Image: Elena_Dig/Shutterstock.com

Xi tfisser l-umiltà vera?

Il-Leħen, 26.07.2026 | IMAM Laiq Ahmed Atif – amjmalta@gmail.com

L-umiltà u l-modestja huma karatteristiċi tali li meta jitwieldu f’persuna n-nies jinġibdu lejha u jkunu jridu jirrelataw magħha. Fil-Koran Imqaddes (25:64), Alla li Jista’ Kollox jgħid li l-qaddejja veri ta’ Alla l-Ħanin huma dawk li jimxu fuq l-art b’umiltà u b’mod dinjituż, u meta l-injoranti jindirizzawhom, huma jwieġbu bil-messaġġ ta’ “Paċi”.

Fi kliem ieħor, meta l-injoranti jridu jikkawżaw xi kunflitt jew problema, il-qaddejja ta’ Alla dejjem jagħżlu l-paċi u s-sliem u ma jeskalawx it-tilwima, iżda jsolvu l-kwistjoni dak il-ħin stess u jitwarrbu. U anke jekk xi ħadd jipprova jibda tilwima, ma jħalluhiex tmur aktar ’il quddiem. Mhumiex imdorrijin jiġġieldu gwerer għal snin sħaħ fuq kwistjoni trivjali bħall-injoranti.

Xi tfisser fil-fatt l-umiltà hawnhekk? Umiltà tfisser ġentilezza, ħlewwa, manjieri u mġiba b’mod li ma tagħmel l-ebda distinzjoni bejn min hu superjuri u dawk ta’ taħtu, u anke jekk wieħed jista’ jkollu status għoli fis-soċjetà, l-imġiba tiegħu ma’ ħaddieħor għandha tkun profondament sempliċi u umli. It-tifsira tkun li hemm ġentilezza fil-mixja, hemm kalma, dinjità u umiltà, u ma jolqtux saqajhom mal-art minħabba arroganza u suppervja, u ma jimxux b’suppervja bħan-nies arroganti, kif jgħid Alla li Jista’ Kollox: “Timxix fl-art b’suppervja, inti tabilħaqq ma tistax taqsam l-art, u lanqas ma tista’ tilħaq il-muntanji fl-għoli.” (Koran Imqaddes, 17:38)

Darba l-Qaddis Profeta Muħammad, is-sliem għalih, indirizza lil sħabu u qal, “Alla li Jista’ Kollox żvela lili li għandkom tkunu umli sal-punt li ħadd minnkom m’għandu jkun kburi b’ħaddieħor.”

Il-mistoqsija hi fejn ninsabu aħna? Kburin b’xi ħadd ieħor, jew umli ma’ kulħadd? Spiss naraw li xi wħud huma kburin bin-nazzjon tagħhom, kburin bil-familja tagħhom, xi wħud huma kburin bil-ġid tagħhom, xi wħud huma kburin bil-ħbieb tagħhom, xi wħud huma kburin b’uliedhom, u kull fejn tħares, tara xi mod ta’ kburija jew xi ħsieb ta’ kburija fin-nies ta’ madwarek. Sa tali punt li xi kultant meta xi nies jilbsu ħwejjeġ sbieħ, jibdew ikunu kburin b’dan, u jaħsbu li huma l-aqwa minn kull bniedem ieħor. Jekk kulħadd iqis il-prinċipju msemmi hawn fuq tal-ħlewwa u l-umiltà, allura minflok il-kburija, l-umiltà għandha dejjem tidher f’kull wieħed u waħda minna.

Hemm versi sbieħ mill-poeżija tal-Fundatur tal-Komunità Ahmadiyya Musulmana li kkwotajt bosta drabi u kull meta taqrahom il-bniedem jintilef fl-istagħġib u jintilef fil-fond tal-messaġġ. Dawn il-versi jitfgħu dawl b’mod tajjeb fuq dan is-suġġett u hija prinċipju gwida għalina lkoll biex insegwu, irrispettivament mill-fidi, in-nazzjonalità jew l-isfond. Huwa jgħid:

Aħseb fik innifsek bħala inferjuri minn kulħadd

Forsi, b’hekk, tista’ tidħol fis-Saltna ta’ Alla l-Ħanin.

Aqta’ l-kburija, is-suppervja u l-arroganza—għax din hija l-virtù

Inżel fit-trab (sir umli)—għax din hija x-xewqa tal-Mulej.

Jekk verament irridu nsiru umli u nibżgħu minn Alla, allura rridu dejjem inżommu f’moħħna li jekk iqum xi ħsieb ta’ arroganza, dan it-tagħlim għandu jiġi f’moħħna mill-ewwel u jġegħelna nirrealizzaw li m’għandniex inħossuna kburin jew arroganti. Iżda dejjem inkunu umli u saqajna fl-art, għax din hija verament ix-xewqa tal-Mulej.