IT-TĦABRIK FIL-ĦAJJA RELIĠJUŻA

Imam Laiq Ahmed Atif

Alla jistqarr fil-Koran Imqaddes: “U lil dawk li jħabirku fil-mogħdija Tagħna — Żgur li se niggwidawhom fl-użanzi tagħna. U tassew Alla jinsab ma’ dawk li jwettqu għemejjel tajba.” (29:70)

Dan il-vers jafferma ċar u tond li dawk in-nies li jagħmlu l-almu tagħhom biex isibu lil Alla u joqorbu Lejh, żgur li jkunu ggwidati minn Alla. Madanakollu, huwa importanti li dawn l-isforzi ma jkunux temporanji; anzi, irid ikun hemm tħabrik kostanti għall-mogħdija ta’ Alla.

Is-suċċess jinkiseb f’din il-ħaġa meta wieħed jibqa’ jipprova b’mod konsistenti u b’determinazzjoni, u fl-istess waqt iħares il-kmandamenti ta’ Alla. Kull persuna għandha ħiliet u inklinazzjonijiet differenti u l-ordni hi li wieħed ifittex lil Alla skont il-kapaċità li jħaddan. Meta jsir sforz f’dan ir-rigward, Alla juri t-triq li twassal għal għandu.  Madanakollu, jekk jinfilzaw ħsibijiet egoistiċi u skużi, u sforzi minimi jitqiesu bħala ‘tħabrik’, mela l-bniedem ma jilħaqx lil Alla.

Wieħed li hu traskurat u għażżien ma jistax jikseb l-istess grad ta’ grazzja Divina daqs wieħed li jagħmel ħiltu kollha u huwa sinċier fit-tfittxija għal Alla. Alla ma ħalliex lill-bniedem fid-dlam fejn tidħol din it-tfittxija. Alla juri wkoll is-sinjali bis-saħħa tal-Profeti Tiegħu biex jagħti prova tal-eżistenza Tiegħu.

Għaldaqstant, huwa importanti ħafna li nsegwu t-triqat u l-mezzi kollha biex niksbu l-qrubija Divina u li ningħaddu ma’ dawk li f’għajnejn Alla ‘jwettqu għemejjel tajba’, u ma’ dawk li verament iħobbu ’l Alla.