Knowledge and Remedy for Physical and Spiritual Ailments

Image: Brian A Jackson/Shutterstock.com

L-għarfien u r-rimedju għall-mard fiżiku u spiritwali

It-Torċa, 22.11.2026 | Imam Laiq Ahmed Atif — amjmalta@gmail.com

Il-Qaddis Profeta Muħammad, is-sliem għalih, qal li hemm żewġ tipi ta’ għarfien: l-għarfien dwar il-ġisem u l-għarfien dwar ir-reliġjon. Fi kliem ieħor, hemm l-għarfien dwar is-saħħa u l-ġisem tal-bniedem, u l-għarfien dwar ir-ruħ tiegħu; l-għarfien fiżiku u l-għarfien spiritwali.

Wara li nifhmu dan il-prinċipju, irridu niftakru li hemm ukoll żewġ tipi ta’ mard: il-mard fiżiku, li jolqot il-ġisem, u l-mard spiritwali, li jolqot ir-ruħ tal-bniedem.

Kull persuna li tkun marida u li tagħti valur lil ħajjitha u lil saħħitha għandha tmur għand tabib b’esperjenza u tispjegalu sew x’qed tħoss u x’inhuma s-sintomi tagħha. Imbagħad għandha ssegwi l-kura u l-pariri tiegħu bil-paċenzja u b’perseveranza.

Il-pazjent m’għandux jippanikja, jaqta’ qalbu jew jgħaġġel. Lanqas m’għandu jinjora l-pariri tat-tabib dwar dak li għandu jiekol jew jevita. M’għandux jipprova jimponi l-opinjoni tiegħu fuq dik tat-tabib, jew ipoġġi l-parir ta’ xi ħadd ieħor qabel dak tat-tabib. Għandu jsegwi bir-reqqa u b’attenzjoni l-kura u l-mediċini li jiġu preskritti lilu mit-tabib professjonali.

Dawn huma l-prinċipji li kull pazjent għandu jsegwi jekk verament jimpurtah minn ħajtu u minn saħħtu.

Insegwu l-parir b’paċenzja

Jekk, min-naħa l-oħra, il-pazjent ma jsegwix dawn il-prinċipji u jibqa’ jgħaġġel jew jaġixxi mingħajr paċenzja, kif jista’ jistenna li jibbenefika mill-għajnuna tat-tabib? B’dan l-aġir, ikun qed inaqqas il-possibbiltà li jieħu l-benefiċċju sħiħ mill-kura.

Huwa importanti ħafna wkoll li l-persuna li mingħandha nfittxu parir mediku tkun tabib b’esperjenza u b’għarfien tajjeb. Mhuwiex għaqli li wieħed ifittex il-kura mingħand persuna li m’għandhiex biżżejjed għarfien, għax minflok ma tgħin, tista’ taggrava l-marda. Għalhekk, huwa essenzjali li t-tabib ikun espert fil-qasam tiegħu u jkun jaf sew dak li qed jagħmel.

Il-mard spiritwali

Bl-istess mod li hemm ħafna tipi ta’ mard fiżiku, hemm ukoll ħafna tipi ta’ mard spiritwali. Xi drabi, il-mard spiritwali jista’ jkun saħansitra aktar perikoluż u serju.

Hemm ħafna problemi spiritwali li l-bniedem iqishom bħala affarijiet żgħar u bla importanza. Iżda dawn il-problemi jistgħu, bil-mod il-mod u mingħajr ma jinduna, jagħmlu ħsara kbira lill-qawwiet spiritwali tiegħu. Fl-aħħar mill-aħħar, jistgħu jwassluh għal telfa spiritwali kbira.

Għalhekk, bħalma qatt m’għandna nqisu marda fiżika bħala xi ħaġa żgħira, anki jekk tidher ħafifa, hekk ukoll m’għandna ninjoraw il-mard spiritwali.

Meta persuna jkollha problema fiżika, għandha tfittex l-għajnuna ta’ tabib kapaċi u b’esperjenza, u ssegwi l-pariri, il-kura u d-dieta li jiktibilha. Bl-istess mod, għandha tieħu bis-serjetà s-saħħa spiritwali tagħha u tfittex il-kura meħtieġa għar-ruħ tagħha.

Il-prinċipji għall-kura spiritwali u fiżika

Il-prinċipji għall-kura spiritwali huma l-istess bħal dawk għall-kura fiżika. Wieħed m’għandux ikun suspettuż jew jaħseb ħażin, m’għandux jgħaġġel, m’għandux jittraskura l-pariri li jingħata, u m’għandux ipoġġi l-opinjoni tiegħu jew ta’ ħaddieħor qabel dik tal-persuna li qed tiggwidah spiritwalment.

Persuna li ssegwi dawn il-prinċipji tista’ tittama li tikseb il-benefiċċju u l-fejqan spiritwali li tkun qed tfittex.

Peress li l-prinċipji tal-mard fiżiku u dak spiritwali huma simili, hekk ukoll huma simili l-prinċipji għall-fejqan tagħhom.

Bħalma huwa importanti li persuna marida fiżikament tkun fil-kumpanija ta’ tabib espert u ssegwi l-kura li jagħtiha, hekk ukoll huwa importanti li persuna li tixtieq tfejjaq il-mard spiritwali tagħha tkun fil-kumpanija ta’ persuna tajba u devota lejn Alla.

Din il-persuna għandha tkun twajba, timxi skont it-tagħlim ta’ Alla, tkun sinċiera fi kliemha u f’għemilha, tgħix ħajja ta’ tjieba u jkollha karattru mill-aqwa. Mhux biżżejjed li wieħed ikun biss fil-kumpanija tagħha; huwa importanti wkoll li jisma’ t-tagħlim tagħha u jipprattika dak li tgħallem.

Kumpanija tal-ġusti u l-verità

B’hekk, bħalma tabib espert jgħin lill-ġisem jikseb lura saħħtu, persuna tajba u spiritwalment matura tista’ tgħin lill-bniedem isib il-fejqan u s-saħħa ta’ ruħu. Għalhekk, il-Koran Imqaddes jiggwida lil dawk li jemmnu dwar din il-kwistjoni u jgħid: “Intom li temmnu! Kunu konxji tad-dmir tagħkom lejn Alla u żommu kumpanija mal-ġusti u mal-verità.” (Il-Koran, 9:119)

Fil-fatt, huwa importanti ħafna li wieħed ikun fil-kumpanija ta’ nies ġusti u sinċieri. Kumpanija bħal din tgħin biex tneħħi l-mard morali u spiritwali minn qalb il-bniedem, u tħalli effett tajjeb ħafna fuqha. Hija twassal lil min jemmen lejn is-sors tal-purità u t-tjieba. Barra minn hekk, toħloq ambjent morali u spiritwali tajjeb għall-bniedem.

Huwa tassew importanti li nagħżlu lil sħabna b’għaqal u b’attenzjoni, għaliex ħafna drabi niġu influwenzati minn ħbiebna u min-nies ta’ madwarna mingħajr lanqas biss nindunaw. Barra minn hekk, dejjem insegwu l-parir spiritwali biex insaħħu r-ruħ u l-ispiritwalità tagħna, kif insegwu l-parir mediku għal saħħitna.

Unknown's avatar

About Laiq Ahmed Atif

www.ahmadiyya.mt E: amjmalta@gmail.com Mob: +35679655255 twitter.com/ahmadiyyamalta www.facebook.com/ahmadiyyamalta www.youtube.com/user/AhmadiyyaMalta
This entry was posted in Ahmadiyya, Ahmadiyya Malta, Article and tagged , , , , , , , , , , , , , , , , , , , . Bookmark the permalink.

Leave a Reply

This site uses Akismet to reduce spam. Learn how your comment data is processed.