MOGĦDIJA WAĦDA GĦAS-SALVAZZJONI

F’dan il-waqt kritiku fl-istorja, jiena nemmen b’qalbi kollha li hemm biss ħaġa waħda li tista’ ġġib fi tmiem l-isfidi kbar ta’ żmienna.

Hemm mogħdija waħda li tista’ twassalna għas-salvazzjoni u teħlisna minn din id-dinja ta’ gwerra u konflitti u dik hi l-mogħdija ta’ Alla Omnipotenti.

Il-paċi ma tinstabx fis-setgħa jew l-għana, iżda pjuttost il-paċi tinsab fil-benniena ta’ Alla Omnipotenti.

NAGĦRFU LILL-ĦALLIEQ

Għaldaqstant, huwa l-ħtieġa tal-mument li l-umanità għandha tagħraf lill-Ħallieq tagħha. Alla Omnipotenti jixtieq li l-umanità, li Hu ħalaq bħala l-aqwa kreazzjoni tiegħu, għandha tgħix fil-paċi u tissodisfa d-drittijiet ta’ wieħed lill-ieħor.

Għalhekk, il-Koran Imqaddes, li huwa l-Ktieb Qaddis tal-Iżlam u s-sors ewlieni tal-liġi Iżlamika, kien, skont it-twemmin tagħna, rivelat minn Alla Omnipotenti lill-Qaddis Profeta Muħammad (is-sliem u l-barkiet t’Alla fuqu) u aħna nikkunsidrawh bħala l-liġi reliġjuża finali li se tibqa’ sa Jum il-Ġudizzju. U fil-Koran, Alla Omnipotenti jiddikjara li meta l-firda u d-diżordni jkunu tferrxu fl-irkejjen kollha tad-dinja, il-kawża ewlenija tkun id-distanza dejjem tikber bejn l-umanità u l-Ħallieq tagħha.

Fi żminijiet bħal dawn, meta d-dinja tkun resqet lejn xifer diżastruż, bis-saħħa tal-grazzja u l-ħniena infiniti Tiegħu, Alla Omnipotenti jibgħat lir-rappreżentanti magħżula Tiegħu biex iqarreb lill-umanità mill-ġdid lejn ir-reliġjon.  

(“The eternal skies of peace”, l–indirizz tal–Qdusija Tiegħu, Mirża Masroor Aħmad^aba, il-Kap Dinji tal-Komunità Ahmadiyya Musulmana)