Image: Zurijeta/Shutterstock.com
IS-SAFA U T-TJIEBA FIŻ-ŻGĦOŻIJA
It-Torċa, 18.10.2026 | Imam Laiq Ahmed Atif — amjmalta@gmail.com
“In-nazzjonijiet ma jistgħux jimxu ’l quddiem mingħajr ir-riformazzjoni taż-żgħażagħ.” Dan huwa l-kliem tad-deheb tat-Tieni Kalif tal-Komunità Ahmadiyya Musulmana, li jistabbilixxi tassew l-istandard li kull nazzjon għandu jimmira għalih biex iżomm postu b’dinjità fil-komunità internazzjonali.
Sabiex nifhmu l-livell morali, soċjali u spiritwali ta’ nazzjon, irridu nħarsu lejn iż-żgħażagħ tiegħu. Bl-istess mod, jekk irridu nħarsu ’l quddiem u nagħrfu x’jista’ jkun il-futur ta’ nazzjon, irridu nħarsu lejn iż-żgħażagħ tiegħu.
Mingħajr dubju, iż-żgħażagħ huma s-sinsla ta’ kull nazzjon. Jekk ikunu edukati sew, ta’ manjieri tajbin, bi mġiba xierqa, u jgawdu minn livell għoli ta’ għarfien u responsabbiltà soċjali, allura l-futur tan-nazzjon ikun f’idejn siguri.
Tassew, huma ż-żgħażagħ tal-lum li se jsawru s-soċjetà u jmexxu n-nazzjon ta’ għada; iż-żgħażagħ tal-lum huma l-mexxejja ta’ għada.
Ninvestu fil-formazzjoni taż-żgħażagħ tagħna
Għalhekk, jekk verament nixtiequ li naraw pajjiżna quddiem nett fil-komunità dinjija u, jekk nixtiequ nibnu futur ġust u mimli kompassjoni, jeħtieġ li nippjanaw b’għaqal u ninvestu fil-formazzjoni taż-żgħażagħ tagħna, filwaqt li nrawmu fihom valuri morali sodi.
L-iżvilupp etiku, edukattiv u spiritwali tagħhom se jsawwar is-soċjetà ta’ għada. Żgħażagħ iggwidati tajjeb iwasslu għal familji aktar paċifiċi, komunitajiet aktar b’saħħithom u nazzjon aktar kuntent u san.
Kemm huwa importanti dan is-suġġett taż-żgħażagħ. Dawn l-aħħar ġranet żort xi istituti edukattivi f’pajjiżina matul il-fresher’s week u ppruvajt nifhem u nosserva mill-qrib kemm hu importanti li ninvestu kull mezz possibbli fit-tiswir, it-trobbija u r-riforma taż-żgħażagħ tagħna.
Iż-żmien taż-żgħożija
Għalhekk, iż-żmien għandu jiġi apprezzat u użat b’għaqal. Dak li jgħodd mhuwiex biss x’jagħmel il-bniedem, iżda wkoll meta, fejn u għaliex jagħmlu. Huwa minnu li l-għemejjel fi żmien xieraq għandhom impatt ferm akbar. Is-safa u l-pjetà fiż-żgħożija huma verament virtujiet mill-isbaħ, għalhekk, iż-żgħażagħ għandhom jgħixu ħajja tat-tjieba u l-ġustizzja.
Pereżempju, meta persuna jkollha s-setgħa li tirredikola, tinsulta jew tumilja lil ħaddieħor mingħajr ma tibża’ mill-konsegwenzi, iżda tagħżel li tittrattah b’dinjità u rispett, tkun qed turi karattru morali ġenwin. Ir-rispett għandu l-akbar tifsira meta persuna jkollha l-possibbiltà li ma tagħtihx, iżda konxjament tagħżel li tagħtih.
Ir-reliġjon u l-emozzjonijiet u x-xewqat tal-bniedem
L-għan tar-reliġjon mhuwiex li telimina l-emozzjonijiet u x-xewqat tal-bniedem, iżda li tgħallem id-dixxiplina u mod xieraq tal-użu tagħhom. Ix-xewqat naturali mhumiex naturalment ħżiena; huwa l-użu ħażin tagħhom jew in-nuqqas ta’ kontroll fuqhom li jista’ jwassal lil persuna ’l bogħod mill-kondotta morali. Kif jispjega t-Tieni Kalif tal-Komunità Ahmadiyya Musulmana:
“Nemmen fl-Iżlam għax dan ma jippruvax li jkisser ix-xewqat naturali tiegħi, iżda jiggwidahom fid-direzzjoni t-tajba. Aktar minn hekk, ma jgħaffiġx kompletament ix-xewqat tiegħi u b’hekk ibiddilni f’ġebla; u lanqas ma jħallihom mingħajr kontroll u trażżin u b’hekk ibiddilni f’annimal. Iżda, bħal espert tal-irrigazzjoni li jħażżem l-ilmijiet u jiddireġihom fil-kanali tal-irrigazzjoni, b’hekk, ibiddel art niexfa f’waħda fertili, l-Iżlam jibdel b’kontroll u gwida xierqa x-xewqat naturali tiegħi fi kwalitajiet u prinċipji morali għolja.”
“L-Iżlam ma jgħidlix: Alla tak qalb li taf tħobb iżda mbagħad jipprojbilek tagħżel sieħeb jew sieħba tal-ħajja, jew li Hu tak is-sens tat-togħma u l-kapaċità li tapprezza ikel tajjeb, iżda mbagħad jipprojbik milli tiekol dan l-ikel. Bil-kontra, jgħallimni nħobb b’qalbi u bis-sewwa biex it-twettiq tar-riżoluzzjonijiet tajba tiegħi jiġu mħarsa permezz ta’ wliedi. Jippermettini niekol ikel tajjeb, iżda fil-limiti xierqa, sabiex ma nikolx sa ma nixba’ filwaqt li l-proxxmu tiegħi jibqa’ bil-ġuħ. B’dan il-mod, bit-trasformazzjoni tax-xewqat naturali tiegħi fi kwalitajiet morali għolja, l-Iżlam jissodisfa l-umanità tiegħi.”
Il-bilanċ sabiħ li r-reliġjon tistabbilixxi
Dan juri b’mod sabiħ il-bilanċ li r-reliġjon tfittex li tistabbilixxi. Ix-xewqat tal-bniedem m’għandhomx għalfejn jinqerdu; jeħtieġ li jiġu ggwidati. L-emozzjonijiet m’għandhomx għalfejn jiġu miċħuda; jeħtieġ li jiġu espressi fil-limiti morali xierqa. Il-pjaċir m’għandux għalfejn jiġi abbandunat; jeħtieġ li jiġi mfittex b’mod responsabbli u fil-limiti preskritti mill-fidi.
Għalhekk, it-test veru tal-karattru mhuwiex jekk persuna tastjenix mill-għemil ħażin meta ma jkollhiex l-opportunità jew il-kapaċità li twettqu. It-test akbar huwa jekk tkunx kapaċi teżerċita l-kontroll fuqha nnifisha meta t-tentazzjoni tkun qawwija, jekk tkunx kapaċi tibqa’ umli meta jkollha s-setgħa, jekk tkunx kapaċi turi mogħdrija meta jkollha l-ħila tagħmel il-ħsara, u jekk tkunx kapaċi tagħżel il-ġustizzja meta toroq oħra jkunu miftuħa quddiemha.
Nagħmlu l-aħjar użu taż-żgħożija
Għalhekk, mhuwiex biss importanti, iżda tassew kruċjali li ż-żgħażagħ tagħna jagħmlu l-aħjar użu taż-żgħożija tagħhom u jiddedikaw l-enerġija u l-kapaċitajiet mogħtija lilhom għat-tfittxija tal-eċċellenza fil-pjetà, fil-purità, fis-safa, fit-tjubija u fil-virtù.
Tabilħaqq, it-tiġdid u l-progress ta’ kull nazzjon jiddependu, sa ċertu punt kbir, mit-tiġdid u mill-iżvilupp morali taż-żgħażagħ tiegħu.
