IL-MORALI: L-OMM TAL-GĦEMEJJEL TAJBA

“Il-morali tajbin huma ċ-ċavetta għal għemejjel tajbin oħra. Dawk li ma jeħdux ħsieb tal-morali tagħhom, bil-mod il-mod isiru inutli. F’din is-sitwazzjoni, wieħed isir agħar minn annimal mejjet. Għall-inqas il-ġilda u l-għadam ta’ annimal mejjet jistgħu jintużaw, iżda l-ġilda ta’ bniedem mejjet ma tiswa għalxejn. Dan hu l-punt meta huwa jsir l-iktar kreatura inferjuri. Għalhekk, għandna niftakru li, it-titjib tal- morali tagħna huwa ferm importanti għaliex il-morali huma l-omm tal-għemejjel tajba.”

It-Torċa, 27.10.2024 | IMAM Laiq Ahmed Atif, amjmalta@gmail.com

Illum bdejt dan is-suġġett vera importanti li huwa għal qalbi ħafna bi kliem tad-deheb tal-Fundatur tal-Komunità Ahmadiyya Musulmana. Bla ebda dubju, huwa spjega dan is-suġġett bl-aktar mod eċċellenti.

L-importanza u l-kobor tal-manjieri tajbin fil-ħajja tal-bniedem mhuma moħbija minn ħadd, nies ta’ kull reliġjon u kull fidi, anzi, kull persuna li tgħix fid-dinja hija konvinta minn morali u karattru tajjeb u mġiba tajba, u ċertament ħadd ma jista’ jiċħadha.

Għax l-akkwist ta’ kwalitajiet morali huwa l-għan ewlieni tan-natura umana. Anzi, il-moralità hija waħda mill-ħtiġijiet bażiċi, u mingħajrha l-umanità u s-sbuħija tal-bniedem ma jittejbux.

Il-moralità hija l-essenza kbira u siewja li permezz tagħha l-fratellanza reċiproka, l-għaqda u l-ftehim, l-imħabba u l-maħfra, il-ħbiberija u l-ġentilezza, it-tolleranza u l-armonija jistgħu jinħolqu fis-soċjetà.

Barra minn hekk, permezz ta’ din is-setgħa, in-nuqqas ta’ qbil reċiproku u kaos, riżentiment, mibegħda, għira, malizzja, u kull tip ta’ kontradizzjonijiet jistgħu jitneħħew.

L-ornament tal-bniedem

Il-moralità hija fil-fatt l-ornament tal-bniedem u s-sbuħija tiegħu; permezz tagħha jinħoloq bilanċ u armonija fil-ħajja kollettiva u individwali, u tinkiseb rebħa fuq il-qlub tan-nies.

Filwaqt li l-immoralità u l-imġiba ħażina jwelldu l-ħażen kollu, bħall-mibegħda, ir-rivalità, il-kaos, il-ġlied u r-riżentiment, eċċ., jidher li l-manjieri tajbin u l-imġiba tajba huma l-kapital, l-assi u t-teżor siewi tal-ħajja umana.

Il-manjieri u l-virtujiet tajba

Fl-Iżlam il-manjieri tajba u l-virtujiet jingħataw importanza kbira, sa tali punt li, il-Qaddis Profeta Muħammad, is-sliem għalih, kien jitlob għal manjieri tajbin. Huwa rrakkontat li kien jitlob, “O Alla, kif żejjintni bil-ġmiel fiżikament u għamilt id-dehra tiegħi sabiħa, nitolbok, sebbaħ ukoll il-manjieri tiegħi.”

Barra minn hekk, kien jitlob għall-għajnuna ta’ Alla sabiex ikun jista’ jevita l-imġiba ħażina; u kien jitlob, “Mulejja, infittex il-kenn Tiegħek minn kondotta ħażina, għemejjel ħżiena u xewqat mhux xierqa.”

L-aqwa fostkom huma dawk li…

Nistgħu nifhmu l-kobor u s-sbuħija tal-morali tajba minn dan il-punt fejn il-Profeta Muħammad, is-sliem għalih, jistqarr li, “L-aqwa fostkom huma dawk li l-morali tagħhom huma l-aħjar”; u qal li, “L-aktar maħbub għalija u l-eqreb tiegħi f’Jum il-Ġudizzju se jkunu dawk li għandhom l-aqwa morali u manjieri.”

It-tagħlim Iżlamiku jenfasizza ħafna fuq il-prattika ta’ morali tajba u manjieri eċċellenti fid-dar u fis-soċjetà u f’kull livell; u jindirizza din il-kwistjoni f’ħafna dettall.

Dan għandu jiġbed l-attenzjoni tagħna biex nagħmlu l-akbar sforzi biex nipprattikaw l-aktar morali eċċellenti. Għandna nippruvaw nadottaw l-ogħla morali billi nużaw il-fakultajiet kollha tagħna sabiex inkunu assi għas-soċjetà u għall-pajjiż.

Il-Qaddis Profeta Muħammad, is-sliem għalih, wissa li ħadd m’għandu jkażbar lil xi ħadd għax hu qasir jew għandu xi difetti fiżiċi; u qal lil martu biex ma turi lanqas l-iċken dispjaċir lejn kwalunkwe nisa oħra għal xi ħaġa mhux f’postha.

Ix-xewqat materjalistiċi bla tarf

Huwa ta parir lit-tfal biex jiksbu livelli morali għoljin billi ma jagħmlu ħsara lil ħadd, lanqas lis-siġar tal-frott ta’ ħaddieħor billi jitfgħu l-ġebel fuqhom; jekk ikunu ddisprati jieħdu biss il-frott li jkun diġà waqa’ mis-siġra, u bl-ebda mod m’għandhom jagħmlu ħsara lis-siġar. Iżda l-aħjar huwa dak li titlob lil Alla biex qatt ma tispiċċa f’sitwazzjoni daqshekk iddisprata.

F’dan il-parir tiegħu hemm lezzjoni għalina li dejjem inkunu kuntenti u sodisfatti b’dak li għandna, u ma nħarsux lejn dak li mhuwiex tagħna. Iżda, jekk nixtiequ li jkollna xi ħaġa, għandna nitolbu dan mill-Mulej, u mhux minn ħaddieħor.

Dan il-parir hu meħtieġ fi żmienna meta nqisu x-xewqat materjalistiċi bla tarf. Għandna biex inkunu kuntenti u sodisfatti b’dak li għandna u dejjem inkunu grati lejn Alla li tana ħafna u ħafna barkiet.

It-taħriġ morali tat-tfal

Il-Qaddis Profeta Muħammad, is-sliem għalih, kien dejjem jenfasizza fuq it-tagħlim u t-taħriġ tat-tfal minn età żgħira u kien dejjem jieħu ħsieb tat-taħriġ morali tagħhom.

Darba wieħed tifel kien qed jiekol malajr u jċaqlaq idu fuq il-platt kollu. Huwa qallu: “L-ewwel, aqra t-talb biex tibda f’isem Alla, kul b’idek il-leminija u kul minn dak li hemm quddiemek.”

Għalhekk, għandna nieħdu t-taħriġ morali tat-tfal b’dan il-mod, sabiex jadottaw morali eċċellenti hekk kif isiru adulti.