti daqshekk bil-kisbiet temporanji tad-dinja li nitilfu l-viżjoni tas-suċċess veru. Minflok, ħares lejn il-kisbiet tad-dinja tiegħek bħala mogħdijiet li jwasslu għar-rikonoxximent ta’ Alla. Tiftaħarx bil-kapaċitajiet jew l-isforzi tiegħek stess. Emmen minflok li Alla l-Ħanin—li qatt ma jħalli sforz sinċier imur fix-xejn—tak il-frott tax-xogħol tiegħek.

Għalhekk, huwa essenzjali għal min jemmen li jinżel bil-gratitudni quddiem Alla kull meta jkun imbierek bis-suċċess. Din il-gratitudni ssaħħaħ l-imħabba ta’ dak li jkun lejn Alla, tapprofondixxi l-fidi, u tistieden aktar barkiet. Għax Alla li Jista’ Kollox iwiegħed li kull min hu grat se jkollu l-barkiet Tiegħu miżjuda, u kull min hu ingrat se jiffaċċja kastig ta’ wġigħ.