Racial Harmony Through Affective Integration

Posted on July 28, 2025 by Laiq Ahmed Atif

Posted in Ahmadiyya Malta, Interviews, TV interviews | Tagged Ahmadiyya Malta, Building on racial harmony, Integration, Malta, Maltese, Racial Harmony, Racism | Leave a comment

The importance of decent and modest clothing in society

Posted on July 27, 2025 by Laiq Ahmed Atif

Photo: Stock35/Shutterstock.com

L-importanza tal-ilbies diċenti u modest fis-soċjetà

It-Torċa, 27.07.2025 | Imam Laiq Ahmed Atif — amjmalta@gmail.com

Alla l-Ħanin jgħid fil-Koran Imqaddes (7:27) li, “Ja wlied Adam! Tabilħaqq niżżilnielkom ilbies jostor l-għera tagħkom, u biex ikunu l-ilbiesi sbieħ (mezzi ta’ sbuħija u eleganza). Iżda l-ilbies tal-ġustizzja, is-safa u l-imħabba ta’ Alla — dak huwa l-aħjar. Dan huwa (wieħed) mis-sinjali ta’ Alla biex forsi jiftakru (fit-tjieba ta’ Alla).”

Dan il-vers jiġbed l-attenzjoni għal żewġ skopijiet essenzjali tal-ilbies: l-ewwel, li jgħatti l-għera fiżika tagħna, u t-tieni, li jservi bħala mezz ta’ tiżjin, u jtejjeb id-dehra tagħna b’eleganza u grazzja.

Madankollu, fid-dawl ta’ dawn l-iskopijiet nobbli, huwa ta’ tħassib kbir li x-xejra globali qed timxi fid-direzzjoni opposta—lejn ilbies dejjem aktar indiċenti u rivelanti, partikolarment fi spazji pubbliċi u destinazzjonijiet turistiċi popolari.

Rapporti ta’ mġiba indiċenti fil-pubbliku

Anke f’pajjiżna rajna rapporti ta’ diżapprovazzjoni pubblika, speċjalment minn komunitajiet lokali u awtoritajiet f’ċerti żoni li jenfasizzaw tħassib dejjem jikber dwar din il-bidla fin-normi tal-ilbies, fejn il-valuri tas-soċjetà qed jiġu sfidati minn tendenzi moderni tal-moda u minn turisti li jżuru dawk il-postijiet.

Madankollu, lil hinn mid-dimensjoni fiżika, il-vers jintroduċi simboliżmu spiritwali ogħla permezz tal-frażi “l-ilbies tas-sewwa”, li jħeġġiġna nirriflettu fuq l-essenza vera tal-eleganza—mhux biss fid-dehra ta’ barra iżda fil-virtù ta’ ġewwa.

Filwaqt li l-ilbies fiżiku jaħbi l-għera tal-ġisem tagħna, l-ilbies tal-pjetà—karatterizzat mill-modestja, l-umiltà, u l-kuxjenza ta’ Alla—jaħbi l-espożizzjoni ferm aktar perikoluża tal-vulnerabbiltajiet morali u spiritwali tagħna.

Konxji dwar li nżejnu ruħna bit-tjieba

Dan il-vers ifakkarna wkoll b’mod qawwi hekk kif b’mod naturali aħna mħeġġa u mġiegħla nlibbsu lil ġisimna b’attenzjoni u sbuħija; meta nqisuha daqshekk neċessarja li jkollna ħwejjeġ tajbin biex ngħattu l-għera fiżika tagħna u nużaw ilbies eleganti biex nidhru grazzjużi u puliti, għandna nħossuna saħansitra aktar konxji dwar li nżejnu ruħna bit-tjieba u s-sewwa, u għandna nkunu aktar konxji li ngħattu l-għera morali u spiritwali tagħna, li tista’ ssir biss bit-talb u billi nitolbu l-maħfra u l-ħniena ta’ Alla.

Fil-qosor, huwa biss permezz ta’ ndiema kontinwa, supplikazzjoni, u sforz konxju biex ngħixu ħajja li togħġob lil Alla li nistgħu nilbsu l-libsa tassew eleganti li ġġib kemm protezzjoni spiritwali kif ukoll unur dejjiemi.

Libsa hija barka

Huwa ferm importanti li dejjem inżommu f’moħħna li l-libsa mhix xi ħaġa tal-mistħija anzi din hija barka kbira ta’ Alla l-Ħanin u hija waħda mill-barkiet li Alla li Jista’ Kollox ta lill-qaddejja Tiegħu u semmieha b’isimha fil-Koran Imqaddes.

Il-libsa tingħata bħala premju għat-tfal ta’ Adam kif ġie msemmi hawn fuq fil-vers tal-Koran. Dan l-unur li jingħata huwa disponibbli biss għall-bniedem, l-ebda ħlejqa oħra fid-dinja ma ġiet onorata b’din il-barka.

Għalhekk, huwa importanti li nilbsu l-libsa fiżika u spiritwali b’mod tajjeb u bi ħsieb profond, għax dawn huma importanti għall-bini tal-karattru tagħna.

Perspettiva Iżlamika

Minn perspettiva Iżlamika, l-ilbies diċenti fil-pubbliku mhuwiex sempliċement kwistjoni ta’ etikett soċjali jew tradizzjoni kulturali, iżda espressjoni profonda ta’ fidi, dinjità, u rispett lejn il-persuna nfisha. L-Iżlam jenfasizza l-modestja bħala valur morali ewlieni, u dan il-prinċipju huwa rifless b’mod ċar fil-mod kif l-individwi huma mgħallma jilbsu. Kemm l-irġiel kif ukoll in-nisa huma mħeġġa jilbsu ħwejjeġ li jkopru l-partijiet tal-ġisem li jridu jkunu mgħottija b’mod tajjeb u b’hekk jippreservaw id-dinjità tagħhom u jipproteġu l-qdusija tal-ispazju pubbliku.

Din il-gwida mhijiex maħsuba kontra l-għażliet personali tal-individwu, iżda, biex televa d-dinjità umana, u sabiex kulħadd iħoss komdu fil-pubbliku, inkluż it-tfal. Ilbies diċenti jservi biex irawwem ambjent rispettuż, u jfakkar lill-individwu u lis-soċjetà kollha kemm hi fil-valuri tal-umiltà, ir-rażan, u l-kuxjenza spiritwali.

Meta nilbsu b’mod diċenti, inżommu l-konfini morali, u nwettqu kmand divin li jfittex li jissalvagwardja kemm l-integrità personali kif ukoll l-armonija komunali u soċjali.

Għalhekk, huwa importanti ħafna li naħdmu bis-sħiħ biex inwettqu rivoluzzjoni spiritwali u morali fid-djar u s-soċjetajiet tagħna biex inżommu l-ogħla standards ta’ lbies diċenti fid-djar u fil-postijiet pubbliċi.

Il-benefiċċju ta’ din id-dinja

Huwa minnu li qed ngħixu fi żmien ta’ materjaliżmu u konsumiżmu li dejjem qed jiżdiedu. Għalhekk, irridu nżommu f’moħħna wkoll li m’għandniex inħallu l-valuri nazzjonali, kulturali u reliġjużi tagħna sempliċement f’isem il-moda u l-modernizzazzjoni. Pjuttost, irridu nħarsu lilna nfusna u lil uliedna mill-faxxinu tossiku tad-dinja.

Il-pjaċiri tad-dinja huma ta’ żmien qasir, u t-tjieba, il-pjetà u l-għemejjel tajbin huma ta’ benefiċċju fit-tul, u huma ta’ benefiċċju kemm f’din id-dinja kif ukoll fil-ħajja ta’ wara. Kif jgħid Alla li Jista’ Kollox fil-Koran Imqaddes (4:78): ‘Il-benefiċċju ta’ din id-dinja u t-tgawdija ta’ din il-ħajja hija żgħira u ftit u l-ħajja ta’ wara hija aħjar għal dawk li huma konxji tad-dmir tagħhom lejn Alla’.

F’vers ieħor (43:36) jgħid li, ‘dan kollu huwa biss provvediment temporanju tal-ħajja preżenti; u l-ħajja eterna skont Sidkom hija għall-ġusti u n-nies twajba’.

Posted in Ahmadiyya Malta, Article, www.Ahmadiyya.mt | Tagged Ahmadiyya Malta, decent and modest clothing, ilbies diċenti, Imam, Imam Atif, Imam Malta, Islam, Libsa hija barka, Malta, Maltese, public places, Quran, society | Leave a comment

Dealing with the digital factors of youth mental health and well-being

Posted on July 20, 2025 by Laiq Ahmed Atif

Photo: JKstock / Shutterstock.com

Inħarsu lejn il-fatturi diġitali tas-saħħa mentali u l-benesseri taż-żgħażagħ

It-Torċa, 20.07.2025 | Imam Laiq Ahmed Atif — amjmalta@gmail.com

Kemm verament jingħad li, ‘dak li tiżra’ taħsad’, jiġifieri dak li nagħmlu llum, għada se jkollna r-riżultat tiegħu. Dan ifisser li l-futur ta’ pajjiżna jiddependi fuq il-ġenerazzjoni li qed inrabbu llum, għax iż-żgħażagħ tal-lum huma l-mexxejja ta’ għada. Jekk iż-żgħażagħ tal-lum ikunu trabbew bl-aħjar mod possibbli, iżommu f’moħħhom il-benesseri soċjali, reliġjuż, morali u komunitarju tagħhom.

Aspett allarmanti wieħed huwa l-użu dejjem jiżdied u eċċessiv tat-teknoloġija u l-pjattaformi tal-midja soċjali fost it-tfal u l-adolexxenti. Dan l-użu eċċessiv tat-teknoloġija u l-pjattaformi tal-midja soċjali qed iwassal għal tant kwistjonijiet ta’ saħħa u problemi soċjali bħas-saħħa mentali tat-tfal u l-adolexxenti tagħna.

Il-vizzju tat-teknoloġija u l-midja soċjali

Barra minn hekk, id-dipendenza fuq it-teknoloġija u l-midja soċjali qed tnaqqas il-kapaċitajiet ta’ wliedna, għax, ikun xi jkun il-bżonn, jiddependu fuq tant pjattaformi qabel ma jaħsbu profondament dwar is-suġġett u jiddependu kompletament fuq ir-riżultati tar-riċerka fuq l-internet. Minflok ma jrawmu u jtejbu l-kultura tal-brainstorming, jiddependu biss fuq it-teknoloġija u l-internet.

L-Organizzazzjoni Dinjija tas-Saħħa (WHO) ukoll qajmet allarm dwar din id-dipendenza dejjem tikber fuq it-teknoloġija u l-midja soċjali u appellat lill-gvern, l-industrija u s-soċjetà ċivili biex jieħdu azzjoni immedjata biex jagħmlu l-ispazji diġitali aktar sikuri, aktar b’saħħithom u aktar ekwi għaż-żgħażagħ.

Dan l-użu tal-midja soċjali u t-teknoloġija żdied tant li qed isir bħal vizzju u l-adolexxenti wrew xejra simili għall-vizzju fl-użu tal-midja soċjali.

Il-moderazzjoni hija l-aqwa

Nemmen li l-eċċess f’kull ħaġa huwa ta’ ħsara, u li l-moderazzjoni hija l-aħjar approċ fil-ħajja. Dan il-prinċipju huwa rifless b’mod sabiħ fid-diskors tal-Qaddis Profeta Muħammad, is-sliem għalih, li b’mod tajjeb ħafna enfasizza l-bilanċ, ir-rażan, u l-għajxien maħsub. Kemm jekk fil-qima, fl-ikel, fit-taħdit, jew fl-imġiba soċjali, huwa għallem li, “Il-moderazzjoni hija l-aqwa f’kull sitwazzjoni.” Jiġifieri t-triq tan-nofs twassal għall-benesseri u s-suċċess — kemm spiritwalment kif ukoll prattikament.

Fid-dinja tal-lum, dan l-għerf huwa speċjalment rilevanti fil-mod kif ninvolvu ruħna mat-teknoloġija u l-midja soċjali. Filwaqt li dawn l-għodod jistgħu joffru benefiċċji, l-użu eċċessiv, speċjalment mit-tfal u l-adolexxenti, ġie marbut ma’ diversi sfidi tas-saħħa mentali. L-applikazzjoni tat-tagħlim profetiku tal-moderazzjoni tista’ tgħinna nrawmu drawwiet aktar b’saħħithom, nipproteġu l-benesseri tagħna, u niggwidaw lill-ġenerazzjonijiet iżgħar lejn ħajja diġitali aktar bilanċjata.

Bla dubju, hemm bosta benefiċċji tal-internet, apparati teknoloġiċi u pjattaformi tal-midja soċjali, iżda jekk ma jintużawx b’moderazzjoni, jistgħu jwasslu għal għadd kbir ta’ kwistjonijiet soċjali, morali, ta’ mġiba u ta’ saħħa. Għalhekk, qabel ma jkun tard wisq, irridu nieħdu azzjoni konkreta.

Nevalwaw is-sistema edukattiva attwali

Naħseb li s-sistema edukattiva tagħna, minflok ma tipprovdi rimedju għal din il-problema li qed tiżdied b’mod konsiderevoli, qed issir parti mill-problema minflok li toffri soluzzjonijiet. It-tfal tal-iskola jekk m’għandhomx laptop u internet, jidher li ma jistgħux ikomplu bl-istudji tagħhom u ma jistgħux itemmu l-homework tagħhom. Għax l-għalliema jtellgħu l-homework online fuq pjattaformi pprovduti mill-iskola bħal ‘Teams’. Imbagħad tant assignments u homework li t-tfal iridu jagħmlu fuq laptops.

Għalhekk, anke jekk il-ġenituri jixtiequ jillimitaw l-użu tat-teknoloġija għal uliedhom, ma jistgħux, għax it-tfal jippreżentaw l-iskuża li ‘mbagħad ma jistgħux jagħmlu l-homework tagħhom u jlestu l-assignments tagħhom’. Mingħajr ma jħallu l-ebda għażla lill-ġenituri biex iċedu d-dixxiplina tagħhom. Għax, isir litteralment impossibbli għall-ġenituri li dejjem iżommu għajnejhom fuq it-tfal jekk dawn humiex qed jużaw il-laptop għall-homework jew biex jilagħbu l-logħob tal-kompjuter jew jaraw il-midja soċjali eċċ.

Għalhekk, nissuġġerixxi li għandna nevalwaw is-sistema edukattiva attwali f’termini ta’ użu teknoloġiku, u biex infasslu pjan ċar li jgħin lill-ġenerazzjoni futura f’kull aspett tal-ħajja inkluż l-edukazzjoni.

Naħseb li l-użu tal-laptop u l-internet għandu jkun limitat ħafna għat-tfal tal-iskola matul l-edukazzjoni tagħhom sakemm jaslu għal-livelli tal-Junior College. L-istil antikwat tal-pinna u n-notebook huwa ħafna aħjar biex wieħed itejjeb u jsaħħaħ il-kapaċitajiet u l-ħsieb profond tat-tfal.

Il-Mexxej tal-Komunità Ahmadiyya Musulmana dejjem enfasizza l-użu moderat, xieraq u bbilanċjat tal-internet u ggwida dwar din il-kwistjoni fil-fond. Huwa qal li jekk tqatta’ l-ġurnata kollha tiegħek tara programmi li ma fihom l-ebda lezzjoni morali, allura dan jammonta għal attività fiergħa u inutli. Barra minn hekk, fuq l-internet, xi kultant iżżur siti bħal dawn minn fejn m’hemm l-ebda punt ta’ ritorn u dan ixerred kontinwament l-immoralità. Apparti minn hekk, hemm ħafna programmi oħra fuq l-internet u l-midja soċjali li jivvalenaw l-imħuħ u jħallu effett negattiv fuq moħħ it-tfal. Għalhekk, huwa importanti li dejjem niżnu aħjar qabel nagħmlu xi ħaġa.

Id-dokument dwar il-politika tal-WHO

L-Organizzazzjoni Dinjija tas-Saħħa (WHO) immarkat tmien punti għall-azzjoni biex tindirizza id-determinanti diġitali li jaffettwaw is-saħħa mentali u l-benesseri taż-żgħażagħ u sejħet biex tagħmel il-ħajja diġitali prijorità nazzjonali tas-saħħa pubblika. Hija enfasizzat li jkun hemm tfassil ta’ gwida ċara dwar l-użu ta’ teknoloġija diġitali sana; li tiżdied ir-riċerka dwar l-impatt tal-midja soċjali fuq is-saħħa mentali u l-benesseri taż-żgħażagħ; u li jkun hemm investiment u promozzjoni ta’ alternattivi għat-trobbija, logħob u divertiment diġitali.

Jekk il-partijiet interessati kollha—ġenituri, dawk li jfasslu l-politika, il-gvern, l-edukaturi u s-soċjetà ċivili— jaħdmu flimkien f’fehim reċiproku u pjan direzzjonali ċar, din il-kwistjoni li qed tikber tista’ tiġi indirizzata qabel ma jkun tard wisq.

Posted in Ahmadiyya Malta, Article, www.Ahmadiyya.mt | Tagged Addiction, Ahmadiyya Malta, Artilce, Digital factors, Il-moderazzjoni, il-vizzju, Islam, Islam Ahmadiyya, It-Torċa, Laiq Ahmed Atif, Malta, Maltese, Mental Health, Moderation, Quran, social media, Technology, WHO | Leave a comment

Dar tal-Providenza Volleyball Marathon 2025

Posted on July 18, 2025 by Laiq Ahmed Atif

During the Id-Dar tal-Providenza Volleyball Marathon 2025

Posted in Ahmadiyya Malta | Leave a comment

The role of grandparents

Posted on July 16, 2025 by Laiq Ahmed Atif

Posted in Ahmadiyya, Ahmadiyya Malta, Interviews, TV interviews | Tagged Ahmadiyya Malta, grandparents, in-Nanniet, Islam, Malta, Maltese, Quran, Radju Malta, TV, TVM | Leave a comment

Nirringrazzja anke lill-ġebel

Posted on July 13, 2025 by Laiq Ahmed Atif

Photo: Caritas Malta

NIRRINGRAZZJA ANKE LILL-ĠEBEL…

It-Torċa, 13.07.2025 | Imam Laiq Ahmed Atif — amjmalta@gmail.com

“Nirringrazzja anke lill-ġebel ta’ madwar, aħseb u ara ’l-Caritas Malta u n-nies li jaħdmu fi ħdan il-Caritas, kemm jien grata lejhom ilkoll li għamlu sforz biex ibni joħroġ minn dan l-episodju mudlam ta’ ħajtu.” Dan kien il-kliem ta’ waħda omm li rat lil binha jiggradwa mill-Caritas Malta wara mixja ta’ suċċess li għenitu biex jegħleb il-vizzju tad-dipendenza. Dan il-kliem tal-apprezzament u l-gratitudni lejn kull min ħadem għal binha huwa bla dubju ta’ xejn kliem li għandna nirriflettu fuqu. Il-gratitudni tagħha ma kinitx għall-ħaddiema biss, iżda anke għall-ambjent, inkluż il-ġebel ta’ madwar, li għen lil binha.

L-imħabba bla kundizzjoni

Bla dubju ta’ xejn dan il-kliem huwa tad-deheb il-għaliex juri l-imħabba bla kundizzjoni tal-omm lejn uliedha. Dan juri wkoll li meta t-tfal jirnexxu f’ħajjithom dan inissel ħafna ferħ, kuntentizza u sodisfazzjon lill-ġenituri li dejjem joħolmu bil-ġid, il-prosperità u s-saħħa għal uliedhom.

Barra minn hekk, dan ifisser li meta t-tfal jaqgħu f’xi vizzju dan iweġġa’ ħafna lill-ġenituri tagħhom; u nista’ ngħid li l-iktar li jħossu l-uġigħ tat-telfa tal-bniedem huma l-ġenituri tiegħu. U għaliex le, għax huma dawn il-ġenituri li għallmu lil uliedhom jimxu billi jżommulhom subgħajhom, li kienu jżommuhom meta jibdew jaqgħu, li kkunsidraw l-uġigħ tagħhom bħala l-uġigħ tagħhom stess, u li l-faraġ tagħhom kien l-aktar għażiż għal dawn il-ġenituri.

Tassew, il-ġenituri huma dak ir-rigal kbir ta’ Alla li Jista’ Kollox li jissagrifikaw kollox għall-paċi, il-kuntentizza, il-faraġ, il-progress, il-prosperità, l-unur, id-dinjità, u s-suċċess ta’ wliedhom u, jekk ikun meħtieġ, ma joqogħdux lura milli jissagrifikaw ħajjithom.

Ma nweġġgħux lill-imħabba bla paragun

Allura, għandna nweġġgħu lil dawk li jħobbuna b’tant altruwiżmu? M’għandniex napprezzaw is-sentimenti ta’ dawk li jixtiqulna l-ġid?

Tabilħaqq, dawk li jixtiequ l-ġid b’mod altruwista u bla paragun m’għandhomx biss jiġu onorati u rispettati, iżda kull pass għandu jittieħed b’attenzjoni u kawtela kbira sabiex l-ebda azzjoni tagħna ma tikkawżalhom xi wġigħ.

Minn perspettiva oħra, il-kliem ta’ din l-omm huwa xhieda tal-fatt li kemm id-drogi u l-vizzji jagħmlu ħsara lill-bniedem u lil dawk kollha ta’ madwaru. Meta l-bniedem jiddependi fuq is-sustanza, mhux biss isir l-iskjav tad-dipendenza, u jitlef l-indipendenza tiegħu u jagħmel ħsara lilu nnifsu, iżda jikkawża ħsara kbira anke lill-familja, ’il-ġenituri, ’il-qraba, ’il-ħbieb u lil dawk kollha li huma madwaru.

Il-vizzju mhux biss ikisser lill-persuna, iżda anke r-relazzjonijiet kollha tiegħu. In-nies ta’ madwaru u l-kollegi tax-xogħol inaqqsu ħafna mill-fiduċja fih.

Il-ħabs tal-vizzju

Għalhekk, irridu nagħmlu dak kollu possibbli biex inkissru din ix-xibka tal-vizzju u nsalvaw liż-żgħażagħ tagħna minn dan il-ħabs tal-vizzju, il-ħabs tal-qerda. L-Iżlam jgħallimna li ġisimna u moħħna huma fiduċja mingħand Alla, u se nkunu responsabbli għal kif nittrattawhom. Huwa obbligu kollettiv fuq is-soċjetà li tipproteġi liż-żgħażagħ tagħna milli jaqgħu fil-ħsara, inkluż il-qabda ta’ kwalunkwe forma ta’ vizzju, kemm jekk ikunu drogi, alkoħol, jew imġiba distruttiva u mhux xierqa.

Irridu naħdmu b’għaqda, kompassjoni, u dedikazzjoni biex inżommu liż-żgħażagħ tagħna ħafna u ħafna ’l bogħod minn dipendenzi bħal dawn. Tabilħaqq, iż-żgħażagħ mhux biss huma s-sinsla tan-nazzjon tagħna iżda wkoll it-tama futura. Għandhom jiġu mrawma bi trobbija morali u spiritwali, protetti, u ggwidati sabiex qatt ma jaqgħu fin-nassa qarrieqa tal-vizzju.

Il-Qaddis Profeta Muħammad, is-sliem għalih, qal: “Kull wieħed minnkom huwa ragħaj, u kull wieħed minnkom huwa responsabbli għall-merħla tiegħu”, u enfasizza r-responsabbiltà tal-ġenituri u l-komunità biex jissalvagwardjaw il-ġenerazzjonijiet futuri.

Rodd lura lejn is-soċjetà

Kien appell li jmisslek qalbek minn omm li qalet lil binha li, “Agħti lura lis-soċjetà u lin-nazzjon li rċevejt mingħandhom.” F’termini Iżlamiċi, dan jirrifletti l-kunċett ta’ gratitudni mhux biss lejn in-nies iżda l-ewwel u qabel kollox lejn Alla l-Ħanin talli jagħtina l-irkupru, is-saħħa, u ċans ieħor fil-ħajja. Issa, isir id-dmir tiegħek—mhux biss li tibqa’ impenjat għall-fejqan u t-tkabbir tiegħek stess—iżda wkoll li tgħin lil ħaddieħor.

Alla jgħid fil-Koran Imqaddes: “Għinu lil xulxin fit-tjieba u l-pjetà; imma tgħinux lil xulxin f’affarijiet ħżiena, id-dnub u t-trasgressjoni.” (5:3)

Għandi seba’ mitt sena biex naraha hekk

Omm waħda, mimlija bil-gratitudni, esprimiet kemm stenniet żmien twil biex tara lil bintha teħles mill-vizzju u qalet, “Għandi seba’ mitt sena biex naraha hekk.” Messaġġ ieħor ta’ kuraġġ kien li, “Kont tlift lilek innifsek u llum sibt lilek innifsek mill-ġdid.” Dan huwa simili għall-kunċett Iżlamiku tal-indiema, fejn min jemmen jirritorna fit-triq tat-tjieba wara li jitbiegħed.

Alla huwa l-Aktar Ħanin, u Huwa jgħid fil-Koran: “Għid, ‘O qaddejja Tiegħi li wettqu eċċessi kontra ruħhom stess! Taqtgħux qalbkom mill-ħniena ta’ Alla, żgur Alla jaħfer id-dnubiet kollha. Tassew Hu l-Aktar li Jaħfer u l-Ħanin.’” (39:54)

Għalhekk, qatt ma tħarsu lura ħlief biex tirriflettu u tkunu grati. Imxu ’l quddiem fit-triq tas-saħħa, it-tjieba, u l-iskop. Ħalli kull pass ikun forma ta’ qima, gratitudni u kontribut għall-bini ta’ soċjetà paċifika, ħielsa mid-droga u moralment u spiritwalment b’saħħitha.

Dawn mhumiex biss appelli emozzjonali—huma tfakkiriet ibbażati kemm fuq l-imħabba tal-ġenituri kif ukoll fuq il-gwida divina. Konversazzjonijiet bħal dawn huma essenzjali f’kull dar. Il-ġenituri għandhom jiggwidaw liż-żgħażagħ tagħhom bi mħabba, jedukawhom dwar il-konsegwenzi spiritwali, fiżiċi u soċjali tal-vizzju, u jagħtuhom is-setgħa li jgħidu “le” għal kull ħaġa li tbegħedhom minn Alla u mill-potenzjal li Hu poġġa fihom.

Jalla Alla jipproteġi liż-żgħażagħ tagħna, isaħħaħ il-komunitajiet tagħna, u jiggwida lil dawk kollha li qed jitħabtu mal-vizzju lejn irkupru sħiħ u paċi vera. Ammen.

Posted in Ahmadiyya, Ahmadiyya Malta, Ahmadiyya: The True Islam, Article, www.Ahmadiyya.mt | Tagged Addiction, Ahmadiyya Malta, Article, Caritas, Caritas Malta, Drugs, Il-ħabs tal-vizzju, Islam, It-Torċa, Laiq Ahmed Atif, Malta, Maltese, Quran, vizzju | Leave a comment

Together against hate and racism; while building bridges, not barriers

Posted on July 6, 2025 by Laiq Ahmed Atif

Photo: MIA Studio / Shutterstock.com

Flimkien kontra l-mibegħda u r-razziżmu; filwaqt li nibnu pontijiet, u mhux ostakli

It-Torċa, 06.07.2025 | Imam Laiq Ahmed Atif — amjmalta@gmail.com

F’dinja li qed titħabat mal-firda, ir-razziżmu, u l-intolleranza reliġjuża, il-prinċipji tal-Iżlam joffru messaġġ ċar u qawwi: il-bnedmin kollha huma ugwali fil-valur u d-dinjità. L-Iżlam jirrifjuta kull forma ta’ superjorità razzjali u mibegħda bbażata fuq il-fidi, u minflok jippromwovi l-għaqda, il-ġustizzja, il-ħbiberija, u l-kompassjoni.

Ir-razziżmu: Kunċett mhux aċċettabbli fl-Iżlam

Ir-razziżmu huwa t-twemmin li ċerti razez huma intrinsikament superjuri jew inferjuri għal oħrajn. Dan iwassal għal inġustizzja, mibegħda, u kunflitt. L-Iżlam iżomm sod kontra din l-ideoloġija.

Il-Koran jenfasizza l-għaqda tal-umanità jgħid: “Ja bnedmin, aħna ħloqniekom minn raġel u mara; u qassamniekom fi tribujiet u fi tribujiet iċken ħalli ssiru tafu lil xulxin. Tabilħaqq, l-aktar nobbli minnkom quddiem Alla huwa dak l-aktar devot fostkom.” (Il-Koran, 49:14)

Dan il-vers jenfasizza żewġ punti ewlenin: id-diversità hija sinjal tal-ħolqien ta’ Alla — mhux bażi għad-diskriminazzjoni; it-tieni, is-superjorità hija bbażata biss fuq it-tjieba u l-karattru, mhux fuq ir-razza, l-etniċità, jew in-nazzjonalità.

Il-ħsara tal-mibegħda u r-razziżmu

Ir-razziżmu mhux biss huwa ħażin iżda huwa att diżgustanti ħafna, moqżież u kundannabbli f’kull forma u minn min jitwettaq. Mhux biss għax ikażbar lill-bnedmin sħabna u jġiegħel lir-razzist iħossu aħjar, tal-klassi għolja u tabilħaqq arroganti, iżda wkoll għax idgħajjef id-dinjità tal-bniedem, jirriskja l-paċi u s-sigurtà tas-soċjetà u barra minn hekk iwassal għall-ħolqien ta’ għadwa, firdiet u rivalitajiet, minflok kompassjoni, ħbiberija u għaqda.

Allura meta soċjetà tkun nieqsa mill-paċi, it-tolleranza u l-armonija, il-vojt jimtela bi ħsibijiet u ideoloġiji radikali. Sitwazzjoni bħal din mhux biss tpoġġi lis-soċjetà kollha f’biża’ mill-konsegwenzi mhux magħrufa, iżda wkoll tiddestabbilizza l-ordni fil-pajjiż u ddgħajjef it-tkabbir ekonomiku.

Għalhekk, bħala bnedmin, aħna mgħallma nkunu simpatetiċi, ġenerużi u kkonċernati lejn il-bnedmin sħabna kollha mingħajr ebda distinzjoni jew diskriminazzjoni. Fuq kollox, aħna lkoll bnedmin u għandna l-istess kulur tad-demm u l-istess ċelloli—ħomor u bojod. Għalhekk, il-forom ta’ barra mhumiex importanti daqs ir-ruħ ġewwiena tagħna.

Alla jħares lejn qlubkom

Il-Qaddis Profeta Muħammad, is-sliem għalih, spjega dan il-punt b’mod sabiħ u fil-qosor billi qal li, “Tassew, Allah ma jħarisx lejn is-suriet u l-uċuħ tagħkom u l-ġid u r-rikkezzi tagħkom imma Hu tabilħaqq iħares lejn qlubkom u l-azzjonijiet tagħkom.”

Bl-istess mod, mhux importanti kif nittrattaw lil ħaddieħor jekk qlubna ma jikkumplimentawx l-azzjonijiet u l-espressjonijiet tagħna. Il-qoxra ta’ barra tagħna għandha tirrifletti għalkollox il-persuna interna tagħna. L-imħabba tagħna għall-bnedmin sħabna għandha tkun ħierġa mill-empatija u l-kompassjoni sinċieri u profondi tagħna għall-umanità, inkella, ma sservi l-ebda skop jekk tkun ibbażata fuq l-ipokresija u l-pretensjoni, kif spjega l-Fundatur tal-Komunità Ahmadiyya Musulmana meta qal:

“Kunu ġenerużi u qalbkom tajba mal-umanità kollha. Kunu umli fl-ispirtu, kunu ġenerużi u ġentili, u aħfru, uru simpatija lejn kulħadd u awguraw lil kulħadd, ħalli tkunu aċċettati.

Hemm ħafna li jippretendu li huma qalbhom tajba, ġentili u li jaħfru lil għajrhom, iżda minn ġewwa huma lpup; hemm ħafna li minn barra jidhru safja, imma f’qalbhom huma sriep. Ma tistgħux tiġu aċċettati fil-preżenza tal-Mulej jekk m’intomx safja, kemm minn ġewwa kif ukoll minn barra.”

Il-proġett ‘SKIN’ tal-NCPE

Biex nifhmu s-saħta tar-razziżmu huwa importanti li npoġġu lilna nfusna fil-post ta’ min esperjenza diskriminazzjoni u razziżmu, jew mibegħda minħabba l-isfond reliġjuż tiegħu. Huwa biss dakinhar li nistgħu nifhmu kif inħossuna meta nkunu fuq in-naħa li nirċevuha.

Ftit jiem ilu, il-Kummissjoni Nazzjonali għall-Promozzjoni tal-Ugwaljanza (NCPE) organizzat il-konferenza tal-għeluq tal-proġett SKIN – ‘Tisħiħ tal-għarfien dwar l-integrazzjoni u n-non-diskriminazzjoni’ biex tenfasizza l-importanza tal-armonija razzjali u l-paċi u l-fehim interreliġjuż. F’din il-konferenza smajna wkoll xi esperjenzi, stejjer, kummenti u stqarrijiet mimlija wġigħ u dwejjaq.

Dinja: Sala tal-eżamijiet

Nemmen li din id-dinja hija bħal sala tal-eżamijiet fejn irridu naħdmu ħafna biex ngħaddu mill-eżamijiet tagħna. Huwa eżami ta’ żewġ responsabbiltajiet fundamentali li kull bniedem iġorr, u dan huwa l-iskop u l-objettiv tal-ħolqien tal-umanità — id-drittijiet ta’ Alla li Jista’ Kollox u d-drittijiet li għandna lejn sħabna l-bnedmin. Fil-qosor, din id-dinja hija post ta’ eżami dwar kif nittrattaw lil sħabna l-bnedmin.

Sejħa għall-għaqda u l-kompassjoni

Tqum il-mistoqsija: kif nistgħu nibnu soċjetà ta’ armonija razzjali u reliġjuża? Jista’ dan il-ħolm isir realtà?

Nemmen tassew li iva, huwa kompitu possibbli ħafna u li jista’ jsir; u nistgħu nagħmlu dan il-ħolm realtà. It-trasformazzjoni tal-karattru u l-imġiba hija bħal maratona twila; jekk titkompla b’determinazzjoni, żelu u viżjoni u objettiv ċari, żgur li se tkun ta’ suċċess. Irridu naħdmu bis-sħiħ u bl-akbar kooperazzjoni, sħubija u fehim reċiproku lejn il-bini ta’ soċjetà armonjuża, paċifika u b’saħħitha.

Irridu nibnu narrattiva inklużiva ta’ armonija u ugwaljanza razzjali, tolleranza u fehim reliġjuż, imħabba u rispett reċiproku, ibbażat fuq il-prinċipju—Imħabba għal kulħadd, mibegħda għal ħadd— lejn il-ħolqien ta’ soċjetà aħjar għalina u għal uliedna.

Posted in Ahmadiyya Malta, Article | Tagged bridges not barriers, Building bridges, Hate, Hatred, Il-mibegħda, Il-proġett ‘SKIN’ tal-NCPE, Ir-razziżmu, It-Torċa, Malta, Maltese, NCPE, SKIN Project | Leave a comment

Recognizing and Celebrating our Everyday Heroes

Posted on July 2, 2025 by Laiq Ahmed Atif

Nirrikonoxxu u niċċelebraw l-eroj tagħna ta’ kuljum

In-Nazzjon, 02.07.2025 | Imam Laiq Ahmed Atif — amjmalta@gmail.com

Il-gratitudni hija waħda mill-aktar valuri umani profondi. Kif qal b’mod sabiħ il-Qaddis Profeta Muħammad (il-paċi tkun miegħu), “Min ma jiżżix ħajr lin-nies, lanqas ma jiżżi ħajr lil Alla.” Dan il-kliem ifakkarna li, biex nuru apprezzament lejn dawk ta’ madwarna mhux biżżejjed li jkollna manjieri tajbin, iżda, li din hija wkoll responsabbiltà spiritwali u morali.

Ħafna drabi, meta naħsbu f’nies biex niċċelebraw jew nonorawhom, l-attenzjoni tagħna tmur lejn dawk li huma fl-għajn tal-pubbliku, bħal ċelebritajiet, mexxejja, jew influencers.

Iżda hemm ħafna individwi li jaħdmu bil-kwiet u b’mod konsistenti wara l-kwinti, u jagħmlu differenza reali fil-komunitajiet tagħhom. Jistgħu ma jfittxux rikonoxximent, iżda l-kontribut tagħhom huwa essenzjali għall-benesseri tas-soċjetà tagħna.

Il-qawwa tal-gratitudni u r-rikonoxximent

Li nirrikonoxxu individwi bħal dawn huwa importanti għal diversi raġunijiet. L-ewwel, jafferma l-valur tal-isforzi tagħhom. Meta xi ħadd iħossu meqjus u apprezzat, dan isaħħaħ il-moral tiegħu u jinkoraġġih ikompli x-xogħol pożittiv tiegħu.

It-tieni, ir-rikonoxximent pubbliku jista’ jservi ta’ ispirazzjoni għal oħrajn. Dawk li m’għadhomx lesti jew deċiżi li jekk jistgħu jew le jagħmlu l-kontribut tagħhom lejn is-soċjetà u n-nazzjon.

Dan juri wkoll li m’għandekx għalfejn tkun famuż biex tagħmel impatt, iżda, sempliċement għandek bżonn dedikazzjoni, kompassjoni, u xewqa li taqdi.

L-apprezzament għall-inizjattiva ispiranti

F’dan il-kuntest, nixtieq nesprimi l-apprezzament profond tiegħi għall-inizjattiva ispiranti mmexxija mill-ħabib tagħna, l-Onorevoli Ivan Bartolo, li għal darb’oħra organizza l-attività mill-isbaħ ‘Premju Formidabbli’ biex jiġu premjati wħud minn dawk li jagħtu u joffru fis-skiet mill-aħjar li jistgħu lis-soċjetà.

Issa fit-tielet sena tagħha, din iċ-ċerimonja tal-premjazzjoni hija ddedikata biex tirrikonoxxi u tiċċelebra lil dawk li qed jagħtu lura lis-soċjetà bil-kwiet iżda b’mod qawwi bil-modi tagħhom stess.

Din is-sena, sitt attivisti u persuni b’diżabilità kienu r-rebbieħa tal-Premju Formidabbli 2025, u rċevew midalji għas-servizz eċċellenti tagħhom. Ir-rebbieħa kienu Anatole Baldacchino, Adrian Casha, Tony Cachia, Mary Jane Cutajar, Erika Ferrante u Nicole Muscat.

Kull wieħed u waħda minnhom huwa eżempju brillanti ta’ kif id-determinazzjoni, ir-reżiljenza, u t-tjubija jistgħu jegħlbu anke l-akbar sfidi. L-istejjer tagħhom iservu bħala tfakkira li kull persuna għandha l-potenzjal li tikkontribwixxi b’mod sinifikanti, irrispettivament mill-ostakli li tista’ tiffaċċja.

Storja li serqet il-qlub

Fost dawk li rċevew il-premjijiet kien hemm is-Sinjura Mary Jane Cutajar, li l-istorja tagħha messet il-qlub b’mod profond lil kulħadd preżenti. Mary nieqsa mid-dawl, kundizzjoni li tista’ faċilment tagħmel il-kompiti ta’ kuljum diffiċli.

Madankollu, tagħżel li ma tħallihiex tiddefinixxi l-limiti tagħha. Minflok, hija tagħmel volontarjat bħala receptionist fil-Millennium Chapel, fejn tqatta’ sigħat twal tappoġġja u tiggwida lin-nies fi żminijiet ta’ bżonn.

Mary hi bniedma li dejjem lesta tisma’ u tgħin lil kull min iħabbat il-bieb, bla ebda ġudizzju. Il-preżenza, il-paċenzja u l-kompassjoni tagħha jġibu faraġ u tama lil ħafna.

Stejjer bħal ta’ Mary mhumiex rari, sempliċement mhux ta’ spiss jiġu fil-pubbliku. Bla dubju ta’ xejn hemm ħafna bħalha li jagħtu sehemhom lis-soċjetà: persuni b’diżabilità u voluntiera li jikkontribwixxu bil-kwiet, mingħajr ma jistennew xi ħaġa lura; lanqas viżibilità. Dawn huma l-eroj mhux magħrufa tal-komunitajiet tagħna, iżda huma l-eroj vera li għandna nkunu kburin bihom.

It-tama u l-ispirazzjoni

Fi kliem l-Onorevoli Ivan Bartolo dawn “huma ta’ eżempju għalina lkoll li tlifna kull tama u li qtajna qalbna” u qal li “minn hawn se nieħdu tama.”

Huwa ħeġġeġ “ejjew inkomplu naħdmu biex nibnu l-mentalità, nisfidaw l-ostakli u noħolqu soċjetà fejn, iva nistgħu ngħixu fl-aħjar possibbli. Quddiemna għandna impenn kontinwu li nibnu soċjetà inklussiva u l-missjoni tagħna hija li f’dan is-settur nibqgħu ntejbu inizjattivi u miżuri, anki jekk il-progress f’das-settur baqa’ għaddej.”

Id-dmir soċjali tagħna

Huwa d-dmir tagħna — bħala individwi u bħala soċjetà — li nirrikonoxxuhom u nifirħulhom. Kelma sempliċi ta’ ringrazzjament, rikonoxximent pubbliku, jew saħansitra ġest żgħir ta’ apprezzament jista’ jgħin ħafna. Billi nagħmlu dan, nibnu kultura li tapprezza t-tjieba, il-perseveranza, id-determinazzjoni, is-simpatija u s-sens ta’ responsabbiltà soċjali.

Ejjew inkomplu nappoġġjaw inizjattivi bħall-Premju Formidabbli u, aktar importanti minn hekk, ejjew naħdmu biex inġorru dan l-ispirtu ta’ rikonoxximent fil-ħajja tagħna ta’ kuljum. Jalla nkunu dejjem grati, mhux biss bil-kliem iżda bl-azzjoni — billi ngħollu lil dawk li jgħollu lil ħaddieħor, u billi niċċelebraw l-eroj kwieti li jagħmlu d-dinja tagħna post aħjar.

Għalhekk, tassew jistħoqqilhom li napprezzawhom u nonorawhom b’mod tajjeb ħafna, u nkunu grati lejhom għax-xogħol siewi ħafna tagħhom, għax “min ma jiżżix ħajr lin-nies, lanqas ma jiżżi ħajr lil Alla”.

Posted in Ahmadiyya Malta, Article | Tagged Ahmadiyya Malta, Article, Imam, Imam Atif, Imam Malta, In-Nazzjon, Islam, Malta, Maltese, Quran, Quranic, Religion | Leave a comment

Economic Advancement Depends on Peace and Harmony

Posted on June 29, 2025 by Laiq Ahmed Atif

Photo: iStock.com/Dilok Klaisataporn

L-AVVANZ EKONOMIKU JIDDEPENDI FUQ IL-PAĊI U L-ARMONIJA

L-uġigħ ma joffri l-ebda faraġ, il-mard ma jġib l-ebda saħħa—bl-istess mod, dinja fi stat ta’ taqlib ma tistax tagħti lok għal ekonomija li qed tiffjorixxi. Dinja maqsuma u midruba, dinja mimlija bil-gwerra, l-inġustizzja, u l-kaos, ma tistax tikseb żvilupp ekonomiku sostenibbli. Għalhekk, biex id-dinja tikseb avvanz ekonomiku sinifikanti, huwa essenzjali li l-ewwel infejqu d-diviżjonijiet u l-firdiet li jolqtu s-soċjetà globali tagħna.

It-Torċa, 29.06.2025 | Imam Laiq Ahmed Atif — amjmalta@gmail.com

Ġisem uman jista’ jaħdem—mentalment, fiżikament, u emozzjonalment—bl-aħjar mod biss meta jkun b’saħħtu, mimli saħħa, u sostnut sew. Hekk kif ġisimna jeħtieġ kura u manutenzjoni xierqa biex jiffunzjona bl-aħjar mod, l-istess prinċipju japplika għal sistemi u strutturi oħra f’ħajjitna. Pereżempju, vettura tista’ topera biss b’mod sikur u effiċjenti fit-triq meta tkun f’kundizzjoni tajba, iċċekkjata regolarment, u ħielsa minn ħsarat kbar. Bl-istess mod, magna tista’ tagħti riżultati preċiżi u effettivi biss meta ma tkunx imħassra, miżmuma tajjeb, u użata f’ambjent sikur.

Bl-istess mod, id-dinja tista’ tikseb tkabbir u żvilupp ekonomiku veru biss meta tkun fi stat ta’ stabbiltà, paċi, u saħħa tajba b’mod ġenerali—soċjalment, politikament, u ambjentalment. Hekk kif individwu mhux b’saħħtu jitħabat biex iwettaq attivitajiet bażiċi ta’ kuljum, soċjetà milquta minn diżordni, kunflitt, jew vjolenza ssibha kważi impossibbli li tiffunzjona b’mod produttiv, aħseb u ara tirnexxi ekonomikament. Dinja midruba u maqsuma mmarkata minn firda, gwerra, inugwaljanza, u kaos hi nieqsa mill-istabbiltà fundamentali meħtieġa għal progress ekonomiku sostenibbli.

L-uġigħ ma jistax iġib faraġ

Hekk kif l-uġigħ ma jistax iġib faraġ, u l-mard ma jissinifikax saħħa, soċjetà mkissra jew mhux sana ma tistax isservi bħala l-pedament għal ekonomija b’saħħitha u stabbli.

Dan il-kunċett mhuwiex diffiċli biex wieħed jifhmu. Ma teħtieġx għarfien xjentifiku avvanzat jew teoriji kumplessi biex tifhmu. Pjuttost, hija verità sempliċi u naturali—waħda li hi marbuta ma’ kull bniedem permezz tal-esperjenza personali.

F’xi punt fil-ħajja, kull wieħed u waħda minna ffaċċja l-mard, u nafu mill-ewwel kemm isir diffiċli li nlestu anke l-aktar affarijiet jew dmirijiet bażiċi meta ma nkunux tajbin. Matul żminijiet bħal dawn, anke ħafna drabi ma nkunux nistgħu nattendu x-xogħol jew nikkontribwixxu b’mod sinifikanti għar-responsabbiltajiet tagħna, li min-naħa tiegħu jaffettwa l-produttività u l-progress kemm fuq livell individwali kif ukoll kollettiv.

Infejqu d-diviżjonijiet u l-firdiet

Fil-qosor, biex id-dinja timxi ’l quddiem u tikseb avvanz ekonomiku sinifikanti, huwa essenzjali li l-ewwel infejqu d-diviżjonijiet u l-firdiet li jolqtu s-soċjetà globali tagħna. Dan jinvolvi t-trawwim tal-paċi fi ħdan u fost in-nazzjonijiet, il-promozzjoni tal-armonija soċjali, u l-ħolqien ta’ kundizzjonijiet fejn il-kooperazzjoni, il-fehim, u r-rispett reċiproku jistgħu jiffjorixxu. Huwa biss f’dinja li tapprezza u żżomm il-paċi, is-serenità, u l-għaqda li nistgħu nittamaw li nibnu ekonomija globali b’saħħitha u prospera.

Il-Mexxej Dinji tal-Komunità Ahmadiyya Musulmana, Ħażrat Mirża Masroor Aħmad, għal ħafna snin qed jiġbed l-attenzjoni tad-dinja lejn dan il-punt importanti li mingħajr paċi u sliem ma nistgħux navvanzaw ekonomikament. Fl-2009 huwa ħeġġeġ lill-mexxejja biex ibiddlu l-attenzjoni tagħhom lejn il-kisba tal-paċi fid-dinja; imbagħad, jaraw l-ekonomiji tagħhom jirnexxu. Huwa qal:

“Kulma nixtieq ngħid huwa li l-paċi tiddependi fuq il-ġustizzja u l-progress ekonomiku jiddependi fuq il-paċi. Dan jiġri biss meta l-bniedem jagħraf lill-Ħallieq Tiegħu u b’riżultat ta’ dan id-drittijiet tal-ħolqien ta’ Alla jkunu mħarsa.”

Huwa wissa wkoll li jekk is-sitwazzjoni tal-kunflitti ma tinbidilx, dan se jirriżulta f’aktar inkwiet u diżordni, u ġibed l-attenzjoni dinjija lejn l-għaqda u qal li, “Għalhekk f’dan iż-żmien diffiċli għandna lkoll kemm aħna nżommu jdejn xulxin ħalli nwasslu l-paċi vera fid-dinja.”

In-nuqqas ta’ paċi qed jagħmel ħsara lill-ekonomija

In-nuqqas ta’ paċi għandu konsegwenzi estensivi li jestendu lil hinn mit-tħassib umanitarju immedjat—idgħajjef b’mod sinifikanti l-istabbiltà u t-tkabbir ekonomiku. L-inkwiet globali jfixkel il-kummerċ internazzjonali, jiddistabbilizza s-swieq, u jiddevja riżorsi kritiċi lejn l-infiq militari minflok l-iżvilupp. Hekk kif in-nazzjonijiet jallokaw aktar fondi għall-armi u d-difiża, jinħoloq żbilanċ enormi fis-sistema ekonomika. Din l-espansjoni militari ħafna drabi żżid aktar tensjoni, u twassal għal ċiklu ta’ insigurtà u ineffiċjenza ekonomika.

Minn kwalunkwe perspettiva—kemm jekk umanitarja, politika, jew ekonomika—il-paċi hija essenzjali għall-iżvilupp sostenibbli u t-titjib tal-ħajja tal-bniedem. Mingħajrha, il-prosperità tibqa’ barra mill-ambitu.

L-infiq għad-difiża fl-Ewropa

Eżempju ċar jista’ jidher fl-Ewropa. Il-kunflitti kontinwi u l-instabbiltà ġeopolitika fir-reġjun wasslu għal żieda drammatika fl-infiq għad-difiża. Skont il-Kunsill Ewropew, l-infiq totali għad-difiża tal-istati membri tal-UE żdied b’aktar minn 30% bejn l-2021 u l-2024. Sal-2024, kien laħaq madwar €326 biljun. Għal tqabbil, fl-2005, dik iċ-ċifra kienet ta’ €149 biljun. Jiġifieri, f’inqas minn żewġ deċennji, il-baġit tad-difiża tal-Ewropa aktar milli rdoppja.

Din iż-żieda fl-infiq militari ġibdet ħafna attenzjoni. Fl-20 ta’ Ġunju 2025, Bloomberg irrapporta dwar l-espansjoni mgħaġġla tad-difiża tar-reġjun, fejn innota li “l-gvernijiet [qed] jibdew espansjoni bla preċedent tal-infiq għad-difiża.” Skont Bloomberg, fil-Paris Air Show f’Ġunju 2025, din il-bidla kienet evidenti hekk kif id-diskussjonijiet iffokaw ħafna fuq fighter jets, drones, u sistemi ta’ missili, minflok l-ordnijiet ta’ inġenji tal-ajru kummerċjali li s-soltu jiddominaw l-expo.

Messaġġ ċar kristall

Il-messaġġ huwa ċar: l-eskalazzjoni tal-kunflitt twassal għal bidla fil-prijoritajiet, mit-tkabbir u l-iżvilupp għall-avvanz militari u d-difiża. Jekk in-nazzjonijiet iridu jiżguraw futur prosperu, il-paċi trid tkun fiċ-ċentru tal-ippjanar ekonomiku u l-kooperazzjoni globali; u l-paċi għandha dejjem tingħata l-prijorità. Għax, l-avvanz ekonomiku jiddependi fuq il-paċi u l-armonija.

Posted in Ahmadiyya Malta, Ahmadiyya: The True Islam, Article, www.Ahmadiyya.mt | Tagged Ahmadiyya Malta, Article, Division, Economical Progress, economy, Ekonomija, Harmony, Imam, Imam Atif, Imam Malta, Islam, It-Torċa, Laiq Ahmed Atif, Malta, Maltese, Peace, Quran, Security, Unity | Leave a comment

Several Aspects that lead to a Stronger Family

Posted on June 29, 2025 by Laiq Ahmed Atif

Posted in Interviews | Tagged Familja, Family, Family Life, Family Wellbeing, MG Cafe, Radju Malta | Leave a comment

Id-Dawl 90

Posted on June 24, 2025 by Laiq Ahmed Atif

ID-DAWL 90

Id-Dawl 90 Download

Posted in Id-Dawl, Id-Dawl Magazine | Tagged Id-Dawl, Id-Dawl 90, Id-Dawl Magazine, Maltese | Leave a comment

Id-Dawl 89

Posted on June 24, 2025 by Laiq Ahmed Atif

Id-Dawl 89

Id-Dawl 89 Download

Posted in Ahmadiyya Malta, Id-Dawl, Id-Dawl Magazine | Tagged Id-Dawl, Id-Dawl 89, Id-Dawl Magazine | Leave a comment

Winning the War over Addiction through Faith in Almighty God

Posted on June 24, 2025 by Laiq Ahmed Atif

Posted in Ahmadiyya Malta, Interviews, TV interviews | Tagged Addiction, Ahmadiyya Malta, F Living Show, F Living TV, Imam Atif, Imam Malta, Malta, Maltese | Leave a comment

Essential Elements of a Successful Marriage

Posted on June 24, 2025 by Laiq Ahmed Atif

Posted in Ahmadiyya Malta, Interviews, TV interviews | Tagged Ahmadiyya Malta, Malta, Maltese, Radju Malta, successful marriage, TVM | Leave a comment

Balancing Compassion and Safety: Addressing Begging and Public Security

Posted on June 22, 2025 by Laiq Ahmed Atif

Photo: Khanchit Khirisutchalual/iStockphoto

Il-bilanċ bejn il-mogħdrija u s-sigurtà: il-kwistjoni tat-tlib u s-sigurtà pubblika

It-Torċa, 22.06.2025 | IMAM Laiq Ahmed Atif — amjmalta@gmail.com

Ftit jiem ilu, tnax-il persuna u aktar tard erba’ persuni oħra ġew arrestati u mressqa l-qorti fuq ir-rapporti dwarhom li kienu involuti fi tlib aggressiv u li kienu qed jorqdu fi rkejjen improvvizzati jew f’xi postijiet wara l-kontejners.

Naħseb li din hija sitwazzjoni kumplessa ħafna, u għandha tiġi indirizzata b’mod tajjeb, b’kompassjoni u ħniena, kif qalet mara waħda meta tressqet il-qorti, “Mhux għall-pjaċir li norqod barra. M’għandkom l-ebda idea minn xiex irrid ngħaddi kull lejl.”

Stejjer ta’ wġigħ ta’ nies bla dar

Huwa ta’ wġigħ kbir li tisma’ l-istejjer ta’ nies bla dar, bla xogħol u foqra fis-soċjetajiet tagħna. Dan jiġbed l-attenzjoni tagħna biex inkunu aktar ġenerużi, b’qalb tajba u ta’ għajnuna għal dawk fil-bżonn. Iżda biex tinżamm il-paċi tas-soċjetà u sabiex in-nies jimxu fil-paċi u s-sigurtà fit-toroq mingħajr ebda biża’, sa ċertu punt, huwa inevitabbli għall-awtoritajiet biex jindirizzaw il-kwistjoni tat-tallaba.

Meta tressqu dawn il-persuni fil-qorti, dan qanqal dibattitu li nies vulnerabbli għandhom bżonn l-appoġġ, mhux l-akkużi. Mingħajr ma nidħol fil-mertu tal-każ, nixtieq nikteb kelmtejn dwar dan is-suġġett b’mod bilanċjat u mimli b’kompassjoni, mingħajr ma niġġudika.

Il-benesseri tal-umanità

Nemmen li l-iskop ta’ kull reliġjon, stat u gvern huwa li jipprovdi serħan lin-nies u jtejbilhom ħajjithom f’kull qasam tal-ħajja, kemm jekk ekonomikament, finanzjarjament, soċjalment, moralment u spiritwalment.

Bl-istess mod, l-Iżlam jippromwovi wkoll il-benesseri tal-umanità. L-Iżlam huwa reliġjon li għandha għeruq fondi fil-kompassjoni, il-ġustizzja u r-responsabbiltà soċjali. Jagħmel enfasi qawwija fuq il-benesseri kollettiv tas-soċjetà, u jiżgura li l-bżonnijiet bażiċi tal-individwi kollha—bħall-ikel, il-ħwejjeġ, il-kenn u d-dinjità—jiġu sodisfatti.

Id-dmirijiet soċjali tagħna

L-Iżlam jemmen f’soċjetà bħal din fejn ir-riżorsi huma mqassma b’mod ġust, u ħadd ma jitħalla jbati fil-faqar jew fl-umiljazzjoni. F’qafas bħal dan, it-tlib ma jitqiesx bħala prattika ideali jew imħeġġa, iżda pjuttost sintomu soċjali li għandu jiġi indirizzat mill-għeruq permezz ta’ sistemi ta’ appoġġ effettivi u responsabbiltà komunitarja.

Il-Koran Imqaddes jiggwidana lejn ir-responsabbiltajiet tagħna lejn ħutna fis-soċjetajiet b’mod bilanċjat u matur ħafna u jgħallem il-benesseri ta’ kull sezzjoni tas-soċjetà tagħna li ngħixu fiha; u li rridu nkunu ġenerużi ma’ dawn in-nies; u dejjem nuru ħniena magħhom. Dawn huma l-linji gwida li ġejna mgħallma f’dak li għandu x’jaqsam mat-tbatijiet ekonomiċi.

Mhux sew li wieħed ikollu jittallab

Madankollu, fl-istess ħin l-Iżlam ifakkar li meta wieħed jittallab żgur li mhuwiex it-triq ’il quddiem. Il-Qaddis Profeta Muhammad, is-sliem għalih, skoraġġixxa t-tlib b’kull mod, iżda fl-istess ħin poġġa l-enfasi fuq l-għajnuna lil dawk in-nies li huma fil-bżonn. Is-servizz lejn l-umanità hija parti integrali mid-dmirijiet tagħna lejn ħutna.

Il-Koran Imqaddes f’għadd ta’ versi jitkellem dwar l-obbligu tagħna li nieħdu ħsieb ta’ persuni fil-bżonn u l-foqra. Il-foqra għandhom sehem mill-ġid tal-għonja. Għalhekk, meta nonfqu għall-persuni fil-bżonn, niftakru li għandna nkunu nafu li m’aħniex qed nagħmlu favur lilhom iżda dan huwa d-dritt tagħhom, u obbligu fuqna li ngħinu lill-persuni fil-bżonn.

Dan jispjega l-kunċett sħiħ ta’ soċjetà li temmen fl-għajnuna soċjali. L-istat għandu d-dmir li jgħin lil dawk fil-bżonn. Madankollu, xi kultant in-nies isibu ruħhom f’sitwazzjoni fejn ma jkunux jistgħu jissodisfaw il-bżonnijiet tagħhom u jirrikorru għall-karità.

Dak li jagħti hu aħjar minn dak li jirċievi

L-Iżlam jippromwovi x-xogħol u l-qligħ tal-għajxien permezz ta’ mezzi legali. Sieħeb tal-Qaddis Profeta Muħammad, is-sliem għalih, jirrakkonta li sema’ lill-Profeta Muħammad waqt li kien fuq pjattaforma jitkellem dwar il-karità, l-għajnuna lil dawk fil-bżonn, li wieħed m’għandux joqgħod jittallab għall-flus u ħwejjeġ oħra, “Dak li jagħti hu aħjar minn dak li jirċievi.” L-id ta’ fuq hi dik ta’ dak li jagħti u l-id ta’ taħt hija dik tat-tallab; jiġifieri aħjar tagħti milli tirċievi. L-id ta’ fuq hija aħjar minn dik ta’ taħt, ta’ fuq tagħti u tonfoq u ta’ taħt tittallab u tirċievi.

Id-dinjità tax-xogħol

It-tlib żgur li mhux inkoraġġit; l-Iżlam jiskoraġġixxi t-tlib fit-tul u jippromwovi l-indipendenza u d-dinjità. Il-Qaddis Profeta Muħammad kien qal: huwa ferm aħjar għal xi ħadd fostkom li jieħu ħabel u jaqta’ l-injam mill-foresta u jġorru fuq dahru u jbigħu bħala mezz kif jaqla’ l-għajxien tiegħu, u jiekol minn dan id-dħul u jagħti karità minnu, milli jittallab lin-nies li jistgħu jagħtuh jew le.

Dan jerġa’ jenfasizza li tridu tagħmlu dak kollu li tistgħu biex tippruvaw taqilgħu l-għajxien tagħkom b’idejkom stess, aktar milli tirrikorru għat-tlib fit-toroq.

L-Iżlam jipprovdi approċ komprensiv għall-benesseri tal-bniedem li jsostni d-dinjità, jinkoraġġixxi x-xogħol, u jenfasizza r-responsabbiltà fuq is-soċjetà. Filwaqt li t-tlib huwa skoraġġut, ir-rispons lejh m’għandux ikun il-kundanna iżda l-appoġġ strutturat. Għandu jkollna soċjetà li verament tieħu ħsieb tħabrek, mhux biss biex ittaffi l-faqar, iżda biex tipprevenih għalkollox, filwaqt li tiżgura li kull individwu jgħix fis-sigurtà u l-unur.

Dawn in-nies għandhom bżonn l-għajnuna tagħna bħala nazzjon. Ejjew ngħinuhom iqumu fuq saqajhom stess u, kif issuġġeriet il-Pulizija, noħolqu ‘care plan’ għalihom flimkien ma’ organizzazzjonijiet mhux governattivi. Ikun tassew pass pożittiv ’il quddiem jekk ngħinuhom isibu kenn u impjieg, filwaqt li jinżammu l-paċi u s-sigurtà fit-toroq.

Posted in Ahmadiyya, Ahmadiyya Malta, Article | Tagged Ahmadiyya Malta, Article, Begging, Islam, It-Torċa, Laiq Ahmed Atif, Malta, Maltese, Quran | Leave a comment

Id-Dawl 88

Posted on June 22, 2025 by Laiq Ahmed Atif

ID-DAWL 88

Id-Dawl 88 Download

Posted in Ahmadiyya Malta, Id-Dawl, Id-Dawl Magazine | Tagged Ahmadiyya Malta, Humbleness, Humility, Id-Dawl, Id-Dawl 88, Id-Dawl Magazine, Islam, Laiq Ahmed Atif, Malta, Maltese, Quran | Leave a comment

Overcoming addiction through faith and positive action

Posted on June 15, 2025 by Laiq Ahmed Atif

Negħlbu d-dipendenza fuq id-droga permezz tal-fidi u l-għemejjel tajba

It-Torċa, 15.06.2025 | Imam Laiq Ahmed Atif — http://www.ahmadiyya.mt

It-tajjeb għandu saħħa li jneħħi l-ħażen. Alla jgħid fil-Koran Imqaddes li: “Għid it-talb fiż-żewġt itruf tan-nhar, u fil-bidu tal-lejl. L-għemejjel tajba tabilħaqq ibiegħdu lil dawk ħżiena. Żgur li t-tajjeb ineħħi l-ħażin. Din hija tifkira għal dawk li jiftakru f’Alla.” (11:115)

Dan il-vers juri biċ-ċar li jekk il-bniedem għandu xi nuqqasijiet iżda jibqa’ jagħmel l-għemejjel tajba, allura żgur se jiġi l-mument meta jirbaħ it-tajjeb fuq il-ħażin.

Jistgħu ċ-ċirasa u l-frawli jikbru fuq l-arbuxelli?

It-tjubija qiegħda hemm biex tirnexxi u biex tirbaħ. Fuq in-naħa l-oħra, il-ħażen naturalment għandu jiġi megħlub; il-ħażen dejjem jitlef għax il-ħażen qatt ma jista’ jirbaħ fuq it-tajjeb. Iżda l-kundizzjoni hi li persuna għandha tippersisti fit-tjubija u twettaq għemejjel tajba b’sinċerità u lealtà sħiħa.

Huwa ċert li meta l-għemejjel tajba jsiru b’sinċerità u konsistenza sħiħa, dawn żgur jegħlbu l-ħażen. Is-suċċess tal-bniedem jinsab f’li ma jiġix megħlub mill-ħażen, iżda f’li jegħleb il-ħażen u jirnexxi fil-qasam tat-tjubija.

Tabilħaqq, it-tmiem tal-ħażen huwa dejjem il-ħażen; u l-ħażen qatt ma jista’ jkun sinjal ta’ suċċess. Jekk mhux illum, allura għada, il-ħażen naturalment jitlef u t-tjubija dejjem tagħti frott pożittiv. Qatt ra xi ħadd tuffieħ ħelu u bnin jikber fuq arbuxelli? Xi ħadd qatt ra ċ-ċirasa u l-frawli jikbru fuq l-arbuxelli?

Frott delizzjuż, tajjeb, u fragranti jikber biss fuq siġar tajbin u produttivi. Il-larinġ jikber biss fuq is-siġar tal-larinġ. It-tuffieħ jikber biss fuq is-siġar tat-tuffieħ u l-ħawħ jikber biss fuq is-siġar tal-ħawħ.

Il-ħażen ma jwellidx it-tjubija

Din is-sistema tan-natura għallmitna li l-ħażen ma jwellidx it-tjubija, iżda pjuttost iwelled id-dnub u t-telf, u t-tjubija twelled is-suċċess u l-grazzja.

Bl-istess mod, l-użu ħażin tad-drogi qatt mhu garanzija ta’ ferħ, kuntentizza, suċċess u saħħa. Xi drabi l-bniedem jaħseb li jekk ibigħ id-drogi se jsir għani u se jgħix ħajja kuntenta, prospera u dinjituża. Xi drabi l-bniedem jaħseb li l-użu tad-drogi se jkun mezz ta’ faraġ veru, konsolazzjoni u evitar tat-tbatija u d-diffikultajiet tal-ħajja.

Fiż-żewġ każijiet, id-drogi huma destinati li jaqgħu u jintilfu. Bl-istess mod, bħalma arbuxell ma jistax jagħti ħawħ ħelu, id-drogi ma jistgħux jagħtu frott ta’ prosperità u lanqas ta’ paċi u serħan il-moħħ.

Nedukaw lil uliedna minn tfulithom

Għalhekk, irridu nifhmu din ir-realtà b’mod tajjeb ħafna u ngħallmu u nedukaw lil uliedna minn tfulithom li dejjem irridu nsegwu l-mezzi t-tajba biex naqilgħu l-għajxien tagħna, u nimxu fit-triq tas-sewwa biex insibu l-paċi u l-faraġ veru f’ħajjitna.

Madankollu, jekk xi ħadd jaqa’ vittma tal-użu illeċitu tad-drogi jew tas-suq iswed tal-bejgħ tad-drogi, allura għandu jipprova jagħti lilu nnifsu t-tieni ċans u jitgħallem mill-vers tal-Koran Imqaddes li, “żgur li t-tajjeb ineħħi l-ħażen”, u jipprova li jiżdied fit-tjieba sabiex jirbaħ fuq dan il-vizzju.

Xi prattiki sinifikanti li jistgħu jgħinu lill-individwi jegħlbu l-vizzju

Nixtieq nenfasizza xi prattiki sinifikanti li jistgħu jgħinu lill-individwi jegħlbu l-vizzju ta’ ħsara tad-dipendenza fuq id-droga. Wieħed mill-aktar passi importanti lejn ir-riforma u t-trasformazzjoni huwa l-iżvilupp ta’ relazzjoni mill-qrib mal-Mulej u t-tfittxija tas-saħħa u l-gwida Mingħandu.

Il-vers imsemmi fil-bidu jħeġġiġna nfittxu l-għajnuna Divina permezz ta’ talb regolari u t-tifkira ta’ Alla. Permezz ta’ dawn l-atti, wieħed jista’ jikseb l-imħabba u l-appoġġ tal-Omnipotenti. Kif jgħid il-Koran Imqaddes:

“Dawk li jemmnu, u qlubhom isibu serħan fit-tifkira ta’ Alla. Tabilħaqq li fit-tfakkir ta’ Alla jsibu s-serħan tagħhom il-qlub.” (Il-Koran, 13:29) Dan huwa elaborat aktar billi, “it-tifkira ta’ Alla tassew hija l-akbar virtù.” (29:46)

L-involviment f’attivitajiet pożittivi

Flimkien mal-konnessjoni spiritwali, l-involviment f’attivitajiet pożittivi jista’ jkun mod tajjeb ħafna biex neliminaw id-drawwiet distruttivi. Il-volontarjat, li tqatta’ ħin ta’ kwalità mal-familja—speċjalment mat-tfal u l-ġenituri—il-qari, l-eżerċizzju regolari, il-mixi, u li tħares u taħseb dwar in-natura huma kollha alternattivi kostruttivi u pożittivi li jappoġġjaw il-benesseri emozzjonali u mentali; u jfasslu t-triq lejn it-titjib personali ’l bogħod mill-vizzji.

Ix-xogħol fil-ġnien mal-ħamrija huwa attività oħra fundamentali u trasformattiva. Il-konnessjoni mal-art tista’ toffri esperjenza kalma, kważi terapewtika li tgħin biex tqawwi l-attenzjoni u l-enerġija lejn attivitajiet li jaffermaw il-ħajja.

L-għażla bir-reqqa tal-ħbieb

Bl-istess mod kruċjali hija l-għażla bir-reqqa tal-ħbieb. Il-kumpanija għandha rwol ewlieni fil-vjaġġ ta’ persuna lejn l-irkupru. Jingħad b’mod ġust, “A man is known by the company he keeps.” Il-Koran Imqaddes jiġbed l-attenzjoni għal dan ukoll u jgħid: “Intom li temmnu! Kunu konxji tad-dmir tagħkom lejn Alla u żommu kumpanija mal-ġusti u mal-verità.” (9:119)

Il-Qaddis Profeta Muħammad, is-sliem għalih, enfasizza dan il-punt b’mod sabiħ meta qal: “L-eżempju ta’ ħabib ġenwin u ħabib ħażin huwa bħal dak ta’ bejjiegħ tal-fwieħa u dak li jonfoħ l-imniefaħ tal-ħaddied. Il-bejjiegħ tal-fwieħa jista’ jagħtik ftit fwieħa, inti tista’ tixtri wkoll, jew għall-inqas tgawdi fwieħa pjaċevoli. Min-naħa l-oħra l-ħaddied, jista’ jaħraqlek ħwejġek, jew inti tkun espost għal riħa li ddejqek.”

Bħala konklużjoni, il-fidi, il-konnessjoni spiritwali ma’ Alla, l-azzjoni pożittiva, l-għemejjel tajba, u ambjent ta’ appoġġ huma pilastri ewlenin fil-vjaġġ mill-vizzju għal ħajja bilanċjata u sinifikanti.

Posted in Ahmadiyya Malta, Ahmadiyya: The True Islam, Article | Tagged Addiction, Ahmadiyya Malta, Article, Drogi, Drugs, good deeds, il-vizzju, Imam Atif, Imam Malta, Islam, It-Torċa, Malta, Maltese, Quran, vizzju | Leave a comment

The growing threat to global peace

Posted on June 15, 2025 by Laiq Ahmed Atif

Tikber it-theddida għall-paċi globali

Il-Mument 15.06.2025 | Imam Laiq Ahmed Atif — amjmalta@gmail.com

Qed ngħixu fi żminijiet prekarji u perikolużi ħafna. Id-dinja qed tintilef dejjem aktar f’kunflitt, firda, u diżordni, li qed jheddu l-paċi u s-sigurtà globali.

Kull jum iġib miegħu aħbarijiet ġodda li huma ta’ diqa kbira u jkissru l-qalb—storji ta’ gwerra, kriżijiet umanitarji, inġustizzji bla preċedent, u inugwaljanza dejjem tikber. L-aħħar eskalazzjoni tal-Iżrael fuq l-Iran hi biss l-aktar eżempju reċenti ta’ kemm saret fraġli d-dinja tagħna.

Maqbudin bejn żewġ estremi

Jidher li ninsabu maqbudin bejn żewġ estremi. Min-naħa waħda, qed naraw avvanzi bla preċedent fis-saħħa militari, bin-nazzjonijiet jaħżnu armi qawwija kapaċi għal qerda massiva.

Min-naħa l-oħra, naraw faqar mifrux, ġuħ, mard, u privazzjoni—miljuni qed jitħabtu biss biex jgħixu u li qed jittalbu għal biċċa ħobż u qatra ilma safi. Filwaqt li xi nazzjonijiet jkollhom ġid u influwenza kbira, oħrajn jibqgħu marġinalizzati, minsija, u bla vuċi.

Dan l-iżbilanċ qawwi bejn il-privileġġ u l-faqar, il-poter u l-vulnerabbiltà, jinsab fil-qalba tal-instabbiltà globali. Hekk kif il-pajjiżi jikkompetu għad-dominanza, ifittxu li jagħmlu pressjoni fuq oħrajn biex jissottomettu ruħhom, id-dinja ssir inqas sigura u aktar frammentata u mifruda. Din it-tfittxija għas-superjorità kompliet biss tkabbar l-għadwa u esponiet l-umanità għal theddid akbar.

L-inġustizzja, l-inugwaljanza u l-arroganza

Il-paċi ma tistax tiffjorixxi f’dinja fejn jipprevalu l-inġustizzja, l-inugwaljanza u l-arroganza. It-tfittxija aggressiva għall-qawwa, flimkien ma’ nuqqas ta’ rispett għall-benesseri ta’ ħaddieħor, toħloq ostakli allarmanti għar-rikonċiljazzjoni u l-armonija.

Fid-dawl ta’ din ir-realtà inkwetanti, irridu nerġgħu nikkunsidraw id-direzzjoni tal-affarijiet globali. Minflok ma nuru s-saħħa permezz tal-armi u d-dominanza, irridu nadottaw approċċ aktar uman u rikonċiljatorju, wieħed bażat fuq l-empatija, ir-rispett, u l-fehim reċiproku. Wasal iż-żmien li nibdlu l-attenzjoni u d-direzzjoni tagħna milli noħolqu għedewwa għal li nagħmlu ħbieb.

Li tagħmel ħabib veru huwa ħafna aktar ta’ sfida milli tagħmel għadu. Jeħtieġ fiduċja, kompassjoni, u sinċerità. Madankollu huwa preċiżament dan l-isforz—dan l-impenn għal konnessjoni ġenwina—li għandu ċ-ċavetta għal paċi dejjiema. Irridu nibdew niżirgħu ż-żerriegħa tal-ħbiberija, il-fratellanza, u l-kooperazzjoni, aktar milli dawk tal-kunflitt, id-diviżjoni, u l-mibegħda.

Nixtiequ għall-oħrajn dak li nixtiequ għalina nfusna

Prinċipju eċċellenti mgħallem mill-Qaddis Profeta Muħammad, is-sliem għalih, joffri pedament qawwi għall-paċi, huwa qal: “Ixtiequ għall-oħrajn dak li tixtiequ għalikom infuskom.”

Dan it-tagħlim sempliċi iżda profond ifakkarna li l-ebda bniedem ma jixtieq gwerra, ostilità, għadwa, jew vjolenza għalih innifsu, u għalhekk, m’għandniex nixtiequha fuq ħaddieħor. Huwa permezz ta’ dan il-prinċipju ta’ umanità li nistgħu nibdew nittrasformaw id-dinja tagħna.

Hemm diskors ieħor tiegħu li tigwidana f’dan ir-rigward. Huwa qal li, kun ġust, u tkun l-aħjar fost dawk li jqimu; kun kuntent b’li għandek, u b’hekk tkun l-aħjar fost dawk li jiżżu ħajr. Ara li tixtieq għal ħaddieħor dak li tixtieq għalik innifsek u b’hekk tkun tassew temmen. Ġib ruħek tajjeb ma’ ġarek, u b’hekk tkun tassew bniedem. Naqqas id-daħk, għaliex ħafna daħk joqtol lill-qalb.

Kemm hu prinċipju sabiħ li nixtiequ għal ħutna dak li nixtiequ għalina nfusna. X’nixtiequ għalina? Bla dubju ta’ xejn kull bniedem jixtieq li jkollu ħajja dinjituża, mimlija ferħ, paċi u sliem; u li jkollu l-bżonnijiet neċessarji kollha biex jgħix ħajja tajba. Allura, għaliex ma nixtiqux l-istess lil ħutna?

Ejjew nibdlu l-firda bl-għaqda, u l-mibegħda bil-ħbiberija

Għalhekk, irridu naħdmu b’mod attiv biex nibdlu d-diviżjoni bl-għaqda, l-ostilità bid-djalogu, is-suspett bil-fiduċja, u l-mibegħda bil-ħbiberija. Punt tat-tluq huwa t-trawwim ta’ relazzjonijiet sinċieri u ta’ ħbiberija partikolarment mal-ġirien tagħna, u ġeneralment ma’ kulħadd.

Ejjew ngħixu bil-motto: “Imħabba għal kulħadd, mibegħda għal ħadd.”

Din hi t-triq għall-paċi u l-prosperità. Għalhekk, ejjew nikbru fil-ħbiberija bejnietna, u qatt ma nħallu l-ostilitajiet jikbru bejnietna, iżda pjuttost, inneħħu l-ostilitajiet u l-mibegħda bejnietna darba għal dejjem.

Posted in Ahmadiyya, Ahmadiyya Malta, Article | Tagged Ahmadiyya, Ahmadiyya Malta, Friends, friendship, Global Peace, Il-Mument, Il-Paċi, Il-Ħbieberija, Islam, Israel-Iran war, It-theddida għall-paċi globali, Justice, L-Għaqda, L-Iran, L-Iżrael, l-mibegħda, Like for others what you like for yourself, Love for all - Hatred for none, Malta, Maltese, Peace, Quran, Threat, threat to global peace | Leave a comment

Our children are dying slowly — of hunger and disease

Posted on June 11, 2025 by Laiq Ahmed Atif

Uliedna qed imutu bil-mod il-mod bil-ġuħ u bil-mard

In-Nazzjon, 11.06.2025 | Imam Laiq Ahmed Atif – amjmalta@gmail.com

Kont bil-ġuħ u ma tajtnix ikel

Meta naraw it-tbatija indeskrivibbli f’Gaża u l-Palestina—fejn il-ġuħ, il-mard, id-disperazzjoni, in-nuqqas ta’ tama, u l-uġigħ jipprevalu, u d-dinja tibqa’ indifferenti—dan ifakkarni f’diskors li jmisslek qalbek tal-Qaddis Profeta Muħammad, is-sliem għalih. Huwa qal li f’Jum il-Ġudizzju Alla se jikkonfrontakom u jgħidilkom li:

“Kont marid u inti ma staqsejtx dwar saħħti.” Il-bniedem se jgħid: “O Alla Inti s-Sid tad-dinja kollha, u qatt ma timrad, u ma kellekx bżonn tal-għajnuna tagħna.” Alla se jgħid: “Le, wieħed mill-qaddejja Tiegħi kien marid u kellek tistaqsi dwar saħħtu u kont issibni hemm.”

Imbagħad, wara dan se jkompli jafferma u se jgħid: “Kelli l-ġuħ u ma tajtnix ikel, kelli l-għatx u ma tajtnix ilma, ma kellix libsa u ma libbistnix.” U kull darba l-bniedem se jgħid: “O Alla Inti s-Sid tad-dinja kollha, għandek kollox, u ma kellekx bżonn tal-għajnuna tagħna.” Alla se jgħid: “Wieħed mill-qaddejja Tiegħi kellu bżonn ta’ dak kollu.” U kull darba se jgħid: “Li kieku inti għamilt dan kollu, kont issibni hemm.”

Ftit biss qed jisimgħu s-sejħiet

Bla dubju ta’ xejn, qed naraw din is-sitwazzjoni quddiem għajnejna, kull ġimgħa, kuljum, anke kull mument f’Gaża u l-Palestina, fejn mhux wieħed, tnejn, tlieta, jew xi wħud qaddejja ta’ Alla, iżda eluf kbar ta’ nies, inkluż tfal, nisa, anzjani, u morda qed jitolbu ikel, ilma, mediċina, ħwejjeġ, kenn, u affarijiet oħra, anke l-aktar bżonnijiet bażiċi tal-ħajja. Qed jitolbu, imma ftit biss qed jisimgħu.

Ejjew nimmaġinaw is-sentimenti li aħna—it-tmien biljun ruħ kollha fuq din il-pjaneta—nistgħu nesperjenzaw meta Alla jindirizzana f’Jum il-Ġudizzju. X’tweġiba se nagħtu meta ma nistgħux niċħdu li rajna l-orrur iseħħ quddiem għajnejna stess? Konna xhieda. Ma nistgħux nistqarru li aħna injoranti.

Kif se nħossuna? X’se tkun ir-risposta tagħna?

Ejjew ma nkunux fost dawk li jiffaċċjaw l-umiljazzjoni u l-korla ta’ Alla f’dak il-jum. Illum huwa ż-żmien li nuru xi nsarrfu. Illum huwa l-jum li nqumu fuq in-naħa t-tajba tal-istorja—mhux biss bil-kliem, iżda bl-azzjoni, bil-fatti u l-kuraġġ morali.

Kont imħasseb ħafna bl-intervista reċenti tal-Ambaxxatriċi Iżraeljana għar-Renju Unit, Tzipi Hotovely, fil-konverżazzjoni tagħha ma’ Piers Morgan. Hija ċaħdet bla dubju l-qtil indisputabbli tat-tfal f’Gaża u l-Palestina. Hija stqarret b’negazzjoni tar-realtà, “Aħna qatt ma nattakkaw in-nies ċivili; Iżrael mhux qed joqtol tfal,” u kompliet tiddeskrivi l-gwerra bħala ġustifikata, billi ddikjarat, “Qed niġġieldu l-aktar gwerra ġustifikata fid-dinja kontra grupp terroristiku.”

Krimini tal-gwerra

Huma n-nies li ma jarawx il-qtil tat-tfal, waqt li d-dinja kollha qed tixhed—u hekk kif il-mexxejja dinjija madwar id-dinja tkellmu kontra dak li qed jiġri. Fosthom hemm Ehud Olmert, eks Prim Ministru ta’ Iżrael, li kkritika pubblikament l-aggressjoni militari ta’ Iżrael f’Gaża, u ddeskrivieha bħala “qrib ħafna ta’ krimini tal-gwerra.”

Bl-istess mod, il-Kanċillier Ġermaniż Friedrich Merz esprima t-tħassib tiegħu, fejn stqarr li “m’għadux jifhem” l-objettivi ta’ Iżrael f’Gaża. Huwa qal, “X’qed tagħmel l-armata Iżraeljana issa fil-Medda ta’ Gaza, żgur ma nifhimx aktar b’liema għan.”

Xi veritajiet jistgħu jidhru biss mill-għajn tal-qalb

Il-mexxejja Iżraeljani ma jistgħux jaraw—għax mhux kollox huwa viżibbli għall-għajnejn, speċjalment meta l-verità hija morra u ta’ wġigħ, u meta tħawwad il-kuxjenza tagħhom fis-skiet tal-lejl. Barra minn hekk, xi veritajiet jistgħu jidhru biss mill-għajn tal-qalb—qalb li hija ratba u ġentili, li tħabbat għat-titjib tal-umanità, u li mhix ikkunsmata minn motivi ulterjuri, aġendi personali, jew interessi personali.

Ftit jiem ilu biss, id-dinja ġiet imwissija mill-kap umanitarju tan-Nazzjonijiet Uniti, Tom Fletcher, li 14,000 tarbija jistgħu jmutu bil-ġuħ f’Gaża fi żmien jumejn. Bl-istess mod, smajna t-talba ddisprata ta’ missier f’Gaża, li kien qed ifittex l-ikel, li qal: “Uliedna qed imutu bil-mod il-mod.”

Nemmen li l-imblukkar tal-għajnuna umanitarja u ċ-ċaħda tal-bżonnijiet bażiċi tal-ħajja huwa assolutament inaċċettabbli. Ħalli dan ma jaqax fuq widnejn torox: f’Jum il-Ġudizzju, Alla se jgħid, “Kont bil-ġuħ, u ma tajtunix ikel; kont bil-għatx, u ma tajtunix ilma; kont marid, u ma ħadtux ħsiebi.”

Kunu umli fl-ispirtu

Il-Fundatur tal-Komunità Ahmadiyya Musulmana jispjega dan iktar u jgħid li: “Kunu ġenerużi u qalbkom tajba mal-umanità kollha. Kunu umli fl-ispirtu, kunu ġenerużi u ġentili, u aħfru, uru simpatija lejn kulħadd u awguraw lil kulħadd, ħalli tkunu aċċettati.

Hemm ħafna li jippretendu li huma qalbhom tajba, ġentili u li jaħfru lil għajrhom, iżda minn ġewwa huma lpup; hemm ħafna li minn barra jidhru safja, imma f’qalbhom huma sriep. Ma tistgħux tiġu aċċettati fil-preżenza tal-Mulej jekk m’intomx safja, kemm minn ġewwa kif ukoll minn barra.”

Mument ta’ riflessjoni

Nixtieq nagħlaq bil-kliem tad-deheb tiegħu, li jista’ jservi bħala prinċipju gwida għalina lkoll—speċjalment fil-kuntest tal-gwerra f’Gaża. Huwa qal li,

“Oqogħdu attenti mit-toroq tal-qirda... Kull għodwa għandha tkun xhieda għalikom li qattajtu l-lejl fit-tjubija u kull għaxija għandha tkun xhieda għalikom li qattajtu l-jum bil-biża’ ta’ Alla f’qalbkom.”

Ejjew nirriflettu fuq il-jiem u l-iljieli tagħna—huma xhieda tal-ġustizzja, il-mogħdrija u s-servizz tagħna lejn l-umanità, jew jibqgħu mmarkati bil-ġenoċidji, il-krimini tal-gwerra, il-qtil, u t-tixrid tad-demm?

Posted in Ahmadiyya, Ahmadiyya Malta, Article | Tagged a moment of reflection, Ahmadiyya Malta, art, “Our children are dying slowly”, Books, Children, Disease, Food, Gaza, Gaza war, Gaża, hunger, il-Palestina, Imam Atif, Imam Malta, Islam, Krimini tal-gwerra, Laiq Ahmed Atif, Malta, Mument ta’ riflessjoni, Palestine, parenting, photography, Quran, Tfal, Umli, war crime, Ġuħ | Leave a comment

Eid-Ul-Adha 2025 Celebration

Posted on June 8, 2025 by Laiq Ahmed Atif

The Ahmadiyya Muslim Jamaat Malta celebrated Eid-Ul-Adha with the residents of Dar il-Liedna on Sunday, 8 June 2025, sharing the occasion with traditional cuisine. Dar il-Liedna is an Open Centre located in Fgura that offers accommodation to unaccompanied minors and is managed by the Agency for the Welfare of Asylum Seekers (AWAS).

Eid-Ul-Azha, also known as the Festival of Sacrifice, is one of the most significant holidays in the Islamic calendar. The day is marked by prayer, reflection, and acts of generosity, especially towards those in need. Sharing this special occasion with the residents of Dar il-Liedna made the celebration even more meaningful, fostering unity, compassion, and community spirit.

Posted in Ahmadiyya Malta | Tagged Dar il-Liedna, Eid-Al-Adha, Eid-Ul-Adha, Fgura | Leave a comment

A thriving, sensitive and considerate economy

Posted on June 8, 2025 by Laiq Ahmed Atif

EKONOMIJA LI TIFFJORIXXI, SENSITTIVA U KKUNSIDRATA

It-Torċa, 08.06.2025 | Imam Laiq Ahmed Atif – http://www.ahmadiyya.mt

Ir-reliġjon tgħallimna li l-bnedmin huma l-ifjen kreazzjonijiet ta’ Alla, mogħnija b’għan ogħla. Skont din il-perspettiva, il-kreaturi u r-riżorsi l-oħra kollha nħolqu biex jappoġġjaw lill-umanità fit-twettiq tal-objettivi nobbli tagħha. Għalhekk, kull sistema u riżorsa pprovduta minn Alla li Jista’ Kollox hija maħsuba biex jinħoloq ambjent fejn il-bnedmin jistgħu jirnexxu, jikbru fit-tjieba, u jaqdu lil xulxin b’kompassjoni u sinċerità.

L-ekonomija għandha rwol sinifikanti fil-ħajja tal-bniedem, u huwa għalhekk li ta’ spiss nisimgħu l-frażi: “L-ekonomija għandha taqdi lin-nies, u mhux bil-maqlub.”

Dan jirrifletti l-idea li l-ekonomija hija mezz biex tippromwovi d-dinjità u l-benesseri tal-bniedem—mhux forza li għandha tiġi servuta għad-detriment tad-drittijiet, il-benesseri, jew il-valuri morali tan-nies.

Ekonomija bbażata fuq l-individwu

Filosofija ekonomika ċċentrata fuq il-bniedem bħal din tqarreb lejn il-prinċipji ekonomiċi Iżlamiċi, li jenfasizzaw il-ġustizzja soċjali, id-distribuzzjoni ugwali tal-ġid, il-kompassjoni, il-benevolenza, u li nagħtu l-prijorità lill-benesseri tas-soċjetà fuq sempliċi profitt jew tkabbir ekonomiku.

Meta nħarsu lejn ix-xenarju ekonomiku globali attwali, nosservaw sfidi kbar f’dinja li qed tevolvi b’rata mgħaġġla. Pereżempju, l-impożizzjoni ta’ tariffi mill-amministrazzjoni tal-President Donald Trump—imfissra minnu bħala “rivoluzzjoni ekonomika”—ikkontribwiet għall-instabbiltà fl-ordni ekonomiku globali, u għamlitu inqas reżiljenti. Dan juri wkoll il-fraġilità tas-sistemi ekonomiċi attwali u jżid it-tħassib dwar gwerra emerġenti fil-kummerċ, kif jiġi diskuss fi ċrieki politiċi influwenti madwar id-dinja.

B’kuntrast, rajna wkoll lill-President Trump jappoġġja pubblikament il-kumpanija tal-karozzi elettriċi ta’ Elon Musk, Tesla, avveniment irrappurtat b’mod wiesa’ mill-midja internazzjonali. Dawn l-avvenimenti kuntrastanti juru l-kumplessitajiet u l-inkonsistenzi fil-prattiki ekonomiċi kontemporanji.

Mill-perspettiva Iżlamika, imġiba ekonomika bħal din tikkuntrasta bil-qawwa mal-ideali ta’ sistema ekonomika Iżlamika. L-Iżlam isostni li għandu jappoġġja lill-foqra, jevita piżijiet inġusti, jippromwovi l-paċi, ir-rikonċiljazzjoni, u t-tkabbir ekonomiku ġust. Huwa favur distribuzzjoni ġusta tal-ġid u r-riżorsi madwar l-umanità kollha.

Bħas-sistema soċjali rrakkomandata mill-Iżlam, is-sistema ekonomika Iżlamika tibda bl-iskop li dak kollu li hemm fis-smewwiet u fl-art inħoloq minn Alla, li ta lill-bniedem diversi provvedimenti taħt fiduċja. Bħala depożitarji, in-nies huma responsabbli għal kif jimmaniġġjaw u jqassmu dawn ir-riżorsi.

Il-ġid kemm ħafna kif ukoll ftit huwa test

Il-ġid, kemm jekk ikun abbundanti kif ukoll jekk ikun ftit, fl-Iżlam jitqies bħala test—opportunità biex wieħed jiddistingwi lil dawk li huma konxji tar-responsabbiltajiet tagħhom u juru kompassjoni lejn ħaddieħor minn dawk li huma indifferenti għat-tbatija umana u l-benesseri tas-soċjetà.

L-għan tas-sistema ekonomika Iżlamika huwa li tiżgura l-aktar distribuzzjoni wiesgħa u ta’ benefiċċju tal-ġid fis-soċjetà. Il-ġid għandu jiċċirkola kontinwament fost is-segmenti kollha tal-komunità u m’għandux jikkonċentra f’idejn il-ftit. Kif jgħid il-Koran: “… sabiex ma jiċċirkolax biss fost l-għonja fostkom.” (59:7)

Il-ġenerazzjoni tal-ġid mhijiex mertu tal-individwi

Il-ġenerazzjoni tal-ġid mhijiex biss ir-riżultat ta’ talent individwali jew investiment kapitali. Għalhekk, l-ebda individwu jew grupp m’għandu jkollu kontroll esklussiv fuqu.

Is-sorsi oriġinali kollha tal-ġid—bħax-xemx, il-qamar, il-kwiekeb, l-art, is-sħab li jġibu x-xita, ir-riħ li jċaqlaq is-sħab u jferrex il-polline, u l-fenomeni naturali l-oħra kollha—huma rigali divini mingħand Alla, mogħtija lill-umanità kollha, għall-ġid tal-bnedmin kollha.

Il-ġid jiġi prodott permezz tal-applikazzjoni tal-isforz u l-ħila tal-bniedem għar-riżorsi naturali pprovduti minn Alla għas-sostenn u l-kumdità tal-bniedem. Filwaqt li l-Iżlam jirrikonoxxi li wieħed jista’ jkollu dritt ta’ possessjoni, jagħmel dan fi ħdan qafas ta’ responsabbiltà u obbligu ta’ rendikont soċjali, filwaqt li jiżgura li dawn id-drittijiet ma jmorrux kontra l-ġid pubbliku wiesa’.

Iċ-ċħid tal-esplojtazzjoni u t-tiġmigħ

Waħda mill-karatteristiċi distintivi u tajbin tas-sistema ekonomika Iżlamika hija ċ-ċaħda tagħha ta’ kull forma ta’ esplojtazzjoni u prattiki inġusti, bħat-tiġmigħ tal-ġid, il-kapital, jew komoditajiet essenzjali. Dawn il-prattiki spiss iwasslu għal inflazzjoni tal-prezzijiet u instabbiltà ekonomika wiesgħa. Il-Koran Imqaddes iwissi kontra mġiba bħal din: “U dawk li jġemmgħu d-deheb u l-fidda u jonfquhom mhux kif jixtieq Alla—agħtuhom l-aħbar ta’ kastig aħrax.” (9:34–35)

Fl-istess ħin, l-Iżlam jagħti lill-individwi l-libertà li jaqilgħu l-ġid permezz ta’ kwalunkwe mezz legali, sakemm jibqgħu fil-limiti tal-prinċipji etiċi u legali. L-individwi għandhom id-dritt li jippossjedu proprjetà u jinvolvu ruħhom f’intrapriża privata.

Enfasi dwar id-dħul kif ukoll l-infiq tal-ġid

Madankollu, għall-kuntrarju ta’ ħafna sistemi ekonomiċi moderni li primarjament jiffokaw fuq kif jiġi ġġenerat id-dħul, l-ekonomija Iżlamika tpoġġi wkoll enfasi qawwija fuq kif jintefaq il-ġid. F’ħafna stati, it-tħassib tal-politika nazzjonali huwa fil-biċċa l-kbira limitat għas-sorsi tad-dħul; kif l-individwi jużaw id-dħul tagħhom—kemm jekk miksub kif ukoll jekk maħżun—ħafna drabi jitħalla mhux regolat. Hawnhekk fejn ir-reliġjon għandha rwol kritiku.

L-Iżlam mhux biss jipprovdi gwida morali u spiritwali dwar kif għandu jinkiseb id-dħul iżda joffri wkoll direzzjonijiet ċari dwar kif għandu u m’għandux jintefaq.

L-Iżlam jipprojbixxi l-infiq u t-tberbiq bl-addoċċ. Li wieħed jadotta stil ta’ ħajja sempliċi, l-infiq modest fuq ċerimonji taż-żwieġ, il-prattika tal-moderazzjoni fl-ikel, u l-issodisfar ta’ bżonnijiet bażiċi oħra b’attenzjoni huma kollha prattiki tajbin li jikkontribwixxu għal ekonomija li tiffjorixxi, sensittiva, u kkunsidrata.

Posted in Ahmadiyya, Ahmadiyya Malta, Ahmadiyya: The True Islam, Article, www.Ahmadiyya.mt | Tagged Caring economy, economy, Ekonomija, exploitation, hoarding, il-ġid, Islam and Economy, it-tiġmigħ, L-ekonomija għandha taqdi lin-nies, l-esplojtazzjoni, u mhux bil-maqlub. | Leave a comment

Eid-Al-Adha 2025 Mubarak

Posted on June 5, 2025 by Laiq Ahmed Atif

Photo: RantauVector | Shutterstock

— Eid-Al-Adha Mubarak! —

— The Ahmadiyya Muslim Community Malta wishes you a joyful and blessed Eid-Al-Adha 2025 Mubarak.

— May this blessed day bring peace, joy, and countless blessings to you and your loved ones. Wishing you a joyful and meaningful Eid!

Posted in Ahmadiyya Malta | Tagged Ahmadiyya, Ahmadiyya Malta, Eid, Eid Mubarak, Eid-Al-Adha, Eid-Al-Adha 2025, Eid-Al-Adha Mubarak, Hajj, House of God, Islam, Malta, Mecca, Muslim, Quran | Leave a comment

Help both the oppressor and the oppressed

Posted on June 1, 2025 by Laiq Ahmed Atif

Għinu lill-oppressi kif ukoll lill-oppressur

It-Torċa, 01.06.2025 | IMAM Laiq Ahmed Atif – amjmalta@gmail.com

Is-sitwazzjoni tal-gwerra, jew aħjar ngħidu l-ħruxijiet Iżraeliti f’Gaża, il-Palestina, qabżu l-limiti kollha u laħqu punt fejn l-ebda ġustifikazzjoni mhi possibbli. Fi kliem ieħor, enough is enough. Għalhekk, irridu mmorru lil hinn minn sempliċi kundanna u protesta vokali — id-dinja trid tieħu azzjoni deċiżiva biex twaqqaf dan il-barbariżmu, illum qabel għada. Huwa importanti anzi sar kruċjali li dan il-barbariżmu għandu jieqaf darba għal dejjem.

Il-Qaddis Profeta Muħammad, is-sliem għalih, għallimna l-prinċipju prezzjuż li verament jgħodd ħafna għal din is-sitwazzjoni. Huwa għallimna li għandna ngħollu leħinna kontra inġustizzji bħal dawn u ngħinu kemm lill-oppressi kif ukoll lill-oppressur. Huwa qal li, għinu kemm lil dawk li qed ibatu kif ukoll lil dawk li qed joħolqu t-tbatija.

L-Imsieħba tal-Profeta Muħammad staqsew li, waqt li jifhmu li tista’ tingħata għajnuna lil dawk li huma mweġġgħin, kif jistgħu jgħinu bniedem li jkollu qalbu ħadra? Setgħu jgħinu biex isalvaw lill-oppressi minn idejn l-oppressuri, kif setgħu jgħinu lill-oppressuri?

Il-Profeta Muħammad wieġeb billi qal li l-għajnuna lill-oppressuri kienet tfisser li twaqqfuhom milli jwettqu l-inġustizzji tagħhom, billi żżommulhom idejhom milli jikkommettu aktar krudeltà għaliex, jekk jimxu ’l quddiem fil-krudeltajiet, il-ħruxijiet u l-inġustizzji tagħhom, isiru soġġetti għad-diżapprovazzjoni ta’ Alla li Jista’ Kollox u l-kastig Tiegħu, u b’hekk jeqirdu ħajjithom f’din id-dinja u fil-ħajja ta’ wara. Għalhekk, f’ġieħ il-ħniena, ippruvaw salvawhom.

Dan il-prinċipju jgħodd għall-iżgħar ħjut tas-soċjetà sal-livell internazzjonali. Għalhekk, fil-kuntest tal-ħruxijiet Iżraeljani f’Gaża, huwa minnu li d-dinja għandha żżomm idejhom mill-krudeltajiet, il-brutalitajiet, id-diżumanità, u l-qtil orribbli ta’ nies ċivili innoċenti inklużi tfal u nisa.

Nero fiddled while Rome burned

Meta naraw l-inġustizzji u l-għemejjel ħżiena madwarna huwa obbligu tagħna li nirranġawhom bl-aħjar mod possibbli. Li sempliċement nibqgħu siekta u passivi mhijiex għażla għal xi ħadd li verament jemmen f’Alla u jieħu ħsieb il-ħolqien Tiegħu.

Ma nistgħux sempliċement nibqgħu maqbudin bħal “Nero fiddled while Rome burned.” Minflok, irridu nqumu għall-okkażjoni, sabiex l-aggressuri jkunu mġiegħla jtemmu r-reati tagħhom kontra l-umanità.

Għalhekk, kull wieħed u waħda minna għandu rwol x’jaqdi bi kwalunkwe mod li jista’, fil-limiti tiegħu. Il-Profeta Muħammad kompla jiggwidana f’dan billi qal: “Kull min fostkom jilmaħ il-ħażen, ħalluh ibiddlu, ineħħih, b’idu. Jekk ma jirnexxilux, mela juża lsienu u jgħolli leħnu. Jekk ma jirnexxilux, mela juża qalbu u jħoss diqa ġo qalbu, u dak huwa l-aktar livell baxx tal-fidi.”

Hawnhekk, ħa nagħmilha ċara li dan ma jfissirx li l-individwi għandhom jieħdu l-liġi f’idejhom u jikkontribwixxu għal aktar kaos fid-dinja. Pjuttost, hija r-responsabbiltà tal-gvernijiet li jadottaw dan il-prinċipju bħala qafas ta’ gwida biex jiġġieldu l-aggressjoni u l-invażjoni Iżraeljana. Mill-ġdid nagħmilha ċara li dan il-punt mhux kontra xi pajjiż jew ieħor, iżda, kontra l-inġustizzji u l-ħruxijiet.

Is-sebħ tal-paċi u d-dawl tal-prosperità

Jekk id-dinja tħaddan dan il-prinċipju, in-nies tal-Palestina u ta’ Gaża se jaraw is-sebħ tal-paċi u d-dawl tal-prosperità jidħlu fi djarhom.

Dawn il-prinċipji mhux biss huma favur il-Palestina u Gaża — huma jservu wkoll lil Iżrael b’mod aktar profond: għax meta jsostnu l-umanità, Alla, min-naħa tiegħu, jipproteġihom.

Għalhekk, nappella biex ngħożżu l-umanità, minflok neqirduha. Ejjew inħobbu lil xulxin, minflok li nobogħdu lil xulxin. Ejjew naqsmu l-barkiet u r-riżorsi tad-dinja ma’ kulħadd, minflok ma jinħatfu u jinżammu minn grupp partikolari ta’ nies.

Ir-regħba ġġib il-mibegħda

Huwa fatt stabbilit li r-regħba ġġiegħel il-mibegħda tikber. Kultant timmanifesta ruħha f’espansjoni territorjali jew fil-ħtif ta’ riżorsi naturali jew ċertament fl-impożizzjoni tas-superjorità ta’ xi wħud fuq oħrajn. Din twassal għall-krudeltà.

Għalhekk, Iżrael, minflok ix-xewqa li jkollu l-art kollha Palestinjana taħt idejh, għandu jħalli lill-Palestinjani jgħixu u jgawdu r-riżorsi tagħhom. Għax għall-paċi u l-istabbiltà fir-reġjun hemm prinċipju bażiku li dwaru aħna tgħallimna biex ma nixxennqux għall-ġid tal-oħrajn. Il-Koran Imqaddes jgħid: “Ara li ma tmiddx għajnejk (bir-regħba) fuq dak (il-ġid materjali) li tajna lil xi wħud minnhom.” (20:132)

Tħallix il-paċi tiġi kompromessa

Ir-regħba u l-għira għall-ġid tal-Palestina huma l-kawża ta’ aktar inkwiet fir-reġjun, u Iżrael għandu juri trażżin u ma jħallix li l-paċi tar-reġjun kollu tiġi kompromessa. Din l-attitudni kattiva u bla ħanina, anzi bla qalb, twassal għal regħba ma taqta’ xejn u fit-tkissir tal-paċi soċjali.

Din ir-regħba Iżraeljana qerdet il-paċi ta’ miljuni ta’ nies u art twelidhom. Dan hu ppruvat bl-istorja u kull bniedem sensibbli jista’ jifhem li x-xenqa għall-ġid tal-oħrajn tkattar l-għira u r-regħba u hija s-sors ta’ telfien.

Għandhom jitgħallmu mill-passat

Nappella bl-akbar sinċerità lill-mexxejja Iżraeljani biex jitgħallmu mill-passat tagħhom u jirriflettu kemm hi ta’ wġigħ il-vjolenza. Kif ħassewhom meta brutalitajiet bħal dawn seħħew kontrihom fil-passat. Dan huwa tassew tal-biża’ li, minflok ma tgħallmu lezzjoni mill-esperjenzi tal-passat tagħhom u mxew it-triq għall-paċi u ta’ qalb tajba, imħabba, kompassjoni, empatija, u bnew karattru nazzjonali mhux vjolenti, marru ferm lil hinn minn hekk u qed jikkaġunaw uġigħ u tbatija lin-nies ta’ Gaża u l-Palestina.

Jaħasra! Meta se jintefa l-għatx tagħhom għad-demm uman?

Posted in Ahmadiyya, Ahmadiyya Malta, Ahmadiyya: The True Islam, Article, www.Ahmadiyya.mt | Tagged Ahmadiyya Malta, Gaza, Gwerra, Help both the oppressor and the oppressed, il-Palestina, Imam, Imam Atif, Imam Laiq Ahmed Atif, Islam, Israel, Malta, Muslim, Nero fiddled while Rome burned, Palestine, Quran, War | Leave a comment

Morality a Cornerstone of Human Civilisation

Posted on May 28, 2025 by Laiq Ahmed Atif

Il-Moralità: Il-pedament taċ-ċiviltà umana

In-Nazzjon, 28.05.2025 | Imam Laiq Ahmed Atif Malta – amjmalta@gmail.com

Darba xi ħadd staqsa lill-Qaddis Profeta Muħammad dwar it-tieba u d-dnub u hu wieġeb: “It-tieba hija karattru tajjeb; il-virtù hija morali tajba, u d-dnub huwa dak li jdur f’qalbek, u li tobgħod, li n-nies ikunu jafu bih.”

Huwa qal ukoll li, “L-aqwa fostkom huma dawk li għandhom l-aqwa manjieri, morali u karattru.” “Xejn ma jiżen iktar fil-miżien tal-fidil f’Jum il-Ġudizzju minn karattru tajjeb. Tabilħaqq, Alla ma jħobbx lil dawk li jużaw lingwaġġ ħażin u diskors vulgari.”

Il-fidil veru u l-moralità

Dan il-kliem juri biċ-ċar kemm huma importanti l-morali u l-virtujiet fil-ħajja tal-fidil veru. Naħseb, il-valuri u l-virtujiet huma l-bażi u l-pedament tal-fidil veru. Il-bniedem ma jistax ikun fidil tajjeb jekk jonqos mill-valuri morali u l-virtujiet.

Għax il-fidil jipprova li jkun bħall-maħbub tiegħu li huwa Alla l-Ħanin, allura, meta Alla għandu l-aqwa attributi kif jista’ jkun li dak li jemmen fih u jissejjaħ fidil veru ma jkollux il-karattru tajjeb.

Meta naqraw dwar l-istorja umana nsibu li l-bniedem ta’ kull żmien kien imħasseb dwar il-moralità u l-kunċett tal-moralità kien il-pedament taċ-ċivilizzazzjoni umana, li jirregola l-imġiba, ir-relazzjonijiet u s-sens ta’ ġustizzja tagħna.

Minn fejn ġejja il-moralità?

Dan juri kemm hija importanti l-moralità, iżda, il-punt hu jekk il-moralità hijiex riżultat ta’ gwida divina jew sempliċement idea soċjali umana jew il-bnedmin imġarrba permezz tal-esperjenzi tagħhom.

Mingħajr l-iċken dubju, nemmen li l-bniedem ma jistax jitgħallem kollox miż-żmien u l-esperjenzi tiegħu jekk ma jkunx hemm il-gwida divina. Ir-raġuni hija li l-fehim u l-esperjenzi tal-bnedmin huma limitati u anke jiddependu fuq iċ-ċirkostanzi ta’ dak iż-żmien meta xi ħadd jesperjenza xi ħaġa partikolari. Iżda, il-fehim u l-għarfien divin huma mingħajr limiti, u ħielsa mir-restrizzjonijiet tal-ħin, u ħielsa mill-jasar taż-żmien.

Mill-perspettiva Iżlamika, il-moralità ġejja mit-tagħlim divin, Alla huwa għalliem tal-moralità u jgħallem lill-bnedmin permezz tal-profeti u t-tagħlim tiegħu. Il-moralità hija msejsa fuq ir-rivelazzjoni divina, u toffri qafas etern għall-kondotta etika li tittraxxendi l-bidliet kulturali u storiċi.

Il-limitazzjonijiet tal-għerf u l-intellett uman

Huwa importanti li wieħed jiftakar li l-għerf u l-intellett uman mhumiex perfetti, iżda huma fil-fatt limitati. Għalhekk, waqt il-formazzjoni tal-ideat, jew it-tħassib dwar il-morali u l-virtujiet, ċirkostanzi ta’ madwar u fatturi oħra jistgħu jtappnu biex naslu għall-konklużjoni perfetta fir-rigward il-valuri morali.

Madankollu, kif diġà semmejt, l-għerf ta’ Alla u l-liġi ta’ Alla huma perfetti u għalhekk jistgħu jiggwidawna bl-aħjar mod possibbli. Dan għaliex Alla jixtieq biss it-tajjeb u t-titjib tal-ħolqien Tiegħu u, għalhekk, it-tagħlim Tiegħu hu bbażat kompletament fuq il-ġustizzja u t-tieba.

Xi punti għal riflessjoni

Meta ngħixu fis-soċjetà huwa importanti li dejjem inkunu responsabbli u nuru l-imġiba tajba ma’ kulħadd u dejjem nibqgħu konxji lejn dmirijietna lejn kulħadd fis-soċjetà. Nixtieq insemmi xi punti jew valuri li għandna nżommu f’moħħna.

L-ewwel u qabel kollox għandna nittrattaw lill-oħrajn kif nixtiequ li niġu trattati aħna stess. Aħna kollha kemm aħna nixtiequ li niġu trattati bl-imħabba, bir-rispett u d-dinjità.

Allura huwa importanti li minflok nistennew trattament tajjeb mingħand ħaddieħor, għandna nkunu l-ewwel li nuru valuri morali għoljin lejn ħaddieħor.

Għax jekk nixtiequ nibnu soċjetajiet b’valuri morali u virtujiet, għandna naħdmu għalihom fi spirtu ta’ mħabba, kompassjoni u fratellanza.

L-imġiba tajba

Barra minn hekk, għandna nibqgħu umli, diċenti, ġusti, grati u kuntenti b’dak li għandna; inġibu ruħna tajjeb mal-ġirien, il-ħbieb, il-kollegi tal-iskola u tax-xogħol tagħna.

Huwa wkoll valur mill-isbaħ li ngħidu tislim ta’ paċi—is-sliem għalikom—lil kulħadd li niltaqgħu magħhom matul il-ġurnata. L-imġiba tal-gratitudni lejn il-Mulej u n-nies hija wkoll valur li jista’ jibni soċjetajiet paċifiċi u armonjużi.

Il-kompassjoni u l-ħniena lejn il-ġenituri, ir-rispett lejn l-għalliema u n-nies li huma ikbar minna, ir-relazzjonijiet tajbin mal-ġirien tagħna, u d-dħulija mad-dgħajfin huma wkoll valuri ferm importanti.

Kunu umli fl-ispirtu, u qalbkom tajba mal-umanità

Nixtieq nagħlaq bi kliem il-Fundatur tal-Komunità Ahmadiyya Musulmana li jispjega dan b’mod tajjeb u jgħid li:

“Kunu ġenerużi u qalbkom tajba mal-umanità, il-għaliex aħna kollha ħolqien Tiegħu; tkażbru lil ħadd la bi lsienkom, la b’idejkom, u lanqas b’modi oħra. Dejjem ħabirku għall-ġid tal-umanità.

Qatt taġixxu b’arroganza mal-oħrajn, saħansitra ma’ dawk li jkunu taħt ir-responsabbiltà tagħkom. Qatt tużaw lingwaġġ dispreġjattiv ma’ ħadd, anki ma’ min jgħajjarkom.

Kunu umli fl-ispirtu, kunu ġenerużi u ġentili, u aħfru, uru simpatija lejn kulħadd u awguraw lil kulħadd, ħalli tkunu aċċettati.”

Posted in Ahmadiyya, Ahmadiyya Malta, Ahmadiyya: The True Islam, Article | Tagged Ahmadiyya Malta, Article, faith, Good behaviour, goodness, heart, Il-fidi, Il-Moralità, Imam Atif, Imam Malta, In-Nazzjon, Islam, Kind heart, l-imġiba tajba, Laiq Ahmed Atif, Malta, Moral, morality, Muslim, Qalb, Quran, Quranic, Religion, social, society | Leave a comment

The Ahmadiyya Muslim Community congratulated Pope Leo XIV and the Catholic Church

Posted on May 26, 2025 by Laiq Ahmed Atif

Image courtesy of Ahmadiyya Muslim Jamaat Italy

Il-Komunità Ahmadiyya Musulmana tifraħ lill-Papa Ljun XIV u lill-Knisja Kattolika

Il-Leħen, 25.05.2025 | Imam Laiq Ahmed Atif – amjmalta@gmail.com

Il-Komunità Ahmadiyya Musulmana Malta testendi l-awguri mill-qalb tagħha lill-Knisja Kattolika u lill-membri tagħha f’Malta u madwar id-dinja għall-elezzjoni tal-Papa Ljun XIV.

Il-mewt tal-Papa Franġisku kien mument ta’ niket kbir għall-Kattoliċi madwar id-dinja. Issa bl-elezzjoni tal-Papa Ljun XIV, il-Kattoliċi huma ferħanin ħafna u jħarsu ’l quddiem b’tama mġedda taħt il-gwida tal-mexxej spiritwali l-ġdid tagħhom—il-Papa Ljun XIV.

Nittamaw u nitolbu li l-Papa Ljun XIV, bħall-predeċessur tiegħu l-Papa Franġisku, jista’ juża l-għerf, l-għarfien, il-kompassjoni u l-influwenza tiegħu biex jippromwovi l-paċi, l-għaqda u l-armonija fost in-nies kollha madwar id-dinja u bejn ir-reliġjonijiet kollha. Nittamaw li jkompli jrawwem il-kollaborazzjoni fost ir-reliġjonijiet kollha—partikolarment fost il-fidi Abrahamika—ibbażata fuq il-valuri kondiviżi tal-imħabba għal Alla u s-servizz lill-umanità.

Il-ħtieġa għall-għaqda globali

Il-Komunità Ahmadiyya Musulmana tenfasizza l-ħtieġa urġenti għall-għaqda globali, ir-rikonċiljazzjoni, u l-paċi, u tappella għal koperazzjoni akbar fost il-komunitajiet reliġjużi biex jaħdmu flimkien għall-benesseri u l-prosperità tal-umanità kollha, u biex jindirizzaw l-isfidi morali u spiritwali tad-dinja moderna.

Hija l-ħtieġa ta’ dan iż-żmien li naffermaw mill-ġdid l-impenji tagħna għall-paċi, u li niżirgħu ż-żerriegħa tal-għaqda u l-fratellanza, sabiex id-dinja ssir kenn ta’ paċi u sigurtà.

Il-Komunità Ahmadiyya Musulmana Malta tafferma mill-ġdid l-impenn tagħha għad-djalogu, il-bini tal-paċi, u l-valuri kondiviżi għat-titjib tal-benesseri tan-nies kollha. Barra minn hekk, testendi id ta’ ħbiberija u koperazzjoni lejn ħidma flimkien għall-ġid tal-umanità kollha.

L-awguri mill-Mexxej tal-Komunità Ahmadiyya Musulmana

Il-Kap Dinji tal-Komunità Ahmadiyya Musulmana, il-Qdusija Tiegħu Ħażrat Mirża Masroor Aħmad, feraħ lill-membri tal-Knisja Kattolika għall-elezzjoni tal-Papa Ljun XIV, f’isem il-Komunità Ahmadiyya Musulmana internazzjonali. Il-Qdusija Tiegħu qal:

“F’isem il-Komunità Ahmadiyya Musulmana, nifraħ sinċerament lill-membri tal-Knisja Kattolika għall-elezzjoni tal-Papa Ljun XIV.

Qed ngħaddu minn perjodu kritiku u perikoluż ħafna fl-istorja tal-bniedem, hekk kif gwerer qalila u kunflitti vjolenti qed itebbgħu l-art bid-demm ta’ għadd kbir ta’ erwieħ innoċenti u bla difiża kuljum.

Hekk kif ninsabu fuq ix-xifer tat-Tielet Gwerra Dinjija, nitlob li Alla li Jista’ Kollox jagħti lill-Papa l-abbiltà li jkun vuċi għall-paċi u l-armonija vera fid-dinja u li jiddefendi d-drittijiet tal-persuni innoċenti kollha, irrispettivament mill-kasta, it-twemmin jew il-kulur tagħhom. Ammen.

Bħala l-Kap dinji tal-Komunità Ahmadiyya Musulmana, nafferma li aħna dejjem lesti li nappoġġjaw u nieħdu sehem f’kull sforz u azzjoni magħmula sabiex jiġu stabbiliti l-paċi u s-sigurtà vera fid-dinja u sabiex l-umanità terġa’ lura lejn il-Ħallieq tagħha.”

Il-Papa Ljun XIV

Hawnhekk nixtieq insemmi wkoll il-messaġġ inkoraġġanti tal-Papa Ljun fl-ewwel diskors tiegħu u mbagħad fl-ewwel Quddiesa tiegħu. Il-messaġġ tiegħu ‘biex nibnu pontijiet’ huwa inkoraġġanti ħafna. Huwa beda d-diskors tiegħu bit-tislima “il-paċi tkun magħkom,” u ħeġġeġ lin-nies biex “jibnu pontijiet permezz tad-djalogu, permezz tal-laqgħat, biex jingħaqdu flimkien bħala poplu wieħed, dejjem fil-paċi.” Huwa appella wkoll għad-dawl tal-iljieli mudlama ta’ din id-dinja.

Il-Papa Ljun jitkellem bil-mod ħafna, għandu qalb tajba u għandu esperjenza ta’ ħidma kemm f’żoni żviluppati kif ukoll f’żoni sottożviluppati. Huwa jgawdi reputazzjoni pożittiva ħafna bħala bennej ta’ pontijiet u jitqies bħala moderat fil-Kurja. Il-gazzetta Taljana La Repubblica tqisu bħala “l-inqas Amerikan fost l-Amerikani” minħabba l-manjieri ġentili tiegħu.

Ejjew ningħaqdu lkoll biex naħdmu flimkien biex nagħmlu d-dinja post aħjar għalina u għall-ġenerazzjonijiet futuri tagħna. Jalla Alla jbierek lilna lkoll. Ammen.

Posted in Ahmadiyya, Ahmadiyya Malta, Ahmadiyya: The True Islam, Article | Tagged Ahmadiyya Malta, Catholic, Church, Il-Papa Ljun XIV, Islam, Malta, Papa Ljun XIV, Pope Leo XIV, Quran | Leave a comment

Every Rose has its Thorn

Posted on May 25, 2025 by Laiq Ahmed Atif

KULL WARDA FIHA X-XEWK!

It-Torċa, 25.05.2025| Imam Laiq Ahmed Atif – amjmalta@gmail.com

Id-dinja moderna li ngħixu fiha hija mimlija vantaġġi u żvantaġġi, sfidi u opportunitajiet, ferħ u niket, kumdità u inkwiet, u ħafna aktar.

Bla dubju ta’ xejn id-dinja tal-lum għamlet ħafna avvanz fit-teknoloġija u l-mezzi tal-komunikazzjoni li verament huma tajbin għall-progress u l-kumditajiet tal-bniedem. Madankollu, “Kull warda fiha x-xewk tagħha.”

It-tifsira ewlenija ta’ dan il-proverbju hija li s-sbuħija u t-tjubija spiss jiġu bi sfidi jew diffikultajiet. Dan iwassal messaġġ qawwi u sabiħ dwar in-natura doppja tas-sbuħija u l-avversità. Hekk kif il-ward, bis-sbuħija kollha tiegħu, huwa akkumpanjat minn xewk iniggeż, il-ħajja wkoll tippreżenta l-isfidi flimkien mal-barkiet tagħha.

Fil-kuntest tal-avvanz teknoloġiku nistgħu nifhmu li meta hemm vantaġġi u benefiċċji ta’ dawn l-invenzjonijiet moderni, hemm ukoll l-iżvantaġġi tagħhom jekk ma nużawhomx b’mod tajjeb u b’moderazzjoni, jew insiru l-iskjavi tagħhom.

Dak li rrid ngħid huwa dan, li tassew, l-invenzjonijiet teknoloġiċi moderni tejbu lil ħajjitna, iżda ħolqu wkoll problema soċjali kbira ħafna ta’ solitudni u iżolazzjoni. Is-solitudni saret problema tant gravi li l-Organizzazzjoni Dinjija tas-Saħħa (WHO) iddikjaratha bħala “theddida globali urġenti”.

X’inhi s-solitudni?

Is-solitudni vera ma tinstabx biss fl-iżolament, iżda fl-uġigħ kwiet ta’ fehim inviżibbli. Skont Mike Gawliuk, CEO tal-Assoċjazzjoni Kanadiża tas-Saħħa Mentali ta’ Kelowna, “Is-solitudni mhix biss kwistjoni li tkun waħdek. Tista’ tkun imdawwar bin-nies u xorta tħossok waħdek.”

Jiġifieri, is-solitudni ma tfissirx biss li inti waħdek u tħoss in-nuqqas tan-nies madwarek, iżda, dan ifisser ukoll li anke jekk inti mdawwar bin-nies xorta tista’ tħossok waħdek minħabba l-fatt li ħadd ma jagħti kasek, jew tkun injorat, marġinalizzat, jew imħolli waħdek. Fil-fatt, is-solitudni tista’ taffettwa lil kulħadd, irrispettivament miċ-ċirkostanzi esterni.

Hemm ħafna li jqattgħu l-ġurnata tagħhom fil-folol, fost in-nies, fost il-ħbieb u l-kollegi u l-familja, iżda xorta jħossuhom inviżibbli, iżolati u waħedhom, għax xi drabi jħossu li verament ma jappartjenu ma’ xi ħadd. Dan jiddependi fuq l-esperjenza ta’ ħajjitna. Għandna ħbieb, imma ma nistgħux nikkonnettjaw magħhom. Għandna familja, imma nħossu li ma jistgħux jifhmuna.

Għaliex is-solitudni qed issir tant aktar prevalenti llum?

Huwa fatt li l-bniedem huwa annimal soċjali, għalhekk, il-konnessjonijiet soċjali ta’ kwalità għolja huma essenzjali għas-saħħa mentali u fiżika tagħna, u l-benesseri ħolistiku tagħna. Iżda meta dawn il-kuntatti soċjali jsiru limitati jew ma jkunux jistgħu jeżistu, dan iwassal għas-solitudni u li tħossok imwarrab.

Għalhekk, għal snin sħaħ, is-solitudni ilha bil-mod tieħu f’idejha l-ħajjiet ta’ ħafna, b’kull sena li tgħaddi żżid aktar u aktar vittmi taħt idejha.

Skont l-Organizzazzjoni Dinjija tas-Saħħa, is-solitudni u l-iżolament soċjali huma mifruxa, b’madwar 1 minn kull 4 persuni anzjani jesperjenzaw iżolament soċjali u bejn 5 u 15 fil-mija tal-adolexxenti jesperjenzaw solitudni.

Ir-riċerka turi li l-iżolament soċjali u s-solitudni għandhom impatt serju fuq is-saħħa fiżika u mentali, il-kwalità tal-ħajja, u l-għomor twil. L-effett tal-iżolament soċjali u s-solitudni fuq il-mortalità huwa komparabbli ma’ dak ta’ fatturi ta’ riskju oħra stabbiliti sew bħat-tipjip, l-obeżità, u n-nuqqas ta’ attività fiżika.

Għaliex in-nies qed iħossuhom aktar waħedhom?

Jista’ jkun hemm ħafna raġunijiet għas-solitudni minbarra l-impatt tat-teknoloġija kif imsemmi hawn fuq, bħat-telfien ta’ xi ħadd maħbub, nuqqas ta’ konnessjonijiet sinifikanti, jew tħossok li ma tintegrax ma’ dawk ta’ madwarek.

Irridu nammettu li d-diġitalizzazzjoni tad-dinja tagħna għamlet din il-problema ferm akbar meta kollox huwa faċilment disponibbli għalina, hemm ħafna inqas bżonn li noħorġu u nissoċjalizzaw. Nistgħu nordnaw kollox mid-dar bħall-ikel, il-bżonnijiet ta’ kuljum, ħwejjeġ u żraben, u kulma nixtiequ. Anke hemm il-possibbiltà ta’ remote working fejn nistgħu naħdmu mid-dar.

Barra minn hekk, jista’ jkun hemm raġunijiet differenti għal nies ta’ età differenti, pereżempju, ir-raġunijiet tal-anzjani jistgħu jkunu differenti minn taż-żgħażagħ. L-anzjani jħossu s-solitudni minħabba l-fatt li huma jgħixu fid-djar tal-anzjani jew it-tfal tagħhom huma okkupati b’ħajjithom u m’hemm ħadd li jżurhom kuljum. Min-naħa l-oħra, iż-żgħażagħ xi drabi jħossuhom waħedhom minħabba l-peer pressure, il-bullying fl-iskejjel jew fil-postijiet tax-xogħol, eċċ.

Naħseb ilkoll kemm aħna ħassejna s-solitudni f’xi punt ta’ ħajjitna. Is-sentimenti li m’hemm ħadd li jappoġġjana, jgħinna jew jiggwidana; jew li aħna kompletament u totalment waħedna.

Il-katalisti tal-bidla

Nixtieq ngħid li huwa wkoll id-dmir tas-soċjetà li għandna nkunu konsiderevoli, konxji, attenti, nuru mħabba u kompassjoni. Dawk li jħossuhom waħedhom iħossuhom hekk mhux biss minħabba fihom stess, iżda wkoll minħabba li s-soċjetà biddlet il-prijoritajiet tagħha.

Naħseb li abbandunajna jew qed nabbandunaw malajr il-valuri tas-soċjetà, tal-komunità u tal-familja. Iktar ma ngħixu bħala familja, id-dinja taffaċċja inqas problemi ta’ solitudni.

Ejjew inkunu aħna l-aktar konxji tal-bżonnijiet tal-lum, u nkunu l-katalisti tal-bidla; tassew, inkunu l-bidla aħna stess biex nagħmlu l-ħajja ta’ xulxin aħjar, pjaċevoli u dinjituża.

Posted in Ahmadiyya, Ahmadiyya Malta, Ahmadiyya: The True Islam, Article, www.Ahmadiyya.mt | Tagged Every Rose has its Thorn!, Fighting Loneliness, Il-katalisti tal-bidla, Is-Solitudni, isolation, Kull warda fiha x-xewk!, Loneliness, Solitude, X’inhi s-solitudni? | Leave a comment

Euthanasia and the Sanctity and Dignity of Human Life

Posted on May 20, 2025 by Laiq Ahmed Atif

Posted in Ahmadiyya, Ahmadiyya Malta, Interviews, TV interviews | Tagged Ahmadiyya, Ahmadiyya Malta, Euthanasia, Euthanasia and Islam, Euthanasia and suffering, F Living, F Living Show, F Living TV, Id-Dinjità Umana, Imam, Imam Atif, Imam Laiq Ahmed Atif, Islam, l-ewtanasja, Laiq Ahmed Atif, Malta, Qdusija tal-ħajja, Quran, Sanctity of human life | Leave a comment

The World Stands on the Brink of Destruction and the Road to Peace

Posted on May 18, 2025 by Laiq Ahmed Atif

ID-DINJA TINSAB FUQ XIFER IL-QERDA U T-TRIQ LEJN IL-PAĊI!

It-Torċa, 18.05.2025 | Imam Laiq Ahmed Atif – WhatsApp+356 79 655 255

Fl-aħħar jiem, it-tensjoni dejjem tikber bejn iż-żewġ potenzi nukleari tad-dinja, l-Indja u l-Pakistan, kienet tabilħaqq kwistjoni ta’ tħassib għad-dinja kollha. Is-sitwazzjoni kienet tassew inkwetanti. Iż-żewġ pajjiżi, minflok ma mxew lejn it-tnaqqis tat-tensjoni u wrew trażżin, kienu involuti f’azzjonijiet militari.

Xi kliem ta’ gwida

Naħseb li, il-kliem ewlieni li għandu dejjem ikun prinċipju gwida f’sitwazzjonijiet bħal dawn huwa paċenzja, trażżin, għerf, għaqal, dehen, raġunament, rikonċiljazzjoni u paċi.

Jien inkwetat ħafna dwar il-fatt li hemm tant gwerer u kunflitti fid-dinja li qed jikkawżaw it-telf ta’ mijiet ta’ ħajjiet umani innoċenti, ħsara lill-infrastruttura u l-ekonomija nazzjonali, u jdgħajfu l-paċi u l-prosperità tal-umanità.

Atti kontra d-dinjità tal-bniedem

Il-gwerra bejn ir-Russja u l-Ukrajna, l-aggressjoni Iżraeljana f’Gaża, il-kunflitt Sudaniż, biex insemmi biss ftit, huma kollha aspetti inkwetanti għall-umanità kollha, fejn intilfu għadd kbir ta’ ħajjiet innoċenti u jidher li m’hemm l-ebda tmiem għal dan.

X’inhu l-benefiċċju tat-tixrid tad-demm innoċenti ta’ bnedmin sħabhom? Dan mhux kontra d-dinjità tal-bniedem?

Xi tfisser l-umanità?

Bl-Għarbi, persuna tissejjaħ ‘insan’, li jfisser li fin-natura tal-bniedem, hemm żewġ imħabbiet, jiġifieri, l-imħabba ta’ Alla, l-Aktar Grazzjuż, u l-imħabba tal-umanità. Dan in-nom ifisser tnejn, kif ngħidu bil-Malti ‘l-għadd imtenni’ li jfisser li dawn iż-żewġ elementi jew żewġ imħabbiet dejjem jindikaw dawn iż-żewġ attributi fin-natura tal-bniedem.

Fil-qosor dan ifisser li n-natura umana hija mogħnija b’żewġ tipi ta’ mħabbiet. U sakemm dawn iż-żewġ imħabbiet ma jilħqux il-quċċata tagħhom, persuna ma tistax verament tissejjaħ bniedem.

Għatxan għad-demm ta’ bnedmin

L-imħabba għall-Ħallieq hija obbligatorja għall-bniedem minħabba l-barkiet u t-tjubija infiniti Tiegħu fuqna. Li turi gratitudni għall-barkiet, il-grazzji u l-benedizzjonijiet bla għadd tal-Ħallieq huwa att ta’ korteżija. Iżda Alla li Jista’ Kollox poġġieha wkoll fin-natura umana li tħobb lil ħaddieħor.

Alla ħalaq ukoll imħabba għall-ħolqien u l-umanità fil-bniedem sabiex, filwaqt li jista’ jtejjeb il-kundizzjoni spiritwali tiegħu billi jesprimi mħabba għal Alla li Jista’ Kollox, jista’ wkoll itejjeb il-ħajja soċjali tiegħu, il-virtujiet, il-morali u l-valuri tiegħu billi jħobb u jaqdi l-ħolqien ta’ Alla, u l-umanità skont l-abbiltajiet u l-kapaċitajiet tiegħu.

Billi nżommu f’moħħna t-tifsira msemmija hawn fuq li tkun bniedem, kif jista’ wieħed isir għatxan għad-demm ta’ bnedmin oħra? Dak l-istatus huwa ċaħda tal-attributi umani, u dan huwa kontra d-dinjità tal-bniedem.

L-imħabba għall-Ħallieq u l-ħolqien: L-unika triq għall-paċi

Għalhekk, wasal iż-żmien li nuru l-ogħla standards taż-żewġ imħabbiet—l-imħabba ta’ Alla, u l-imħabba tal-umanità. U dik hija l-unika triq li twassal għal paċi sostenibbli u dejjiema fis-soċjetajiet tagħna u tabilħaqq fid-dinja kollha.

Għalhekk, minħabba din ix-xewqa profonda u sinċiera li d-dinja timtela bl-imħabba, bl-għożża, u bil-ħbiberija, u biex tikber l-imħabba ta’ Alla fil-qlub tal-bnedmin ħalli jerġgħu jitgħallmu mill-ġdid it-toroq li jwasslu għall-paċi u jevitaw id-distruzzjoni, il-Komunità Ahmadiyya Musulmana dejjem taħdem bil-ħerqa għall-ġid komuni.

Aħna nemmnu u nispjegaw il-fehma tagħna li hemm mod wieħed biss li jista’ jsalva lid-dinja mill-qerda u l-ħerba li riesqa lejhom, u dan huwa li lkoll kemm aħna rridu nistinkaw biex inxerrdu l-imħabba, l-affezzjoni, u sens ta’ komunità.

Aktar importanti minn hekk, id-dinja għandha bżonn tagħraf il-Ħallieq tagħha, li huwa Alla l-Waħdieni. Huwa dan l-għarfien tal-Ħallieq li jwassalna għall-imħabba u l-mogħdrija lejn il-Ħolqien Tiegħu, u meta dan isir parti mill-karattru tagħna, inkunu wasalna fi stat fejn inkunu nistgħu nirċievu l-imħabba tiegħu, li żgur se twassalna għall-paċi dejjiema u sostenibbli.

Id-dinja tinsab fuq xifer il-qerda

Il-Kap tal-Komunità Ahmadiyya Musulmana, Ħażrat Mirża Masroor Aħmad, ħeġġeġ talb kontinwu għall-paċi globali, partikolarment rigward is-sitwazzjoni tensa bejn ċerti pajjiżi, appoġġja d-diplomazija fuq il-kunflitt, enfasizza t-tbatija tal-innoċenti fil-gwerra, esprima tħassib serju dwar id-dinja li tinsab fuq xifer ta’ kunflitt mifrux.

Huwa enfasizza li, meta sseħħ gwerra, iż-żewġ naħat isofru telf. Barra minn hekk, mhux biss is-suldati, iżda ċ-ċivili u l-vulnerabbli li jinqatlu bla sens. Dan huwa preċiżament dak li naraw fil-gwerer tal-lum; dan qed jiġri kullimkien. Fi kwalunkwe każ, itolbu għall-popli oppressi kollha madwar id-dinja.

Filwaqt li ħeġġeġ għal sforzi kontinwi għall-bini tal-paċi, huwa enfasizza wkoll l-importanza tat-talb u qal: “Komplu itolbu għall-istat ġenerali tad-dinja, kif insemmi b’mod konsistenti. Itolbu speċjalment għas-sitwazzjoni attwali li qed tiddomina bejn il-Pakistan u l-Indja. Jalla Alla li Jista’ Kollox iġib tmiem għall-oppressjoni, jipproteġi lill-magħkusin, u jagħti l-għerf lill-gvernijiet, sabiex minflok ma javvanzaw lejn il-gwerra, isolvu l-kwistjonijiet permezz tal-paċi u r-rikonċiljazzjoni, u jkunu parteċipi fi ftehimiet internazzjonali.”

Waqt li spjega s-sitwazzjoni fraġli tad-dinja, il-Qdusija Tiegħu qal: “Jidher li d-dinja tinsab fuq xifer il-qerda. Jalla Alla li Jista’ Kollox biss isalvaha minn katastrofi. Dan jista’ jiġri biss jekk in-nies jersqu lejn Alla li Jista’ Kollox. Jalla Alla li Jista’ Kollox jagħtihom il-ħila għal dan, u jalla jagħtina wkoll il-ħila għat-talb.” Ammen.

Posted in Ahmadiyya Malta, Ahmadiyya: The True Islam, Article, Peace, www.Ahmadiyya.mt | Tagged Ahmadiyya Malta, Brink of destruction, Harmony, Islam, Love of God, Love of Humanity, Malta, Maltese, Muslim, Peace, Quran, Reconciliation, The road to peace, War, Xi tfisser l-umanità?, xifer il-qerda | Leave a comment

Euthanasia and the Sanctity of Human Life

Posted on May 18, 2025 by Laiq Ahmed Atif

L-Ewtanasja Assistita…

“L-Iżlam ma jaqbilx… għax japprezza l-qdusija tal-ħajja fuq kollox” – Imam Laiq Ahmed Atif, President ta’ Ahmadiyya Muslim Jamaat

It-Torċa, 18.05.2025 | Carmen Cachia

“L-ewwel nett, l-Iżlam ma jaqbilx mal-kunċett tal-ewtanasja. Dan għax l-Iżlam japprezza l-qdusija tal-ħajja fuq kollox. L-Iżam japprezza tassew id-dinjità u l-qdusija tal-ħajja. Barra minn hekk Alla jgħid fil-Koran Imqaddes (10:57) li: Alla jagħti l-ħajja u Alla jagħti l-mewt u għandu nerġgħu lura. Għalhekk, ħadd ma għandu dritt li jieħu l-ħajja ta’ xi ħadd, għal kwalunkwe raġuni.

Iva, nifhmu l-argument tat-tbatija u l-uġigħ tal-bniedem imma hemm ukoll Alla li jagħtina l-aħbar it-tajba. L-ewwel Alla ma jpoġġix piż iktar milli tiflaħ u t-tieni l-Qaddis Profeta Muħammad, is-sliem għalih, kien qal li meta l-bniedem jgħaddi minn xi tbatija, sofferenza u wġigħ, Alla jaħfer id-dnubijiet tiegħu u jippremjah b’mod diferenti biex l-ispirtu, li huwa r-ruħ tal-bniedem, ikun mill-aħjar.

Jekk se nibdew xi ħaġa, allura fejn se nispiċċaw? Dan il-ftuħ tat-tieqa se jikkonverti fl-bieb u mbagħad fl-bieb beraħ. Il-Qaddis Profeta Muħammad, is-sliem għalih, qal li, ‘ebda fdil ma jkun milqut minn xi ħsara u wġigħ ħlief li Alla se jneħħi dnubietu hekk kif il-weraq tas-siġra jaqgħu’. Jiġiferi, l-ebda fidil ma jkun milqut minn xi ħsara matul iż-żminijiet ta’ tbatija peress li huma ppremjati meta jibqgħu sodi u Alla jaħfrilhom dnubiethom.

“Jekk se nibdew xi ħaġa, allura fejn se nispiċċaw? Dan il-ftuħ tat-tieqa se jikkonverti fl-bieb u mbagħad fl-bieb beraħ.” — Imam Laiq Ahmed Atif

Barra minn hekk, jekk ma jkunx hemm tbatija, kif nistgħu nifhmu l-filosofija u l-importanza tal-kuntentizza u l-hena? Jekk ma jkunx hemm dlam, kif nistgħu nifhmu x’inhu d-dawl? Iljieli mudlama, jagħtuna l-fehim tal-jiem imdawlin.

It-tbatija hija importanti għax tgħallimna l-virtujiet u l-valuri bhall-ħniena, il-kompassjoni, l-imħabba u l-mogħdrija lejn ix-xulxin. Għalhekk, minflokk li neħħu l-ħajja, għandna nitgħallmu kif nistgħu nsiru ġentili u ħanina.”

Posted in Article, Interviews | Tagged Malta | Leave a comment

The moral compass in times of spiritual and moral blindness

Posted on May 11, 2025 by Laiq Ahmed Atif

Photo: Shutterestock

Il-kumpass morali fi żminijiet ta’ għama spiritwali u morali

It-Torċa, 11.05.2025 | IMAM Laiq Ahmed Atif – WhatsApp: +35679655255

Fid-dinja tal-lum hemm diversi kwistjonijiet ewlenin li qed tiffaċċja d-dinja inklużi l-perikli tal-materjaliżmu, il-midja soċjali, u l-kilba għall-flus. Huwa minnu li f’din l-era moderna seħħew ħafna l-avvanzi teknoloġiċi, partikolarment fil-qasam tal-komunikazzjoni tal-massa.

Qed ngħixu fi żmien ta’ materjaliżmu u mondanità li dejjem jiżdiedu fejn, minkejja li l-bnedmin huma intelliġenti u minkejja li għandhom għajnejn biex jaraw bihom, ħafna nies qed jgħixu ħajja ta’ għama spiritwali u morali fejn iqisu kull ħaġa li tleqq jew tidher sabiħa bħala magħmula mid-deheb.

Mhux kulma jleqq huwa deheb

Iżda, għandna nifhmu b’mod tajjeb li, mhux kulma jleqq huwa deheb; mhux kulma naraw madwarna huwa tajjeb. Għandna nifhmu wkoll li mhux kulma toffri d-dinja moderna huwa tajjeb fiżikament, moralment, soċjalment u spiritwalment.

Il-bniedem tal-lum għandu ħafna responsabbiltà fuq spallejh biex jieħu kull pass b’mod attent u jiżen kollox b’mod tajjeb qabel jaċċettah.

Huwa fatt li l-lussu kollu li naraw xi kultant jaffaxxina l-persuna, iżda dawk li verament jemmnu f’Alla huma mistennija li jaħsbu jekk dawk l-affarijiet jeħduhomx ’il bogħod mill-Mulej jew iressquhomx lejn il-Mulej!

Għax, għall-fidil veru, il-ħajja ’l bogħod minn Alla hija bħall-ħajja tal-ħut mingħajr l-ilma. Kif il-ħut ma jistax jibqa’ ħaj mingħajr l-ilma, il-fidil veru ma jistax jgħix mingħajr Alla l-Ħanin.

Falliment morali

Sfortunatament, jidher li s-sbuħija materjalistika qed tirbaħ ammont konsiderevoli ta’ qlub in-nies. Id-dinja se tkun imġiegħla tammetti li l-għana tad-dinja ħalla lil ħafna nies spiritwalment bla flus u moralment falluti. Il-mistoqsija hi li, din hija l-ħajja li aħna mistennija li ngħixu mill-Ħallieq tagħna jew jeżisti xi kumpass morali u spiritwali għalina?

Nemmen li huwa l-kuntrarju mill-attributi tal-Mulej li jħalli l-bnedmin tiegħu mingħajr xi skop ta’ ħajjithom, u mingħajr il-gwida morali u spiritwali. Kif jista’ jkun li l-Mulej li ħalaq ħafna barkiet għalina qabel it-twelid tagħna, bħax-xemx, l-ikel, l-ilma, l-ossiġnu, eċċetra, ma jiħux ħsiebna wara t-twelid tagħna fid-dinja?

Mingħajr l-iċken dubju, Alla dejjem ħa ħsieb lill-umanità tiegħu u wrieha t-triq it-tajba u spjegalha l-virtujiet kollha li huma l-qofol tal-bniedem. Għalhekk, huwa d-dover tal-bniedem li dejjem jgħix ħajja mimlija morali u virtujiet; u qatt ma nitilfu l-kumpass morali.

Definizzjoni tal-morali

L-ewwel u qabel kollox huwa importanti li nifhmu x’inhu l-morali. Dawk l-azzjonijiet umani li jirrigwardjaw lill-bnedmin u jagħmlu parti integrali tal-karattru uman jissejħu morali.

Jiġifieri, it-trattament tajjeb u xieraq tagħna tal-bnedmin l-oħra, u l-azzjonijiet li nwettqu bħala parti mit-tradizzjoni soċjali jew kultura jissejħu morali. Persuna li hija konxja fir-rigward ta’ azzjonijiet bħal dawn tissejjaħ persuna moralment tajba.

L-għemejjel tagħna li noffru lill-Mulej jissejħu spiritwali. Għalhekk l-istati morali u spiritwali huma konnessi mill-qrib. L-unika differenza bejn it-tnejn hija li meta l-attivitajiet tagħna huma marbuta mal-bniedem, jissejħu attivitajiet morali; meta huma diretti lejn Alla, isiru spiritwali. Il-bniedem veru huwa dak li dejjem jieħu ħsieb lill-istat morali u spiritwali tiegħu, għax huma marbuta ma’ xulxin.

L-għemejjel huma ġġudikati bl-intenzjonijiet

Għandna nżommu f’moħħna wkoll li l-intenzjonijiet u l-motivi huma ħafna importanti, kif il-Qaddis Profeta Muħammad, is-sliem għalih, qal: “Tassew l-għemejjel huma ġġudikati bl-intenzjonijiet u għal kulħadd huwa premju, skont l-intenzjoni tiegħu.”

Jiġifieri, meta l-azzjonijiet ikunu motivati bl-intenzjonijiet tajba u l-bniedem jagħmel dak kollu minħabba r-raġuni li hekk il-Mulej jixtieq minna, imbagħad biss jistgħu jkunu morali vera. Mingħajr il-motivazzjoni tagħhom, l-azzjonijiet tagħna huma eżerċizzji materjalistiċi. M’hemmx dubju li anke dawn l-eżerċizzji huma ta’ xi użu.

Imma jekk il-bnedmin ma jaspirawx li jkunu tajbin u perfetti, u jekk l-approvazzjoni ta’ Alla mhix l-għan tagħhom, kif se jiksbu t-twettiq li għalih huma maħluqa u li għalih għandhom naturalment jaspiraw? L-azzjoni u l-isforz mentali u spiritwali jiddependu ħafna fuq motivi tajbin.

Tpoġġi l-ikel f’ħalq martek

Il-Qaddis Profeta Muħammad, is-sliem għalih, spjega dan is-suġġett b’mod meraviljuż u qal li, anke ftit ikel li tpoġġi f’ħalq martek bix-xewqa li taqla’ mertu quddiem Alla huwa att virtuż u morali, u se jġib il-premju tiegħu.

Barra minn hekk, jekk l-imħabba bejn il-koppja hija mmexxija mill-emozzjonijiet tagħhom biss, huwa biss att ta’ mħabba, imma jekk ir-relazzjoni tagħhom hija mmexxija taħt il-kmand divin li Alla kkmandahom juru rispett u mħabba lejn xulxin, allura dan l-att isir att virtuż.

Jiġifieri, dak li nagħmlu bl-intenzjonijiet u l-motivi li nirbħu l-pjaċir ta’ Alla, huwa jsir virtù u morali.

Ir-responsabbiltà morali tagħna

Għalhekk, hija r-responsabbiltà tagħna li ngħixu ħajjitna bil-virtujiet u l-morali skont il-gwida divina, u nsiru konxji u ġenerużi man-nies kollha ta’ madwarna. Għandna dejjem nimxu mal-kumpass morali u mhux sempliċement nimxu wara l-emozzjonijiet tagħna bħal ħlejjaq oħra. Għandna noffru xaqq dawl u tama f’dinja li llum inħakmet minn kull tip ta’ tentazzjonijiet moderni, biex ngħixu l-ħajja ta’ kuljum b’mod tajjeb, ġenwin u b’mod uman.

Posted in Ahmadiyya, Ahmadiyya Malta, Ahmadiyya: The True Islam, Article, www.Ahmadiyya.mt | Tagged Ahmadiyya Malta, Definizzjoni tal-morali, ethics, Falliment morali, għama spiritwali u morali, Il-kumpass morali, Islam, It-Torċa, Laiq Ahmed Atif, Malta, Maltese, Mhux kulma jleqq huwa deheb, Moral, Moral Compass, morality, Quran, Spiritual and moral blindness, Torca, Tpoġġi l-ikel f’ħalq martek, virtues | Leave a comment

Paradise lies under the feet of the mothers

Posted on May 10, 2025 by Laiq Ahmed Atif

Il-ġenna tinsab taħt saqajn l-omm

Meta naħseb dwar l-imħabba tal-omm, insib li l-imħabba ta’ omm hija aktar profonda mill-fond tal-oċean, ogħla mill-għoli tas-smewwiet, u aktar ħelwa mill-għasel. L-omm hija persuna u bniedma bla paragun.

In-Nazzjon, 10.05.2025 | IMAM Laiq Ahmed Atif – amjmalta@gmail.com

L-omm hija persuna u bniedma bla paragun. L-omm huwa l-isem ta’ torri tal-kobor, is-sbuħija, ir-rispett u d-dinjità. Il-pożizzjoni ta’ omm hija kbira ħafna u ħafna. M’hemm l-ebda bniedem ieħor bħall-omm, li hija eżempju eċċellenti ta’ mħabba u kompassjoni.

Meta naħseb dwar l-imħabba tal-omm, insib li l-imħabba ta’ omm hija aktar profonda mill-fond tal-oċean, ogħla mill-għoli tas-smewwiet, u aktar ħelwa mill-għasel.

Il-Qaddis Profeta Muħammad, is-sliem għalih, iddeskriva l-persuna tal-omm b’mod meraviljuż u qal li, “Il-ġenna tagħkom tinsab taħt saqajn ommkom.” Jiġifieri li aħna nistgħu niksbu l-ġenna billi naqdu lil ommijietna u nkunu ġentili u ubbidjenti lejhom. Fil-fatt l-omm hija waħda mill-bibien tal-ġenna.

Żomm ma’ saqajn l-omm

Il-Qaddis Profeta Muħammad, is-sliem għalih, wera l-importanza tal-imħabba tal-omm f’diversi okkażjonijiet. Darba xi ħadd ġie għand il-Qaddis Profeta Muħammad biex jitlob il-permess tiegħu biex imur għall-gwerra kontra l-għadu. Il-Profeta staqsieh jekk ommu kinitx ħajja. Huwa wieġeb fil-pożittiv. Il-Profeta qallu biex jibqa’ ma’ ommu u jaqdiha. Ir-raġel reġa’ staqsa u l-Qaddis Profeta tah l-istess parir. Meta staqsa għat-tielet darba, il-Profeta qallu, “Żomm ma’ saqajha għax hemm tinsab il-ġenna.”

Kemm hu sabiħ! Tabilħaqq l-omm hija persuna li tassew jistħoqqilha t-trattament tagħna ta’ qalb tajba, ġentili, ħanina u b’kompassjoni. Meta nisimgħu l-kliem sabiħ bħal li semmejt hawn fuq, wieħed malajr jista’ jikkonkludi li l-omm hija persuna tal-glorja u ta’ pożizzjoni għolja ħafna; u bla dubju ta’ xejn l-ommijiet huma parti importanti u integrali tas-soċjetà li jridu jiġu moqdija u rispettati ħafna u mingħajr limiti.

Il-premju tat-tieba għaxar darbiet aktar

Għax, ir-rispons tat-tjubija għandu jkun tjubija simili, pjuttost aħjar minn hekk, kif jgħid Alla li Jista’ Kollox fil-Koran Imqaddes li, “Min jagħmel għemil tajjeb ikollu premju aħjar minn hekk” (28:85); “Min jagħmel it-tajjeb ikollu għaxar darbiet aktar” (6:161).

Jiġifieri, għemil tajjeb huwa bħal żerriegħa tajba li tipproduċi prodott għaxar darbiet aktar minnu. Għalhekk, għandna biex inkunu bħaż-żerriegħa tajba u nroddu l-imħabba tal-omm għaxar darbiet aktar minnha; jekk dan mhux possibbli minħabba l-limiti tagħna, għall-inqas għandna nroddu l-istess, u nuru mogħdrija ġenwina lejha u nħobbuha minn qiegħ il-qalb.

L-imħabba u l-ġustizzja

Kull sena f’Mejju niċċelebraw “Jum l-Omm”, li jiġi jfakkarna dwar l-importanza u d-dinjità tal-omm. Meta jibda x-xahar ta’ Mejju, naraw xi ċaqliq fl-iskejjel u fil-ħwienet dwar il-bejgħ ta’ rigali għall-omm.

Meta jasal “Jum l-Omm”, ħafna mit-tfal jagħtu rigal lil ommhom biex jasserixxu l-imħabba tagħhom. L-iskejjel ukoll jenfasizzaw fuq l-imħabba għall-omm u jgħallmu l-istudenti biex ipinġu xi ħaġa, jiktbu xi messaġġ u jixtru xi rigal għal ommhom bħala turija tar-rispett lejhom.

Iżda għandna nżommu quddiem għajnejna li “l-imħabba ta’ ġurnata” mhijiex biżżejjed li tista’ tagħmel ġustizzja mal-maestà tal-omm, il-glorja u l-pożizzjoni tagħha. Għalhekk, għandna nuru l-imħabba lejn ommijietna s-sena kollha.

Photo: Inna Kot | Shutterestock

‘Jum l-Omm’ is-sena kollha

Għandna niċċelebraw “Jum l-Omm” is-sena kollha, 365 ġurnata matul is-sena. Kif diġà ktibt li t-tweġiba tat-tjubija għandha tkun xejn ħlief it-tjubija. Meta konna żgħar kif ommijietna kienu jittrattawna? Kienu jiċċelebraw xi ġurnata partikolari għat-turija tal-imħabba tagħhom għalina?

Din mhix mistoqsija tal-ġurnata, iżda, l-omm tħobb lil uliedha kull mument, 365 ġurnata fis-sena, 24 siegħa kuljum, u 60 sekonda f’kull minuta. Allura, jista’ jum ta’ ċelebrazzjoni ta’ Jum l-Omm jagħmel xi ġustizzja lil dik l-imħabba u l-kompassjoni bla kundizzjonijiet?

Meta nħarsu lejn ir-reliġjonijiet u s-soċjetajiet ċivili, nindunaw li kull waħda minnhom tat importanza kbira għar-rispett lejn l-omm. Alla jgħid fil-Koran Imqaddes:

“L-amar tagħna lill-bniedem huwa li juri tjubija mal-ġenituri tiegħu (għaliex jeħtieġlu jiftakar li) ommu ġġorru (f’ġufha) bi dgħufija fuq dgħufija, u jinfatam fi żmien sentejn. (Mela ftakar u) iżżi ħajr lili u lill-ġenituri tiegħek! (La tinsiex li) lejja t-tmiem.” (31:15)

Dan u l-vers li jmiss jiffurmaw klawsola parentetika u jirreferu għat-tieni l-aktar dmir importanti tal-bniedem, wara d-dmir tiegħu lejn Alla—l-obbligi tiegħu lejn l-umanità, li jibdew bl-obbligi tiegħu lejn il-ġenituri tiegħu. Jingħadlu li jrid ikun tajjeb u ġentili mal-ġenituri tiegħu.

Sidi ħenn għall-ġenituri tagħna

Alla jiggwida lill-bniedem lejn id-dmir tiegħu lejn il-ġenituri tiegħu u jagħti wkoll ir-raġuni għal dan, jiġifieri li l-ġenituri jagħmlu kull xorta ta’ sagrifiċċju għal uliedhom, partikolarment l-omm.

Nixtieq nagħlaq bit-talb li Alla għallimna għall-ġenituri tagħna. Alla jgħid li għandna biex nuru l-ħniena lejn il-ġenituri tagħna u nitolbu għalihom: “Sidi, ħenn għalihom bħalma rabbewni meta kont żgħir.” Ammen.

Nawgura lill-ommijiet kollha ‘Jum l-Omm’ hieni u mbierek.

Posted in Ahmadiyya Malta, Ahmadiyya: The True Islam, Article, www.Ahmadiyya.mt | Tagged Ahmadiyya Malta, art, ‘Jum l-Omm’ is-sena kollha, “Paradise lies under the feet of the mothers.”, Happy Mother's Day, Il-ġenna tinsab taħt saqajn l-omm, In-Nazzjon, Islam, Jum l-Omm, L-OMM, Love, Malta, Mother, Mother's Day, Mothers, Muslim, photography, Quran, Quranic, summer, travel | Leave a comment

Gratitude as a Source of Growth and Blessings

Posted on May 5, 2025 by Laiq Ahmed Atif

Posted in Ahmadiyya, Ahmadiyya Malta, Ahmadiyya: The True Islam, www.Ahmadiyya.mt | Tagged Ahmadiyya Malta, Blessings, Divine Blessings, F Living Show, F Living TV, gratitude, Gratitude as a Source of Growth and Blessings, Imam Atif, Islam, Karl Bonaci, Laiq Ahmed Atif, Malta, Patri Mario Attard, Pope Francis, Quran | Leave a comment

Id-Dawl 87

Posted on May 5, 2025 by Laiq Ahmed Atif

ID-DAWL 87

Id-Dawl 87 Download

Posted in Id-Dawl, Id-Dawl Magazine | Tagged Id-Dawl, Id-Dawl 87, Id-Dawl Magazine, Malta, Maltese | Leave a comment

	Nemat Ali on The life of humility and …
	Nemat Ali on Interfaith Diversity Week 2024…
	Nemat Ali on Is the Holy Quran inspired by…
	prayer time on The Holy Quran – A Casket of…
	prayer time on The Holy Quran – A Casket of…

L-importanza tal-ilbies diċenti u modest fis-soċjetà

Inħarsu lejn il-fatturi diġitali tas-saħħa mentali u l-benesseri taż-żgħażagħ

During the Id-Dar tal-Providenza Volleyball Marathon 2025

NIRRINGRAZZJA ANKE LILL-ĠEBEL…

Flimkien kontra l-mibegħda u r-razziżmu; filwaqt li nibnu pontijiet, u mhux ostakli

Nirrikonoxxu u niċċelebraw l-eroj tagħna ta’ kuljum

L-AVVANZ EKONOMIKU JIDDEPENDI FUQ IL-PAĊI U L-ARMONIJA

Il-bilanċ bejn il-mogħdrija u s-sigurtà: il-kwistjoni tat-tlib u s-sigurtà pubblika

Negħlbu d-dipendenza fuq id-droga permezz tal-fidi u l-għemejjel tajba

Tikber it-theddida għall-paċi globali

Uliedna qed imutu bil-mod il-mod bil-ġuħ u bil-mard

Kont bil-ġuħ u ma tajtnix ikel

EKONOMIJA LI TIFFJORIXXI, SENSITTIVA U KKUNSIDRATA

— Eid-Al-Adha Mubarak! —

Għinu lill-oppressi kif ukoll lill-oppressur

Il-Moralità: Il-pedament taċ-ċiviltà umana

Il-Komunità Ahmadiyya Musulmana tifraħ lill-Papa Ljun XIV u lill-Knisja Kattolika

KULL WARDA FIHA X-XEWK!

ID-DINJA TINSAB FUQ XIFER IL-QERDA U T-TRIQ LEJN IL-PAĊI!

L-Ewtanasja Assistita…

Il-kumpass morali fi żminijiet ta’ għama spiritwali u morali

Il-ġenna tinsab taħt saqajn l-omm

ID-DAWL 87

Recent Posts

Recent Comments

Archives

Categories

Ahmadiyya Jamaat Malta www.ahmadiyya.mt amjmalta@gmail.com 0035679655255 0035621655255