Image: Vladyslav Dukhin/Pexels

GĦANDNA BŻONN NITFU L-FJAMMI U MHUX INKOMPLU NĦEĠĠUHOM!

Hija s-sejħa urġenti ta’ żmienna li naħdmu għall-paċi dejjiema, u flimkien mal-isforzi sinċieri tagħna għall-paċi, il-ġustizzja u r-rikonċiljazzjoni, irridu nduru lejn Alla b’umiltà, indiema u supplika ħerqana, għall-ħniena u l-grazzja bla limitu Tiegħu fuq l-umanità kollha.

It-Torċa, 25.01.2026| Imam Laiq Ahmed Atif — amjmalta@gmail.com

Kull sena, niltaqgħu ma’ aħbarijiet ta’ nirien fil-foresti madwar id-dinja. Kull meta jinqala’ nar bħal dan, ma jħalli xejn fi triqtu—kulma jmiss jiġi kkunsmat mill-fjammi. Dawn l-inċidenti jfakkruna f’verità qawwija: meta jinqala’ n-nar, xejn fl-inħawi tiegħu ma jibqa’ sigur. Anke jekk ma jaffettwawx direttament, id-duħħan u s-sħana eventwalment jagħmlu ħsara lil dawk kollha li jkunu fil-qrib.

Din l-analoġija hija rilevanti b’mod impressjonanti għall-affarijiet globali tal-lum. L-effetti u l-konsegwenzi tal-kunflitti reġjonali u internazzjonali qed jinħassu—b’mod terribbli u bla heda—min-nies kemm direttament kif ukoll indirettament.

Il-gwerra globali

Jekk, allaħares, kellha tinqala’ gwerra globali, wieħed bilkemm jista’ jimmaġina l-kobor tad-devastazzjoni tagħha. Hemm xi pajjiż li jemmen li jista’ jibqa’ mhux mimsus kompletament  minn katastrofi bħal din? Assolutament le.

Il-konsegwenzi ta’ gwerra globali jkunu ferm lil hinn mill-immaġinazzjoni, speċjalment minħabba s-sofistikazzjoni u l-qawwa distruttiva tal-armi moderni. L-impatt tagħha ma jkunx limitat għan-nazzjonijiet involuti direttament iżda jibqa’ jinħass madwar id-dinja għal għexieren ta’ snin, jekk mhux sekli sħaħ.

Irridu nitfu l-fjammi tan-nar

Fid-dawl ta’ din ir-realtà, la huwa għaqli u lanqas responsabbli li nibqgħu osservaturi passivi tat-tensjonijiet globali li qed jiżviluppaw quddiemna. Madankollu, l-ironija hi li, minflok ma jaħdmu biex jitfu l-fjammi, xi nazzjonijiet ikomplu jżidu l-fjuwil man-nar.

Il-ħtieġa tal-mument hija ċara: kull nazzjon u kull individwu għandu jkollu r-rwoli rispettivi tiegħu fil-promozzjoni tal-paċi. Irridu nferrgħu l-ilma fuq in-nar, mhux iż-żejt.

Irridu naħdmu biex nitfu l-fjammi aktar milli nqawwuhom, filwaqt li nżommu f’moħħna li meta jkun hemm in-nar, ma jagħmel l-ebda distinzjoni u ma jsalva la lil dawk b’saħħithom u lanqas lil dawk dgħajfa. Kif jgħid il-qawl, “better safe than sorry”. Huwa ħafna aktar għaqli li naħdmu kollettivament lejn dinja sigura u paċifika milli nħallu l-umanità tinbela’ fin-nar tal-gwerra u l-kunflitt.

It-theddida ta’ gwerra nukleari

Illum, hemm aktar minn sittin gwerra, kunflitt jew ribelljoni għaddejjin madwar id-dinja kważi f’kull kontinent. Ħafna minn dawn il-kunflitti eżistenti għandhom il-potenzjal li jeskalaw f’konfrontazzjoni globali, u saħansitra jqajmu t-theddida ta’ gwerra nukleari. Realtajiet bħal dawn m’għandhomx jiġu injorati, iżda, jeħtieġu attenzjoni urġenti u azzjoni responsabbli.

Hija s-sejħa urġenti ta’ żmienna li ninvolvu ruħna fl-aktar forma vera u kbira ta’ Jihad—il-Jihad tal-kelma u l-pinna—li hija li ngħidu l-verità b’għerf, sinċerità, u kuraġġ quddiem dawk fl-awtorità, speċjalment meta jkunu ta’ qalbhom iebsa, inġusti, jew oppressivi.

L-ogħla forma ta’ Jihad (Ġiħad)

Din hija t-taqbida nobbli li l-Qaddis Profeta Muħammad, is-sliem għalih, iddeskriva bħala l-ogħla forma ta’ Jihad: li ngħollu leħen ta’ ġustizzja fil-preżenza tat-tirannija, biex nistabbilixxu u nippromwovu l-paċi fid-dinja mkissra b’problemi kbar.

Permezz ta’ din it-taqbida ġusta, ma nfittxux il-kaos jew il-konfrontazzjoni, iżda r-riforma tas-soċjetà, is-salvagwardja tal-ħajja umana, u l-istabbiliment tal-paċi, il-ġustizzja, u l-kompassjoni għall-umanità kollha.

Għandna nirriformaw lilna nfusna u nikkultivaw l-aħjar virtujiet fina nfusna biex insiru bnedmin tajba, ġentili u simpatiċi. Għandna nwarrbu għira, regħba, u riżentiment mill-karattru tagħna u minflok inkabbru l-imħabba tal-umanità kollha.

Id-dmir tal-fidili li jemmnu f’Alla l-Ħanin

Id-dmir tagħna bħala dawk li jemmnu huwa li naħdmu biex nitfu l-fjammi qawwija tal-kunflitt u l-gwerra, li naqdu lill-umanità b’mod altruwista, u li nxerrdu l-paċi, l-armonija, u r-rieda tajba sal-punt li nilħqu u nifhmu l-kapaċità tagħna.

L-Iżlam jgħallimna li l-korruzzjoni u d-diżordni fid-dinja ma jogħġbux ħafna lil Alla, filwaqt li r-rikonċiljazzjoni, il-ħniena, u l-ġustizzja jiġbdu l-pjaċir Tiegħu.

Hekk kif in-nar meta jixtered jeqred kollox quddiemu, hekk, bl-istess mod, meta Alla jxerred il-ħniena u l-grazzja Tiegħu, ma joqgħod iqis xejn u jaffettwa l-ħolqien kollu Tiegħu.  Il-Koran Imqaddes ifakkarna li Alla jibgħat xita mis-smewwiet bħala sors ta’ ħajja, ħniena u purifikazzjoni; u meta tinżel xita divina, anke l-aktar fjammi qawwija jintfew.

Infittxu l-għajnuna ta’ Alla

Għalhekk, flimkien mal-isforzi prattiċi tagħna għall-paċi, il-ġustizzja u r-rikonċiljazzjoni, irridu nduru lejn Alla b’umiltà, indiema u supplika ħerqana.

Irridu nitolbuh biex ixerred il-ħniena bla limitu Tiegħu fuq l-umanità kollha, biex irattab qlub imwebbsa, biex jiggwida lill-mexxejja lejn il-ġustizzja u biex jipproteġi d-dinja mid-devastazzjoni tal-mibegħda, l-oppressjoni u l-gwerra.

Jalla Alla jibgħat ix-xita safja u li tgħajjex tal-grazzja Tiegħu mis-smewwiet, biex titfi n-nirien tal-animożità u l-kunflitti, u tbiddel id-dinja tagħna f’lok ta’ paċi, sigurtà u fraternità għall-umanità kollha. Ammen.